IOPU 11 - Tuvalu Revised Bible

Sofala

1-2E a, e seai se tino e tali mai ki muna se aoga konei?

E a, e mata e fakasao te tino ne ana muna e uke?

3Iopu, a koe e mafaufau me e se mafai ne matou o tali au pati kona e fai?

I tau fakatau, ka se maua ne matou o tali ki au muna fakaosooso kona?

4E talitonu koe i au muna e fai e tonu katoa;

E fai ake koe i a koe e se 'se i mua o te Atua.

5Aku muna eiloa ke tali mai te Atua ki au pati kona e fai!

6Ka fai mai a ia me e uke a feitū o te poto;

E isi ne mea e se oko ki ei te mafaufau o te tagata.

A te fakasalaga o koe ne te Atua ko to foliki, ne tau o lasi atu.

7E a, e mafai ne koe o iloa te tuakoi o te mana mo te takutakua o te Atua?

8A te lagi e se ko te gataga o te Atua, kae e se oko foki koe ki ei.

A te Atua e iloa ne ia te lalolagi o tino mate,

Ka ko koe, e se iloa ne koe.

9A te takutakua o te Atua e lasi atu i te lalolagi,

Kae lauefa atu i te tai.

10Kafai e puke fakapagota koe ne te Atua,

Kae aumai koe ki te fono,

Ko oi te tino e mafai ne ia o taofi te Atua?

11E iloa ne te Atua a tagata se aoga;

E lavea fakalei eiloa ne ia olotou amioga masei katoa.

12A tagata valea ka kamata o poto,

E pela mo asini vao ka kamata foki o lata.

13Iopu, ke toka tou loto, Kalaga atu ki te Atua.

14Ave keatea te masei mo te agasala mai i tou fale.

15Tena, ko toe taumafai ei koe o saga mai ki te lalolagi tenei e ola tatou i ei, kae ke toa tou loto.

16Tena la, ka se mafaufau koe ki ou fakalavelave,

E pela mo lofiaga ko 'teka kola ko se toe masaua atu.

17A tou olaga ka maina atu i lo te mainaga o te la i te tutonu;

Ka ko itula pouli eiloa o tou olaga ka maina e pela me se vaveao.

18Ka ola koe mo te saogalemu, kae fonu i te fakamoemoega lei;

Ka tausi koe ne te Atua, kae avatu ki a koe te filemu.

19Ka se toe mataku koe i ou fili; ka tokouke tino ka o'mai ki a koe mo se fesoasoani.

20Ka ko tino masei ka kilo aka ki olotou feitu mo te fanoanoa, me ko seai se auala e 'sao ei latou.

Ko te fakamoemoega e tasi o latou, ko latou ke na mate.