1Au se tino ko oti ne iloa ne au a te fakasalaga a te Atua.
2Ne teke mai ne Ia a au ki te pouliga,
3Kae soko eiloa te kini ne Ia a au mo te se alofa.
4Ko pakiakia valevale toku foitino, kae fatifati foki ne Ia oku ivi.
5Ne sai ne Ia a au i loto i te fanoanoa mo te puapuaga.
6Ne fai malo ne Ia au ke nofo i loto i te pouliga o te mate.
7Ne saisai ne Ia au ki filifili;
Au nei se pagota ko seai se fakamoemoega ke toe sao.
8Ne kalaga au ki luga mō se fesoasoani,
Ka ko te Atua ne ita ma fakasao au;
9Au ko takasese manafai e sasale au;
A 'pui fatu e pono mai faeloa i so se koga e mafuli au ki ei.
10E fakatalitali mai a Ia ki a au e pela me se ulosa;
E tafuke mai a Ia ki a au e pela me se leona.
11E afuli ne Ia au ki tua mo te auala,
Saesae ne Ia toku foitino,
Oti aka, tiakina ei ne Ia au pena.
12E futi aka tena kausana,
Kae fai au pela me se taketi ki ana matasana.
13E sana mai ana matasana,
Galo eiloa ki loto i toku foitino.
14A tino e kata mai faeloa ki a au i aso katoa;
Au pela me se mea fai fa'kata ki a latou.
15E fainu malo ne Ia au ki vai 'kona,
Kae fagai ne Ia au ki meakai 'kona mo meainu 'kona.
16E kana ne ia oku mata i lalo i te laukele
Kae fatifati ne ia oku nifo i luga o kaupapa.
17Ko puli eiloa i a au a te uiga o te ola 'lei,
Te filemu mo te fiafia.
18Ko se leva nei te taimi e ola ei au;
A toku fakamoemoega i te Aliki ko seai.
19A toku mafaufau ki toku mae mo te seai o se koga mo oku nofo,
Ko pela eiloa me se poisini i te 'kona;
20Kafai e mafaufau soko au ki ei,
Kae gasolo o vaivai toku agaga.
21Kae e isi eiloa se fakamoemoega 'lei e maua ne au mafai e mafaufau au ki te mea tenei e tasi:
22A te alofa mo te agalei o te Aliki e tumau faeloa,
23E fou faeloa pela mo te tafataeao,
Kae mautinoa tonu eiloa,
E pela eiloa mo te la e mautinoa tonu me e fanake faeloa.
24Ko te Aliki fua ko toku fakamoemoega,
Tela la, au e fakamoemoe eiloa ki a Ia.
25A te Aliki e atafai ki a latou kola e talitonu ki a Ia,
26Tela la, e sili te fakatali o tatou mo te kufaki ke fakasao ne Ia tatou.
27Se mea sili i kautama tuputupu ke fakamasani ke maua ne latou a te loto kufaki.
28Kafai ko puapuaga tatou, e tau mo tatou o sagasaga mo te filemu kae kufaki;
29E tau mo tatou o talia te fakasalaga,
Me e isi eiloa se fakamoemoega 'lei mo tatou i se taimi fakamuli.
30Kafai tatou ko takavale kae ko fakaitaitagina ne nisi,
E tau eiloa o talia ne tatou te 'tou takavale.
31A te Aliki e alofa kae se mafai o ita faeloa ki a tatou ki te se gata mai.
32E aumai ne ia te fanoanoa i nisi taimi,
Ka ko tena alofa mo tatou e iloa tonu, kae e lasi foki.
33E se fai pela e fiafia a Ia o faka'mae
Kae fakafanoanoa sale tatou.
34E iloa eiloa ne te Aliki mafai ko momomo tou agaga i te fi'ta.
35E iloa foki ne ia manafai ko se maua ne tatou a te saolotoga ki mea ne aumai ne ia ki a tatou;
36Kafai ko piko a te fakamasinoga i te fono, e iloa foki ne Ia.
37Ko te loto o te Aliki tokotasi e tau o fai sale faeloa.
38Ko te Aliki e 'ta ne Ia nisi tino kae fai fakalei nisi.
39Ai a e mui'mui sale ei tatou manafai ko fakasalagia tatou i 'tou agasala?
40Tatou ka toe kilokilo ki 'tou amioga kae ke fuli atu tatou ki te Aliki.
41Ke 'tala atu otou loto ki te Atua i te lagi kae talo penei,
42“Te Aliki, a matou ne agasala kae teke ki a koe,
Kae ne seki fakamagalo ne koe matou.
43“Ne afuli ne koe matou o tamate;
A tou alofa ko pono ne tou kaitaua,
44I te kaumana o te kaitaua tela ko to matolu ko se ulu i ei omotou talosaga.
45Ne fai ne koe matou pela me ne koga e laku ei kaiga masei o te lalolagi.
46“A matou ne fakaitaita kae fakalili ne omotou fili katoa.
47A matou ko oti ne fe'paki mo puapuaga mo te masei valevale;
A matou e nofo faeloa i te puapuaga mo te ma'taku.
48A oku mata ko tafe fua i ei a vaitafe o loimata,
I te taimi ne ta fakamasei ei oku tino.
49“A oku loimata ka sali ifo e pela me se vaitafe foliki e se mafai o gata te tafe,
50Ke oko ki te taimi e kilo ifo ei a te Aliki mai te lagi
Kae lavea ne Ia matou.
51A toku loto ko oko eiloa i te tagi manafai e kilo au ki te mea ne tupu ki fafine o te fa'kai.
52“Au ko lave i te malei e pela me se manu eva,
Te malei a oku fili kola e seai se pogai o te lotou ita mai ki a au.
53Ne pei ola ne latou a au ki loto i te lua kae pono te puga o te lua ki te fatu.
54Ne fanake te vai o ufi toku foitino, tena ne mafaufau aka ei au i te mate ko pili mai ki a au.
55“Te Aliki, au ne tagi atu ki a koe mai lalo i te lua.
56Kae i te taimi ne fakamolemole atu ei au ke fakalogo mai koe ki taku tagi,
Kae ne lagona eiloa ne koe.
57Ne tali mai koe ki taku tagi kae ne fai mai koe ke se mataku au.
58“Te Aliki, a koe ne vau o fakasao au.
59Fai tau fakamasinoga mo te alofa ki a au,
Me iloa ne koe a mea 'se ne fai mai ki au.
60E iloa ne koe te takalialia o oku fili ki a au,
Mo olotou togafiti ke ta au.
61“Te Aliki, ne lagona ne koe a muna fakaitaita a latou ki a au;
E iloa foki ne koe olotou togafiti katoa.
62I aso katoa, e faipati faeloa latou e uiga ki a au kae fai olotou aofaga ki a au.
63Mai te taeao ke oko ki te po e mai faeloa o fakaitaita au.
64“Te Aliki, fakasala atu latou e tusa mo olotou mea ne fai;
65Muna 'tuku atu latou kae faka'fonu latou i te fanoanoa!
66Afuli atu latou ki lalo, kae fakaseai latou mai te lalolagi!”
Who We AreWhat We EelieveWhat We Do
2025 by iamachristian.org,Inc All rights reserved.
