IAKOPO 4 - Tuvalu Revised Bible

Ko te Fakataugasoa ki te Lalolagi

1E 'tupu mai i fea a taua mo kinauga i a koutou? E 'tupu mai i otou manakoga faka te foitino, kola e taua faeloa i loto i a koutou.

2E ma'nako koutou ki mea, kae se maua ne koutou, tena te mea ko fia tatino ei koutou; e kaima'nako koutou ki mea a nisi tino, kae se mafai eiloa o maua ne koutou, tena la te mea e kinau ei koutou kae taua. E se mafai o maua ne koutou a mea e manako koutou ki ei, i te mea e se fakatagi atu koutou ki te Atua mō mea kona.

3Kae kafai foki e fakatagi atu koutou, e se maua ne koutou, i te mea e fakatagi atu koutou i auala 'se, me fia fakaaoga ne koutou a mea kona i otou manakoga.

4Tino se fakamaoni! E se iloa ne koutou i te tino e fai mo taugasoa o te lalolagi, ko te fili tena o te Atua? Tela la, so se tino e manako a ia ke fai mo taugasoa o te lalolagi, ko fai foki ne ia a ia eiloa ke fai mo fili o te Atua.

5Sa mafaufau ake pela me e seai se uiga o muna a te Tusi ne fai mai, “A te agaga tela ne tuku mai ne te Atua ki a tatou, e fonu i manakoga masei.”

6Faata 3.34Ka ko te alofa tauanoa tela ne tuku mai ne ia e sili atu tona malosi. Me ne fai mai te Tusi, “E 'teke ne te Atua a tino fakamata'mata, kae tuku atu ne ia a te alofa tauanoa ki tino loto malalo.”

7Tela la, ke tuku katoatoa atu koutou ki te Atua. 'Teke atu te Tiapolo, ko sola ei a ia keatea mai i a koutou.

8Fakapilipili atu koutou ki te Atua, ko fakapilipili mai ei a ia ki a koutou. Fakagata te fai mea masei e tino agasala! Fakagata te mafaufau ki mea masei e tino fia amiotonu.

9Ke fanoa'noa koutou, ke 'tagi kae 'tagi mautuutu; sui te otou 'kata ki te tagi, ke sui foki te otou fia'fia ki te se fia'fia.

10Ke fakamalalo koutou i mua o te Aliki, ko fakamaluga ei koutou ne ia.

Ko te Akoakoga e 'Teke atu ki te Fakamasinogina o se Taina

11Oku taina, sa fakatau fakamasei i a koutou eiloa. So se tino e fakamasei ne ia tona taina, io me fakamasino ne ia, ko tona uiga ko 'teke a ia ki te Tulafono, kae fakamasino foki ne ia te Tulafono. Kafai e fakamasino ne koe a te Tulafono, ko tona uiga a koe e se se tino e fakalogo ki te Tulafono, kae se tino e fakamasino te Tulafono.

12Ko te Atua fua te fai Tulafono mo te famasino. Ko ia foki eiloa e mafai ne ia o fakasao io me o fakasala. Ko oi eiloa koe, e fakamasino ei ne koe tou tuakoi?

Ko te Akoakoga e 'Teke atu ki te Fakamatamata

13 Faata 27.1 Nei, faka'logo mai ki a au koutou kola e muna ake pela, “Ko te aso nei io me ko a taeao ka olo atu ei tatou ki te sua fa'kai, tela ka 'nofo ei tatou i kona i se tausaga, kae fai ei o'tou pisinisi ke maua mai ei o'tou tupe e uke.”

14E se iloa ne koutou me ne a mea ka 'tupu ki otou olaga i te aso a taeao! Me e pau koutou mo te puao manifinifi e fakatu ake fua pela, ko toe galo ei.

15E 'tau o fai ake koutou pela, “Kafai e loto ki ei te Aliki, ka ola tatou o fai a te mea tenei io me ko te mea tela.”

16Kae nei, ko fakamata'mata koutou mo te fia lavea; a uiga fakamata'mata kona ne mea 'se katoa.

17Tela la, a te tino tela e iloa ne ia a te mea 'lei e 'tau o fai, kae se fai, e agasala a ia.