KALATIA Fakatomuaga - Tuvalu Revised Bible

FakatomuagaKae ko kamata o talai a te tala lei e uiga ki a Iesu, kae ne taliagina ne tino kola e seai ne tino Iutaia, ko te fesili ne sae ake i te vaitaimi tena, me tau mo te tino o tautali ki te Tulafono a Mose, ko te mea ke fai a ia mo Kelisiano patonu. A Paulo ne kinau mo te manatu tenei, ana muna me e se tonu te manatu tena — kae ko te tonuga, a te olaga e fakavae i luga o te fakatuanaki ki a Keliso, tela e mafai ei a tino katoa o faka'lei mo te Atua. Kae mai i loto o Ekalesia i Kalatia, te itu malo o Loma i Asia foliki, ne aumai ei a tino kola e 'teke ki a Paulo kae e molimau ne latou, me i te tino e 'tau eiloa o tautali i Tulafono a Mose, ko te mea ke mafai a ia o faka'lei mo te Atua. Te Tusi a Paulo ki tino Kalatia ne tusi ko te mea ke toe faka'foki mai, ki te fakatuanakiga tonu mo faifaiga a latou kola ne taki 'segina ne akoakoga se tonu. A Paulo ne kamata o puipui, a tena saolotoga ke fakaigoa a ia me se apositolo a Iesu Keliso. E fakapatonu ne ia me i tena kalagagina ke fai mo apositolo ne aumai eiloa mai i te Atua, kae ne seki aumai i se malosi faka te tagata, kae ko tena misiona e fakapitoa eiloa mo latou kola e se ne tino Iutaia. Tena ne fakatupu ei ne ia se manatu, me ko te fakatuanaki eiloa e faka'lei ei a tino mo te Atua. I te fakaotiga o mataupu ne fakaasi ne Paulo me i faifaiga faka-kelisiano, e tafe eiloa mai te alofa tela ko te ikuga o te fakatuanaki ia Keliso.Ko Fakasologa o MataupuKo te fakatomuaga (1.1-10)Malosi o Paulo pela me se apositolo (1.11—2.21)Tala 'lei o te alofa tauanoa o te Atua (3.1—4.31)Saolotoga mo tiute ote Kelisiano (5.1—6.10)Fakaotiga (6.11-18)