LUTA 3 - Tuvalu Revised Bible

Ko 'sala te Avaga a Luta

1I te aso e tasi ne faipati atu Naomi ki a Luta penei, “Ka 'sala ne au se avaga ma koe ko te mea ke maua se kaiga mo koe eiloa.

2Masaua ne koe me i a Poasa, ana fafine kola ne galue fakatasi mo koe, se kaiga pili o tatou. Kae nei fakalogo mai. I te afiafi nei ka tuki kalite a ia.

3Tela la, koukou, fakamanogi, ko pei ei ou gatu tafasili i te lei. Ka oti, ko fano ei koe ki te koga tela e tuki kalite ei a ia, kae mo a e iloa ne ia a koe e nofo i kona ke oko eiloa ki te taimi e oti ei a ia ne kai kae inu.

4Ke iloa tonu ne koe te koga e takato ei a ia, kae kafai ko tō tena moe, ko fano ei koe o suke tena sulukafu ko takato ifo ei koe mai lalo i ona vae. Ka taku atu ne ia ki a koe a te mea e 'tau o fai ne koe.”

5Ne tali atu a Luta, “Kafai ne au a mea katoa e fai mai ne koe.”

6Tela, fano ei a Luta ki te koga tela e tuki ei a saito kae ne fai eiloa ne ia a mea e pela mo te fakatonuga a te matua o tena avaga.

7I te otiga a Poasa ne kai kae inu ko maua ei ne ia te loto fiafia. Fano ei a ia ki te fakaputuga saito o takato o moe. Ne tolotolo malie atu a Luta, suke te sulukafu kae takato ifo mai lalo i ona vae.

8Ne ala aka Poasa i te valuapo, fuli ki te sua feitu, kae poi i te fafine e takato fua i ona tafa.

9Ne fesili atu Poasa ki a ia, “Ko oi tou igoa?”

Ne tali mai a ia, “Tou malu, au ko Luta. Ona ko koe se kaiga pili, ko tou tiute o tausi au. Tela la, fakamolemole ke avaga taua.”

10Muna Poasa, “Ke fakamanuia te Aliki ki a koe! A te mea ko fai nei ne koe ko te fakaasiga o tou loto fai kaiga fakamaoni tela ko sili atu i lo te mea ko oti ne fai ne koe ki te matua o tau avaga. Ne 'tau o sala ne koe se tamataene, me maumea io me mativa, kae seki fai ne koe te mea tena.

11Nei la, sa pole tou loto e Luta. Kafai ne au a mea katoa e fakamolemole mai ei koe. E pela mo te iloa ne tino i te fa'kai, a koe se fafine lei.

12Luta 2.20 E tonu me i a au se kaiga pili kae ko toku tiute foki o tausi a koe, kae isi se tino e kaiga pili atu ki a koe i lo au nei.

13Nofo i konei i te po nei, kae i te aso taeao ka sala ne matou te tino tena. Kafai e tausi ne ia koe, ko oko loa te lei, kae kafai e se manako ki a koe, e tauto atu au i mua o te Atua ola me ka fai eiloa toku tiute o tausi koe. Tela la, moe ki lalo ke oko eiloa ki te ao.”

14Tela ne takato ifo ei a Luta i vae o Poasa, kae ne ala ake a ia koi tai pouli i a ia ma lavea ne tino, me i a Poasa e se manako ke iloa ne so se tino i a ia ne moe i kona.

15Ne fai atu Poasa ki a ia penei, “Tapale tou gatu loa kae fola ki lalo.” Ne fakalogo a ia ki ei, ligi ei ne Poasa a kalite ki ei tela ne tai maua eiloa te luasefulu kilokalame te mafa, fesoasoani atu foki a ia o sau ki tuauma o Luta. Tena, foki atu ei a ia ki te fa'kai mo tena amoga.

16I te taimi ne oko atu ei a Luta ki te fale, ne fesili atu Naomi ki a ia penei, “E a taku tama, e manuia tau fanoga?”

Ne taku atu ne Luta ki a ia a mea katoa ne fai ne Poasa mō ia.

17Muna a Luta, “A Poasa ne fai mai ki a au me se tau mo au o vau ki a koe kae seai se mea e puke mai i toku lima, tela tuku mai ei ne ia a kalite katoa konei ki a au.”

18Faipati atu ei Naomi ki a ia, “Ke toka tou loto e Luta, ke oko eiloa ki te aso ka lavea ei ne koe te ikuga o te mea tenei. Ka se manava eiloa a Poasa i te aso nei ke oko ki te taimi ka tokaga malie ei a te mea tena ne fakatoka ne ia.”