1Taku pele, ko se fakatau eiloa tou taulekaleka!
A tou alofa ko maina mai mai ou mata, mai tua o tou veli.
A ou laulu ko saka'saka fua, e pela me se lafu kouti e teka'teka ifo mai koga maluga o Kileata.
2A ou nifo ko kena eiloa pela me ne mamoe kola ko fatoa oti ne vele kae mulu faka'ma.
E seai eiloa se nifo e galo,
Kae ko oko eiloa i te tu 'lei.
3A ou laugutu e pela me se lipine lanu kulakula;
Ko oko eiloa i te gali mafai e faipati koe.
A ou kalafau ko malapu'lapu faka eiloa i tua o tou veli.
4A tou ua e pela mo te taoa o Tavita,
E pukupuku kae maniania,
Kae mau i ei a te malele, e pela me e tautau i ei ne talita e afe.
5A ou u e pela me ne kasele,
E pela me se masaga tia e kaikai i te va o lili.
6Au ka nofo i luga i te koga maluga o mulo,
Te koga maluga o mea ma'nogi,
Ke oko ki te taimi e agi mai ei te matagi o te vaveao kae matafi atu mo te pouliga.
7Taku pele, ko se fakatau mai eiloa tou gali;
Ko oko eiloa i te tugamalie o tou foitino!
8Taku avaga, tautali mai i au mai Mauga o Lepanona,
Vau i a taua ka olo keatea mai Lepanona.
Vau ki lalo mai te ulu o te Mauga o Amana,
Mai te Mauga o Senila mo te Mauga o Helemoni,
Te koga e nofo ei a leona mo lepoti.
9Taku pele, taku avaga, au ka kilo ki ou mata,
Mo te malele i tou ua ko tosina katoatoa i ei toku loto.
10Taku pele, taku avaga, a tou alofa e fakafiafia ki a au.
A tou alofa e sili atu i te uaina;
A tou sausau e manogi atu i so se mea fakamanogi.
11Taku pele, ou laugutu e magalo pela me se hani,
A tou alelo e pela me se susu mo te hani ki a au,
A ou gatu e katoatoa i ei a manogi katoa o Lepanona.
12Taku pele, taku avaga, a koe e pela me se fatoaga funa,
Se fatoaga e fai ona 'pui, se vaipuna e se iloa ne tino;
13I kona, e ola 'lei ei a lakau.
E ola pela me se fatoaga e ola ei a lakau ko pomekalanite,
Kae fua mai i ei a fuataga tafasili i te gali.
E isi foki i ei ne lakau manogi e igoa ko hena, nati,
14Mo safaloni, mo kalamusi mo kinamoni mo nisi vaega mea ma'nogi valevale.
A mulo mo aloe e ola foki i kona mo sausau ma'nogi katoa.
15E isi se vaipuna e fakasusu ei a te fatoaga tena,
Se vai e tafe mai, mai luga i Mauga o Lepanona.
Ko muna a te Fafine16Te Matagi mai Matu, ala mai ki luga.
Te Matagi mai Saute, agi mai ki taku fatoaga ke fonu te ea i te manogi.
A taku pele ke vau ki tena fatoaga o kai a fuaga tafasili eiloa i te 'lei i ei.
Who We AreWhat We EelieveWhat We Do
2025 by iamachristian.org,Inc All rights reserved.
