1 SAMUELU 1 - Tuvalu Revised Bible

Ko Elekana mo tena Kaiga i Sailo

1E isi se tagata toko tasi e igoa ki a Elekana, mai te matakaiga o Efalaima, kae e nofo i te fa'kai foliki o Lama i te fenua mauga o Efalaima. A ia ko te tama tagata a Ieloamo, kae ko te mokopuna o Eliu, kae se tino i te kaiga o Tou, i te kaukaiga o Sufi.

2A Elekana e tokolua ana avaga, ko Hana mo Penina. A Penina e fanafanau ka ko Hana e se fanau.

3I tausaga katoa a Elekana e fano sale faeloa ki Sailo o tapuaki kae ofo ana taulaga ki te Aliki. A faitaulaga a te Aliki i kona ko Hofeni mo Fineaso, kola ko tama tagata a Eli.

4I taimi katoa e ofo atu ei te taulaga a Elekana, e masani sale eiloa o tuku atu ne ia se vaega o te kano manu ki a Penina mo ne vaega takitasi ki ana tama taki tokotasi.

5Kae e tiga eiloa e alofa malosi a ia ki a Hana, e avatu eiloa ne ia ki ei e tasi fua tena vaega, me e taofi ne te Aliki a ia ke se fanau.

6E masani sale Penina o fakalili ne ia a Hana, i te Aliki e se avatu ne ia ne tamaliki ma Hana.

7I tausaga takitasi e tumau eiloa te amioga tena a Penina; i taimi katoa e olo ei latou ki te fale o te Aliki, e faka'Itaita faeloa ne Penina a Hana, tela la, ko tagi sale a Hana kae ko ita foki ma kai.

8E masani o fesili atu sale tena avaga ko Elekana ki a ia penei, “Hana, ai a e tagi ei koe? Ai a e se kai ei koe? Ai a e fanoanoa faeloa ei koe? E a, ko se sili atu au i tou mafaufau i lo te tinogafulu tama tagata konei?”

Ko Hana mo Eli

9-10I te aso e tasi, i te otiga o latou ne kai i te fale o te Aliki i Sailo, ko Hana eiloa ko tu ki luga. Ko oko eiloa i tena fanoanoa, tena ne tagi mautuutu ei a ia kae talo atu ki te Aliki. I te taimi tena, a Eli, te faitaulaga, e sagasaga i tena nofoga i te mataloa.

11

12Ne talo eiloa Hana ki te Aliki i se taimi leva, ka ko Eli e kilokilo eiloa ki ona laugutu.

13A Hana e talo musumusu; ko ona laugutu fua e gasuesue, kae seai se leo e lagona atu. Tena, ne leake nei a Eli i a ia tena e kona,

14fai atu ei a ia ki ei penei, “Fakagata tou kona, kae fakamasala mai tou mafaufau!”

15Ne tali atu a Hana, “Tou malu, au nei se kona. Au seki inu kava! Au e mafatia, kae tenei au ne talo o fakaasi oku puapuaga ki te Aliki.

16Sa manatu pela i a au se fafine fakavalevale. Au ne talo penei me e isi se mea e mafa i toku loto.”

17Tena ne fai atu ei a Eli penei, “Fano mo te filemu, kae ke tuku atu ne te Atua o Isalaelu a te mea ne fakatagi atu koe ki a ia.”

18Ne tali atu Hana penei, “A koe ke alofa mai faeloa ki a au.” Tena ne fanatu ei Hana, te mea eiloa ko kai, kae ko se fanoanoa foki.

Ko te Fanaumaiga o Samuelu mo tena Fakatapuga

19I te tafataeao o te sua aso, ne ala aka Elekana mo tena kaiga, fai te lotou talosaga ki te Aliki, te mea eiloa ko foki atu ki Lama. Ne moe Elekana mo tena avaga ko Hana, tena ne talia ei ne te Aliki tena talo.

20Ne faitama Hana, fanau mai ei ne ia se tamaliki tagata. Ne fakaigoa ne Hana tena tama tagata ko Samuelu, kae fai aka penei, “Au ne fakatagi ki te Aliki, tena ne maua ei ne au te tamaliki tenei.”

21Ko oko mai foki te taimi ko tau ei a Elekana mo tena kaiga o olo atu ki Sailo o ofo atu tena taulaga o te tausaga ki te Aliki, mo te taulaga fakapitoa tela ne tauto a ia ke ofo.

22I te taimi tenei a Hana seki fano. Ne fai atu a ia ki a Elekana penei, “Kafai ko vae te tamaliki tenei mai i te susu, ko ave ei ne au ki te fale o te Aliki ke nofo i ei i tena olaga katoa.”

23Ne tali atu Elekana, “Ko 'lei, fai te mea e fakatau ifo koe e lei; nofo ke oko ki te taimi ko 'vae ei te tamaliki mai te ū. A te Aliki ke fakataunu ne ia tau feagaiga ne fai.” Tena, ne nofo eiloa Hana o tausi tena tama.

24I te taimi ko se ū ei te tamaliki, ne avatu ei a ia ne tena matua ki Sailo, kae ne puke atu foki ne ia se pulumakau ko tolu tausaga, e sefulu kilokalame falaoa, mo te taga e fonu i uaina. Tena avatu ei ne ia Samuelu, ka koi pepe faeloa, ki te fale o te Aliki i Sailo.

25I te otiga ne tamate ne latou te pulumakau, avatu ei ne latou te tamaliki ki a Eli.

26Muna a Hana, “Tou malu, e masaua ne koe au? Au ko te fafine tela ne matea ne koe e tu i konei o talo ki te Aliki.

27Au ne fakatagi ki te Aliki ki se tamaliki ma aku, kae tenei ko oti ne aumai ne ia.

28Tenei la, ko fakatapu ne au a ia ki te Aliki. A ia e a te Aliki i tausaga o tena olaga.” Tena, ne tapuaki atu ei latou ki te Aliki i te koga tena.