2 NOFOAIGA TUPU 4 - Tuvalu Revised Bible

Ko Mea mō te Faletapu(1Tupu 7.23-51)

1 Eso 27.1,2 E isi foki se fata-fai-taulaga palasi ne fai Solomona ke faite, e iva mita ona feitu katoa, kae e fa mo te afā mita te maluga.

2Ne fai foki ne ia se tani pukupuku ki palasi, e lua tesimale lua mita te poko, e fa tesimale fa mita mai i te kaugutu ki te sua kaugutu, kae e sefulutolu tesimale lua mita te pukupuku.

3I kaugutu o te tani, i te feitu tafa ki tua; e isi ne laina e lua o mea fakagaligali, sua laina mai i luga ka ko te sua laina mai i lalo. A ata fakagaligali kona, ne ata o pulumakau tagata kola ne lomi ki te foitino o te tani.

4A te tani tena, e na i tua o pulumakau palasi e sefulu lua kola e saga katoa ki tua, e taki tolu i feitu katoa.

5A feitu o te tani e fitusefulu lima milimita te matolu. A ona kaugutu e pela mo kaugutu o se ipu kola e pale ki tua, e pela mo pula o se pula lakau. A mea i loto i te tani e tai maua eiloa se onosefulu afe lita.

6Eso 30.17-21 Ne fai foki ne latou e sefulu pesini, e lima ke tuku i te feitu ki saute o te Faletapu, kae e lima i te feitu ki matu. E fakaaoga a pesini kona mo fulu a kogā manu o manu vae fa kola e sunu mo fai a taulaga. A te vai i te tani lasi e fakaaoga ne faitaulaga mo olotou koukou.

7-8 Eso 25.31-40 Eso 25.23-30 Ne faite foki ne latou e sefulu a tulaga‐moli aulo e pela eiloa mo te ata masani, kae e sefulu taipola. Ne tuku mea kona i te potu lasi o te Faletapu, e lima tulagamoli mo taipola e lima i te feitu e tasi, e pena foki i te sua feitu. Ne faite foki ne latou e selau a pōla aulo.

9Ne faite ne latou se potu fono i loto mō faitaulaga, pela foki se potu pena i tua. A mataloa i te pui i te va o potu fono kona, e teuteu ki te palasi.

10A te tani e fakatu i tafa o te matulimanu o te Faletapu i saute saegala.

11-16Ne faite foki ne Hulamo a ulo, sevolo, mo pōla. Ne palele eiloa a mea kola ne tauto ei a ia ki te Tupu ko Solomona ke faite ne ia mō te Faletapu:

Ko pou e lua,

ko ulupou kola e foliga pela me ne pola i ulu o pou,

ko ata o filifili e 'fili i ulupou kona.

Ko pomekalamite palasi e faselau, e taki luaselau i ulupou takitasi. I te ulupou e tasi, e tusa mo te lua laina, kae e taki selau i te laina e tasi, kae e fakatamilo i ata i luga i ulupou kona. Ko ka e sefulu Ko pesini e sefulu Ko tani Ko pulumakau tagata e sefululua, kola e na ei te tani Ko ulo, sevolo, mo tui A Hulamo, te tufuga poto, ne fai ne ia a mea katoa konei ki palasi malapulapu, e pela eiloa mo te fakatonuga a te Tupu ko Solomona ke fakaaoga i te Faletapu o te Aliki.

17A mea katoa ne faite i te koga e faite ei a mea ki fiti, i te va o Sukota mo Seleta, i te Vanu ko Iolitana.

18Tena la, e uke eiloa a mea ne faite, ko se iloa te mafa o te palasi ko oti ne fakaaoga.

19E isi foki ne mea o te Faletapu ne fai te Tupu ko Solomona ke fai ki te aulo: ko te fata-fai-taulaga, mo te taipola e tuku ei te falaoa tela e ofo atu ki te Atua;

20ko tulaga‐moli mo moli kola ne fai ki te aulo gali, kola e tau o ka i mua o te Potu Tafasili i te Tapu, e pela eiloa mo te ata;

21ko pula lakau fakagaligali, ko moli, mo sikofi;

22ko mea tamate moli, pōla, tīsi mō mea manogi, mo ulo e ave sale i ei a malala ka. A mea katoa kona ne faite ki te tina aulo. A mataloa o te Faletapu kola e tu ki tua, mo mataloa o te Potu Tafasili i te Tapu e ufi ki te aulo.