IELEMIA 5 - Tuvalu Revised Bible

Ko te Agasala a Ielusalema

1Tino Ielusalema, 'tele i loto i auala o te otou fa'kai!

'Kilo aka ki otou feitu! 'Kilo ke lavea ne koutou!

Olo o salasala i te maketi!

E mafai o maua ne koutou se tino e tokotasi

Tela e amiotonu kae taumafai o fakamaoni ki te Atua?

Kafai e mafai o maua ne koutou se tino penā

Kae ka fakamagalo ne te Aliki a Ielusalema.

2E ui eiloa e fai ake koutou pela i a koutou e tapuaki ki te Aliki,

Kae e se fakauiga lele eiloa ne koutou otou pati kona e fai.

3A te Aliki e kilokilo eiloa ki tino fakamaoni.

Ne fakasala ne ia koutou, kae e se fia 'saga mai lele eiloa koutou;

Ne 'ta ne Ia koutou, kae e se 'saga lele eiloa koutou o 'fuli otou uiga.

A koutou ne loto ma'keke kae se fia fulitua atu ki otou agasala.

4Tena la, ne mafaufau aka au penei, “A tino nei

Ne tino ma'tiva fua kae se iloa se mea.

E amio se 'tau;

E se iloa ne latou a te mea e manako ki ei te lotou Atua,

Te mea e manako te Aliki ke fai ne latou.

5Au ka fanatu ki tino o toku fenua i toku 'mana,

O faipati ki a latou.

E 'tau eiloa o iloa ne latou a te mea e manako ki ei te lotou Atua,

Te mea e manako te Aliki ke fai ne latou.”

Ka ko 'teke ne latou katoa a te pule a te Aliki,

Kae ita ma faka'logo ki a Ia.

6Tena te pogai ka 'ta ei latou ne leona mai i te vao;

Ka sae'sae likiliki latou ne kuli vao mai i te toafa,

Ka ko lepoti ka olo sale fua i loto i olotou fa'kai.

Kafai e olo ki tua a tino kona mai i olotou fa'kai,

Kae ka sae'sae likiliki ne manu fe'kai

Me ko to uke olotou agasala,

Kae ko to fulitua 'soko atu ki te Atua.

7Ne fesili mai te Aliki penei, “Ai a ka fakamagalo ei ne au a agasala a toku fenua?

Ne tiakina ne latou a au,

Kae tapuaki atu ki atua kola e se ne atua 'tonu.

Ne fagai ne au oku tino ke ma'kona,

Kae ne fai eiloa ne latou te agasala ko te mulilua

O fakaaoga olotou taimi o 'nofo sale mo fafine tali tagata.

8E pela latou me ne solofanua vao kola e 'kai makona, kae 'fonu i manakoga ma'sei;

Ko fakatau ma'nako ki avaga a olotou tuakoi.

9Ko 'tau o fakasala ne au a latou,

Kae taui atu ki a latou e tusa eiloa mo olotou amioga ma'sei ne fai.

10Ka uga atu ne au a te fili ke katikati ki lalo a togavine a oku tino,

Kae ke se fakama'sei katoatoa.

Ka fai au ki a latou ke 'kati ki lalo a kaula,

Me i kaula kona e se aku.

11A tino Isalaelu mo Iuta ne fakatogafiti ne latou a au.

Ko au, te Aliki, tena ne faipati atu.”

Te Aliki ko Ita ki a Isalaelu

12A te fenua o te Aliki ne taku fakaseaoga ne latou a te Aliki kae fai aka penei, “E se mafai eiloa ne Ia o fai se mea pena ki a tatou. E seai ne fakalavelave e oko ki a tatou, seai ne taua, seai foki ne oge.”

13-14Ne fai olotou pati i pelofeta e pela fua me ne taga e 'fonu i matagi, kae e seai foki ne fekau e maua ne latou mai i te Aliki. A te Aliki te Atua Malosi ne fai mai ki a au penei, “Ielemia, ona ko tino konei ne faipati fakamatamata, tela la, ka fai ne au aku muna ke pela me se afi i tou gutu. A tino ka pela me ne fafie, kae ka 'sunu latou ne te afi.”

