1 SAMUELU 11 - Tuvalu Revised Bible

Ko Fakatakavale ne Saulo a Tino Amoni

1Kaati se masina la e tasi mai tua ifo, kae vau a te Tupu o Amoni ko Nahasa mo tena kautau ki te fa'kai o iapese i te laukele o Kileata, tena puke eiloa ne ia. Ne fai atu a tagata o iapese ki a Nahasa penei, “Vau ke fai se feagaiga i te va o tatou, kae ka talia ne matou a koe ke fai mo takitaki o matou.”

2Ne tali mai Nahasa, “E fai ne au se feagaiga manafai e talia ne koutou ke fai ne au te mea tenei: ke kape a kano mata o mata fakaatamai o koutou katoa ke aumai ei te masiasi ki luga i Isalaelu.”

3Ne fai atu a takitaki o Iapese penei, “Tuku mai e fitu aso ke uga aka omotou avefekau ki tino Isalaelu katoa. Kafai e seai se tino e fia vau o fesoasoani mai ki a matou, ko talia ei ne matou te motou takavale.”

4Ne oko atu a avefekau ki Kipea, te koga e nofo ei a Saulo, kae i te fakamatala atuga ne latou te fekau ko tino eiloa ko tagi i te alofa.

5A Saulo ko fatoa oko atu eiloa mai tena fatoaga mo tena pulumakau, kae ne fesili atu a ia penei, “Se a te mea e tupu? Ai a e tagi ei a tino?” Tena, ne fakaasi atu ei ne latou ki a ia a te fekau ne o'mai mo avefekau mai i Iapese.

6I te logoga o Saulo i te mea tena, ne ulufia a ia ne te agaga o te Atua, tena ne kaitaua ei a ia.

7Ne puke aka ne Saulo e lua pulumakau, katikati ki potumea, kae uga atu ne ia a avefekau i loto i Isalaelu katoa ke tufa atu a potumea kona, kae ke fakailoa atu foki ki tino a te fekau tenei: “So se tino e se tautali atu i a Saulo mo Samuelu ki te taua, ka katikati pena ana pulumakau!”

Ne mataku a tino Isalaelu i te Aliki, tena ne o'mai katoa te fenua kātoa seai se tino ne galo.

8Ne fakamaopoopo latou ne Saulo i Peseka; e tusa mo te toluselauafe tino mai Isalaelu, kae tolusefulu afe mai Iuta.

9Ne fai atu a tino Isalaelu ki avefekau mai iapese penei, “Fai atu ki te otou fenua, me koi tuai o oko ki te tutonu i te aso taeao, kae ko oko atu te fakaolataga ki a koutou.” I te 'logoga o tino Iapese i te mea tena, ne fiafia malosi ei latou

10kae fai atu ki a Nahasa penei, “Taeao ko talia ei ne matou te motou takavale, ko pule ei koe i te mea e fai ne koe ki a matou.”

11I te taeao malu o te sua aso, ne vaevae ne Saulo tena kau ki potukau e tolu, kae i te vaveao, ne tele atu latou ki te koga e nofo ei te fili, taua atu eiloa ki tino Amoni. E oko atu ki te tutonu ka ko tafola valevale te kau Amoni. A tino o latou kola koi ola ko fakatau tele ke sao latou.

12Tena ne fai atu ei a tino Isalaelu ki a Samuelu penei, “Ko fea a tino kola e fai pela i a Saulo e se tau o fai mo tupu o tatou? Puke mai ke tamate!”

13Ka ko Saulo ne fai atu penei, “E seai se tino e tau o tamate i te aso nei, me e tenei te aso ne fakasao ei ne te Aliki a Isalaelu.”

14Ne fai atu foki a Samuelu ki a latou penei, “Tatou ka olo ki Kilikala o toe fai a Saulo mo tupu.”

15Tena ne olo katoa atu latou ki Kilikala, fai ei ne latou a Saulo mo tupu i te koga tapu. Ne ofo ne latou ne taulaga fakafetai, kae fakamanatu foki ne latou katoa, ko Saulo mo te fenua katoa, a te tulaga tupu o Saulo.