FAILAUGA 8 - Tuvalu Revised Bible

1Ko te tagata poto fua e mafai o iloa ne ia te uiga o mea. Ko te poto e fai ne ia a te tino tena ke kata kae fai foki ne ia ke se ita.

Fakalogo ki te Tupu

2Fakalogo ki te mea e fai mai ei a te tupu, kae sa sona tauto valevale ki te Atua.

3A te tupu e mafai o fai ne ia so se mea e manako a ia o fai, tela la, fano fakavave keatea mai ona mua; sa nofo leva i se koga fakamataku pena.

4A te tupu e fai ana fakatonuga i a ia e maluga, kae e seai se tino e mafai o teke ki te mea e fai ne ia.

5Kafai koe e fakalogo ki ana fakatonuga ko manuia koe, a te tagata poto e iloa ne ia o fakalogo i te taimi e tau ei a ia o fakalogo.

6E isi eiloa se taimi tonu mo te faiga tonu e fai ei a mea katoa, ka ko te fakalavelave me e foliki te mea e iloa ne tatou!

7E seai se tino i a tatou e iloa ne ia a te mea ka tupu, me e seai foki se tino e fakailoa mai ne ia ki a tatou.

8E seai se tino e mafai o fai a ia ke se mate, io me tolo atu te aso e tau a ia o mate i ei. A te mea tena se fili e se mafai ne tatou o sao mai i ei; e seai se togafiti e mafai ne tatou ke sao tatou mai i ei.

Ko Tino Amio Masei mo Tino Amiotonu

9Ne lavea ne au a mea katoa konei i te taimi ne mafaufau malosi ei au ki mea konei e fai i te lalolagi tenei, te lalolagi tela e isi ne tino e maluga atu i nisi tino, ka ko tino kola e nofo i se tulaga malalo, e nofo puapuaga i te pulega a tino ma'luga.

10E tonu, ko oti ne lavea ne au a tino amio ma'sei e ave o tanu i olotou tanuga, kae kafai ko foki mai a tino i te tanuga o tino ma'sei kona, ko tavae ne latou a tino ma'sei kona i fa'kai foki eiloa kona ne fai ei a amioga ma'sei a latou. E seai se aoga.

11Ai a e fai ei ne tino a amioga se 'lei mo olotou loto katoa? Me e se vave oko mai a te fakasalaga ki tino fai agasala pena.

12A te tino agasala e mafai o fai ne ia ne amioga masei e selau kae e ola faeloa. E tonu, e iloa ne au olotou muna e fai sale penei: “Kafai e fakalogo koe ki te Atua, kae ka tokagamalie tou olaga,

13ka ko tino amio ma'sei ka se 'lei olotou olaga. A te lotou olaga e pela fua me se ata kae ka mate vave latou, me e se fakalogo ki te Atua.”

14A te manatu tena se manatu valea fua. Kiloke ki te mea tenei e tupu i te lalolagi: i nisi taimi a tino amiotonu e fakasala i te fakasalaga e tau o maua ne tino ma'sei, ka ko tino ma'sei e maua ne latou te taui 'lei e tau o maua ne tino amio'tonu, Tela la, e seai se aoga o te olaga.

15Tela la, au e talitonu me e tau eiloa mo te tagata o fakafiafia i te olaga nei, me i te mea fakafiafia e tasi i te olaga nei, tela ko te kai kae inu kae fiafia. E mafai o fai ne ia te mea tena i ana galuega i te olaga tenei ne tuku mai ne te Atua i te lalolagi tenei.

16I te taimi ne taumafai ei au ko au ke poto, kae tauloto a mea e fai i te lalolagi tenei, ne iloa aka ne au me e mafai te tino o pula i po mo ao

17kae e se mafai eiloa o malamalama i mea e fai ne te Atua. Me e pefea eiloa tou taumafai, e se mafai eiloa o iloa ne koe. E isi ne tino poto e fai mai me e iloa ne latou, kae tela la, e se iloa lele eiloa ne latou.