SALAMO 49 - Tuvalu Revised Bible

Te Valea o te Fakalagolago ki te Maumea

1Tino katoa, faka'logo mai! Tino katoa i koga valevale,

Faka'logo mai,

2Tino ma'luga mo tino ma'lalo, tino maumea mo tino ma'tiva.

3A oku mafaufauga e 'loto; ka faipati foki au ki muna o te poto.

4Ka mafaufau malosi au ki muna fakatusa,

Kae fakamatala olotou uiga i te taimi e tātā ei au i te kitala.

5Au e se mataku i taimi o puapuaga,

Mafai e nikoi au ne oku fili,

6Ne tino ma'sei kola e fakalagolago ki te lotou maumea,

Kae e fakamata'mata foki i te lasi o te olotou maumea.

7E se mafai lele eiloa ne te tagata o fakaola a ia,

E se mafai foki ne ia o togi atu ki te Atua te togi o tena ola,

8Me i te togi o te ola o te tino ko to lasi.

A te mea e mafai ne ia o 'togi e se taitai eiloa o lava,

9Mo ona sao mai te tanuga,

Mo ona ola foki ki te se gata mai.

10E iloa ne so se tino me i tino poto e mate foki

E pela eiloa mo tino va'lea mo tino fakasupasupa.

E tuku katoa ne latou olotou koloa ki olotou fanau.

11A tanuga o latou, ko olotou fale kona ki te se gata mai;

E nofo latou i kona i taimi katoa,

Kae tela la, ne isi eiloa ne olotou manafa totino i aso ne ola ei latou.

12E se mafai ne te malosi o te tagata o fakasao a ia mai te mate;

Ka mate eiloa a ia e pela mo manu.

13Kilo mai ki te mea e tupu ki a latou kola e fakalagolago ki a latou eiloa,

'Kilo mai ki te ikuga o latou kola ko lotoma'lie i te lotou maumea,

14Ko oti ne fakamalaia a latou ke 'mate e pela mo mamoe,

Kae ka fai te Mate mo tausi mamoe o latou.

Ka manumalo a tino amiotonu i a latou,

Me ka vave 'pala olotou foitino i te fenua o tino 'mate,

E 'mao mai i olotou kaiga!

15Ka ko te Atua ka fakasao ne ia a au;

Ka fakasao ne ia a au mai te malosi o te mate.

16Sa ita manafai e maukoloa se tino,

Ma fai foki e gasolo ake loa o uke ana koloa;

17Me e se mafai ne ia o fano mo ana koloa ma fai e mate a ia,

E se tau'tali atu i a ia ana koloa ki lalo i te tanuga.

18E ui eiloa e lotomalie se tino i te olaga tenei

Kae vikia foki a ia i tena manuia,

19E kau fakatasi atu eiloa a ia ki ona tupuna i te taimi e mate ei a ia

i te koga tela e tumau faeloa i ei te pouliga ki te se gata mai.

20E se mafai ne te malosi o te tagata o fakasao a ia mai te mate;

E mate eiloa a ia e pela mo manu.