15Tino Isalaelu, a te Aliki ka aumai ne Ia se malo mai i se koga 'mao o 'ta koutou. Se malo taumua kae malosi, ka ko te 'gana a latou e se iloa ne koutou.

16A olotou tino 'poto i te sana ne sotia ma'losi kae e 'ta ne latou a tino mo te se a'lofa.

17Ka 'kai ne latou otou lakau kaina mo otou meakai; ka tamate ne latou otou tama tagata mo tama fafine. Ka 'ta valevale ne latou otou lafu mamoe mo lafu pulumakau kae ofa fakama'sei otou vine mo mati. A fa'kai kola ne puipui fakamalosi ne koutou, kola e fakatuaga koutou ki ei ka ofa katoa ne te lotou kautau.

18Muna a te Aliki, “Kae e ui eiloa i mea kona ne 'tupu i aso kona, kae e se 'ta fakapalele eiloa ne au a tino o toku fenua.

19Kafai e fesili mai me ai a ne fai ei ne au a mea katoa kona, fai ki ei e Ielemia, me e pela eiloa mo te fulituaga a latou ki a au o tavini atu ki atua fakaatea i te lotou fenua, ka pena foki nei latou me ka tavini atu ki tino fakaatea i se fenua fakaatea.”

Ko Polopoloki ne te Atua a Tena Fenua

20Muna a te Aliki, “Fai atu ki te gafa o Iakopo, pela foki ki tino Iuta:

21Isa 6.9,10; Eseki 12.2; Male 8.18Faka'logo mai koutou tino va'lea; e isi ne otou mata kae se ile, e isi ne otou taliga kae se 'logo.

22Iopu 38.8-11 Au ko te Aliki; ai a e se ma'taku mai ei koutou ki a au? Ai a e se pole'pole ei koutou i oku mua? Ne fakatoka ne au te one ke fai mo tuakoi o te tai, se tuakoi tumau tela e se mafai o oko ki ei te 'tai. A te 'tai e gasuesue kae se mafai o sopo atu ke silia mo te tuakoi; a galu e 'gulu kae se mafai o silia i te tuakoi.

23Ka ko koutou, ko oko eiloa i te loto ma'keke kae loto 'teke, kae fulitua mai ki a au.

24E seki mafaufau eiloa koutou o fakaaloalo mai ki a au, me ko au e avatu ne au a vaiua i te 'tau o te uaga muamua mo vaiua i te 'tau o te muakiga, kae avatu foki te 'tau o te katiga o te taukai i tausaga takitasi.

25Ko otou agasala ko ala ei o se maua ne koutou a mea 'lei kona.

26“A tino amio ma'sei e 'nofotasi mo oku tino; e ta'kato i lalo o fakatalitali, e pela me ne tino e 'fola olotou tili o 'po a manu eva. A latou kona ne 'tao olotou malei o faka'lave a tino.

27E pela mo te tino po manu eva e faka'fonu tena lulu ki manu eva, e pena foki latou e faka'fonu olotou fale ki mea ne 'fao ma'lo ne latou mai i nisi tino. Tena te mea e mau'mea ei latou, kae ma'losi.

28Tena foki te mea e 'puta ei latou me e 'kai ma'kona. E seai se gataga o olotou amioga ma'sei. E se fesoasoani ki tama'liki seai ne matua, e se a'lofa foki ki tino puapuagatia.

29“Ko au, te Aliki, ka fakasala ne au a latou ona ko mea kona; ka taui atu ne au ki te malo tenei e tusa eiloa mo ana amioga se lei.

30Ko oko eiloa i te mataga kae fakapoi a te mea tenei ko tupu i te fenua tenei:

31A pelofeta e fai'pati faeloa ki te 'loi; a faitaulaga e fai olotou pulepulega i te fakatonuga a pelofeta, ka ko oku tino e se ita lele eiloa. Se a la te mea ka fai ne latou manafai ko oko mai te ikuga?”