SALAMO 35 - Tuvalu Revised Bible

Te Talo mō se Fesoasoani

1Te Aliki, teke atu ki a latou kola e teke mai ki a au,

Kae taua atu ki a latou kola e fai taua mai ki a au!

2Puke ki tau talita mo ou gatu tau kae vau o fesoasoani mai ki a au.

3Sau ake ki luga tau tao mo tau takū o teke atu ki a latou kola e afuli mai au.

Taku mai ki a au me ka fakasao ne koe au.

4Ke taka'vale kae fakamasiasigina a latou kola e taumafai o tamate au!

Ke 'tele valevale o 'foki ki tua a latou kola e mafaufau ki se mea e fakamasei ei au!

5Ke pela latou mo mouku pakupaku ko agina ne te matagi,

Mafai e afuli latou ne te agelu a te Aliki!

6Ke pouli kae molemole te olotou auala,

i te taimi e ta ei latou ne te agelu a te Aliki!

7Ne 'tao ne latou te malei mo au,

Kae keli foki ne latou te lua 'poko ke to au ki ei

Kae seai eiloa saku mea 'se ne fai.

8Ka oko atu ki a latou te malaia ka koi tuai o iloa ne latou;

Ka 'lave eiloa latou i te olotou malei,

Ka 'to foki eiloa latou ki te lua ne keli ne latou!

9Tena la, e fiafia au ki te Aliki,

Kae lifu foki au me ne fakaola ne ia au.

10Ka faipati atu au ki te Aliki mo toku loto katoatoa,

“E seai eiloa se tino e 'pau mo koe.

E puipui ne koe tino vaivai mai te malosi o tino 'mafi,

Tino ma'tiva mai tino fakasauā.”

11A tino amio ma'sei e molimau 'se ne latou au,

Kae taku 'se foki ne latou au i agasala e se iloa ne au.

12E taui mai ne latou toku 'lei ki te masei,

Ka ko au ko seai eiloa soku fakamoemoega.

13Ka ko te taimi ne ma'saki ei latou,

Au ne pei ki gatu o te fanoanoa;

Ne fakafi'ta toku foitino i te fakalikilikiga;

Kae talo foki au mo toku ulu e punou ki lalo,

14Pela eiloa mō au ma talo mō soku taugasoa io me mo soku taina.

Ne fano sale au mo te fanoanoa,

E pela me se tino e fanoanoa i te mate o tena matua.

15Ne fia'fia katoa latou i te taimi ne puapuagatia ei au,

Kae ne maopoopo mai foki latou ki oku tafa o fakatauemu mai ki a au;

Ne kini au ne tino fakaatea kae ne mau mai faeloa o ta au.

16Ne pula toka mai ki a au, e pela me ne tino e fakalili ki se tino 'pili.

17Te Aliki, e saga mai koe ki a au mafea?

Fakasao mai au mai te olotou faitaua mai;

Fakaola mai au mai leona konei!

18Tena la, au e fakafetai ki a koe i mua o te fakapotopotoga o ou tino,

E viki atu foki au ki a koe i mua o latou katoa.

19 Sala 69.4; Ioa 15.25 Mo a mana tuku mai ne koe oku fili,

Ke kata fakatauemu mai ki toku takavale, i latou ne tino 'lei.

Mo a foki e tuku mai ne koe latou kola e ita tauanoa mai ki a au,

Ke katakata fakatauemu mai ki toku fanoanoa!

20E se faipati latou ki muna fakataugasoa;

Kae 'fatu ne latou a vaega tala 'loi katoa e uiga ki tino ola filemu.

21Ne 'ti mai ne latou te 'se ki a au,

Kae kalaga penei,

“Ne matea ne matou au mea ne fai!”

22Ka ko koe e te Aliki, ko oti ne matea ne koe te mea nei.

Sa nofo 'mu, sa nofo 'mao foki mo au!

23Te Aliki, ala mai o 'pui au;

Toku Atua, tu mai ki luga o fakatonu aka toku fakamasinoga.

24Te Aliki, a koe e amiotonu, tela la fakaasi atu i au e se se;

Toku Atua, sa tuku mai oku fili ke kata fakatauemu mai ki a au.

25Mo a foki ma fai'pati ake latou pela i a latou eiloa,

“Ko takavale a ia i a matou!

Tena fua te mea ne manako matou ki ei!”

26Latou foki kola e kata fakatauemu ki toku puapuaga,

Ke fakatakavale kae ke 'numi olotou mafaufau;

A latou foki kola e fai ake i a latou e sili atu i a au,

Ke fakamasiasigina latou.

27Ka ko latou kola e fia matea ne latou au ke sao mai te fakamasinoga

Ke ka'laga mo te fiafia kae fai ake faeloa penei,

“E sili eiloa te Aliki! Ko fiafia a ia i te manuia o tena tavini.”

28Tela la, ka takutaku atu ne au tou amiotonu,

Kae ka viki atu au ki a koe i te ao katoa.