SALAMO 91 - Tuvalu Revised Bible

A te Atua ko te Tou 'Puiga

1So se tino e fano ki te Aliki ke sao a ia,

So se tino foki tela e nofo i lalo o te tausiga a ia

Tela e o ia te Malosi Katoatoa,

2E mafai o fai atu penei ki a ia,

“A koe ko toku lafiga mo toku puiga.

Koe ko toku Atua; e fakatuanaki au ki ei.”

3Ka tausi ne ia koe ke sao mai fakalavelave kola e seki matea atu,

Mo masaki foki kola e oko mai ei te mate.

4E fakamalumalu ifo ne ia koe ki ona kapakau;

Ko malu ei koe i tena tausiga;

A tena fakamaoni ka 'pui ne ia koe, ko malu lei ei koe.

5E se 'tau mo koe o mataku i so se fakalavelave i te po io me ko taua e tupu fakavave i ao,

6io me ko mala e oko mai i te po,

Mo mea masei kola e 'mate ei a tino i te ao.

7E mafai o 'mate se tokoafe i ou tafa,

Kae sefulu afe e nikoi i a koe,

Kae seai eiloa se mea masei e oko ki a koe.

8Ka kilo koe ki ei, kae ka lavea atu ne koe te fakasalaga o tino amio ma'sei.

9Me ko fai ne koe a te Aliki mo ou lafiga,

Mo ia tela e Tafasili i te Maluga ko fai mo ou 'puiga,

10Ka seai ne puapuaga e oko atu ki a koe,

Ka seai foki ne fakasauaga ka fakapilipili atu ki tou fale.

11 Mata 4.6; Luka 4.10 Ka tuku atu ne te Atua ana agelu ke tausi ki a koe,

O puipui foki koe i koga katoa e fano koe ki ei.

12 Mata 4.6; Luka 4.11 Ka sapai koe ne latou ki olotou lima, i ou vae ma pakia i fatu.

13 Luka 10.19 Ka lakalaka ne koe a leona mo gata,

Pela foki leona fe'kai mo gata poisini.

14Muna a te Atua, “Ka fakasao ne au a tino e a'lofa ki a au,

E puipui foki ne au a latou kola e iloa ne latou i au ko te Aliki.

15Kafai e ka'laga mai latou ki a au, ka tali atu au ki a latou;

Kafai e puapuagatia latou, ko au ka fesoasoani atu ki a latou,

Ka fakasao kae faka'malu ne au latou.

16Ka tuku atu ne au ke ola loa latou;

Kae faka'sao foki latou ne au.”