ISAIA 37 - Tuvalu Revised Bible

Ko Fesili a te Tupu ki a Isaia me ne a ona Manatu(2Tupu 19.1-7)

1I te logoga o te Tupu ko Hesekia i te tala a ana ofisa kona, tena ne saesae ei ona gatu, pei ki te gatu lautaga, kae fano ki te Faletapu o te Aliki.

2Ne uga atu ne ia a Eliakimo, te ofisa pule o te palesi, mo Sepina te failautusi, mo faitaulaga matuatua ei, ke olo ki a Isaia te pelofeta, te tama tagata a Amota. A latou kona e pei foki ki gatu lautaga.

3Tenei te fekau ne tuku atu ne ia ke olo mo latou ki a Isaia: “A te aso nei se aso o te puapuaga; a matou nei ko fakasala kae ko masiasi faka eiloa. A matou ko pela me se fafine ka fai o fanau, kae ko to vaivai ko se maua ne ia o fanau.

4A te tupu o Asulia ko oti ne uga ne ia tena ofisa pule ke fano o fai a muna se 'tau ki te Atua ola. A te Aliki tou Atua ke fakalogo aka ki muna se 'lei konei, kae fakasala atu a latou kola e faipati ne latou. Tela la, talo atu aka ki te Atua mō o'tou tino konei koi ola mai.”

5I te mauaga ne Isaia a te fekau a te Tupu ko Hesekia,

6ne avatu ne ia tena tali penei: “A te Aliki e fai mai ki a koe ke sa mataku koe ki pati a te kau Asulia pela i te Aliki e se mafai ne ia o faka'sao koutou.

7A te Aliki ka fai ne ia a te tupu o Asulia ke logo i se tala tela ka fuli ne ia ona mafaufauga ke foki atu ki tena fenua, tena ka tamate ei a ia ne te Aliki i kona.”

Ko Hesekia mo te Tupu o Asulia(2Tupu 19.8-19)

8A te ofisa Asulia ko logo i te tupu o latou ko oti ne tiaki ne ia a te fa'kai o Lakisa, kae tenei ko taua atu nei ki te fa'kai tafa atu ko Lipina; tena ne fanatu ei a ia o faipati ki te tupu i kona.

9Ne oko atu te tala ki te kautau a Asulia i te kautau Aikupito, tela e takitaki ne te Tupu ko Tilaka o Sutana, ko vau o taua ki a latou. I te logoga o te tupu o Asulia i te tala tena, ave ei tena tusi ki te tupu o Iuta ko Hesekia mo te fekau tenei,

10“A te Atua tela e talitonu koe ki ei ko oti ne fai atu i a koe e se takavale i a au, kae masaua o sa talitonu ki te mea tena.

11Ko oti ne lagona ne koe a te mea ko oti ne fai ne se tupu Asulia ki se malo tela e manako a ia o ta fakamasei. I tau fakatau e mafai ne koe o sao?

12A oku tupuga ne fakatakavale masei ne latou a fa'kai o Kosana, Halana mo Lesefa, kae tamate a tino Petetena kola e nofo i Telasa, kae e se mafai ne atua o latou o fakasao latou.

13Ko fea a tupu o fa'kai o Hamata, Apata, Sefavaima, Hena mo Iva?”

14Ne puke mai ne te Tupu ko Hesekia a te tusi mai i avefekau, faitau ei ne ia. Tena ne fanatu a ia ki te Faletapu, fola atu ne ia te tusi tena i mua o te Aliki,

15kae talo atu penei,

16

28“E iloa faka'lei eiloa ne au a mea katoa e uiga ki a koutou; ko mea a koutou e fai, mo koga e olo koutou ki ei. E iloa foki ne au a muna ma'sei a koutou ne fai mai ki a au.

29Ko oti au ne logo i otou muna se 'lei kona ki a au, mo otou pati fakamatamata, tela la, ka fakalave ne au otou isu ki se kafilo kae sai se uka mo taofi otou gutu, kae fakafoki atu koutou i te auala foki eiloa tela ne o'mai koutou i ei.”

30Tena ne fai atu ei a Isaia ki te Tupu ko Hesekia penei, “Tenei te fakailoga o te mea ka tupu. I te tausaga tenei, mo te sua tausaga, a koutou ka kai fua ki saito vao, ka ko te tausaga mai i tua atu, ka mafai ei ne koutou o toki otou saito kae kati manafai ko matua; ka mafai foki ne koutou o toki otou vine, ko kai eiloa koutou i ei.

31A tino i Iuta kona e toe mai ka olaola 'lei e pela me ne lakau kola e 'mau olotou aka ki lalo i te laukele kae fua mai fuaga e uke.

32Ka isi eiloa ne tino i Ielusalema, pela foki i te Mauga o Siona ka ola mai, me i te Aliki Malosi e manako eiloa o fakataunu a te mea tena.

33“Tenei te muna a te Aliki e uiga ki te tupu o Asulia: ‘Ka se ulu mai lele eiloa a ia ki loto i te fa'kai tenei, io me sana mai sena matasana. Ka seai eiloa ne sotia mo olotou talita e fakapilipili mai ki te fa'kai, kae ka seai ne koga a latou e fakatoka e taumafai ei latou ke oko mai ki loto i te fa'kai.

34Ka toe foki atu eiloa a ia i te auala ne vau ei a ia, kae ka se oko mai eiloa ki loto i te fa'kai tenei. Ko au, te Aliki, tenei ne faipati atu.

35Ka puipui ne au te fa'kai tenei kae tausi ne au, ke mo a e takuvalea toku igoa. E fai ne au pena, e tusa foki eiloa mo taku tautoga ki taku tavini ko Tavita.’ ”

36I te po tena, ne fanatu te agelu a te Aliki ki te koga e nofo ei te kautau a Asulia, tamate eiloa ne ia e tusa mo te selau valusefulu lima afe sotia o latou. I te tafataeao, ko takato mai me ko mate katoa!

37Tena, foki atu ei te Tupu o Asulia ko Sanelivi ki Nineva.

38I te aso e tasi, i te taimi ne tapuaki ei a Sanelivi i te faletapu o tena atua ko Nisiloka, kae o'mai ana tama tagata e tokolua ko Atameleko mo Salesa, tamate eiloa ne laua a te tupu ki pelu a laua, tena sola ei laua ki te fenua o Alalata. Ne sui a ia ne te sua tama tagata a ia e igoa ki a Esalatonu, o fai mo tupu.