TEUTELONOME 10 - Tuvalu Revised Bible

Ko Toe maua ne Mose a Papa Fatu(Eso 34.1-10)

1“Muna a te Aliki ki a au penei, ‘Kati mai ne papa fatu e lua, e pela mo papa fatu kola muamua, kae faite se pusa lakau mo fao ei a papa fatu kona. Vau ki a au i luga i te mauga,

2kae ka tusi ne au i luga i ei a mea foki kola ne tusi ne au i papa fatu kola ne foa ne koe, ka oti, ko tuku ei ki loto i te pusa.’

3“Tena la, ne faite aka ei ne au te pusa ki te lakau ko te akasia, kae kati aka ne au a fatu e lua ke pela eiloa mo papa fatu kola muamua, fano ei mo au ki luga i te mauga.

4Tena la, ne toetusi ei ne te Aliki a muna kola ne tusi foki ne ia i luga i papa fatu muamua, ko Tulafono e Sefulu kola ne avatu ne ia ki a koutou i te taimi ne faipati mai ei a ia mai i loto i te afi i te aso ne maopoopo ei koutou i te mauga.

5Ne tuku mai ne te Aliki a papa fatu kona, ko au eiloa ko fanaifo ki lalo mai te mauga. Ne tuku ne au a papa fatu kona ki loto i te Pusa, e pela eiloa mo te fakatonuga a te Aliki, kae ne tuku eiloa i kona ke oko mai ki aso nei.”

6 Nume 20.28; 33.38 Ne malaga atu te fenua o Isalaelu mai i te koga e tu ei a vaikeli o tino o Iakana, o olo ki Mosela. Ne mate Alona i kona, tanu foki ei i kona, kae ne sui a ia ne tena tama tagata ko Eleasalo o fai mo faitaulaga.

7Mai i kona ne olo atu latou ki Kutukota, ke oko atu foki eiloa ki Iotapata, se koga e uke te vai i ei.

8Nume 3.5-8 I kona ne filifili ei ne te Aliki a tino o te matakaiga o Levi ke tausi ne latou te Pusa o te Feagaiga, ke fai latou mo faitaulaga a ia, kae ke fakaaoga ne latou tena igoa o fakamanuia a tino. A tiute kona, konei eiloa koi fai ne latou.

9Tena te mea e seai ei se laukele e maua ne te matakaiga o Levi, e pela mo nisi matakaiga; a te mea e maua ne latou ko te tulaga fakaaloalogina, tela ko faitaulaga a te Aliki, e pela eiloa mo te tautoga a te Aliki te otou Atua.

10 Eso 34.28 “Ne nofo au i luga i te mauga i ao mo po e fasefulu, e pela eiloa mo te taimi mua. Ne alofa mai te Aliki o fakalogo mai ki taku fakamolemole ke se 'ta fakapalele koutou.

11Tena, kae fai mai ki a au ke na vau au o taki koutou ke nofo koutou i te fenua tela ne tauto ei a ia ke tuku ki otou tupuga.

Ko te mea e Manako ki ei te Atua

12“Tino Isalaelu, fakalogo mai nei ki te mea e manako ki ei te Aliki te otou Atua ke fai ne koutou: Ke tapuaki atu koutou ki te Aliki, kae fai a mea katoa e fai mai ei a ia. Ke alofa koutou ki a ia, kae ke tavini atu koutou ki a ia mo otou loto katoa,

13kae ke tausi ki ana tulafono. Ko avatu nei ne au ki a koutou i te aso nei mo te 'lei o koutou.

14Ke oko foki eiloa ki te lagi tafasili i te maluga, e o te Aliki; a te lalolagi mo mea katoa i ei e o ia foki.

15Kae ona ko te Aliki e alofa malosi ki otou tupuga, tena ne filifili ei ne ia koutou mai malo katoa, kae nei, a koutou koi fai eiloa mo tino o ia.

16Tela la, mai i te taimi nei, ke fakalogo koutou ki te Aliki kae ke ave keatea te loto makeke.

171Timo 6.15; Faka 17.14; 19.16; Galu 10.34; Loma 2.11; Kala 2.6; Efe 6.9 A te Aliki te otou Atua e sili atu i atua katoa, ke oko foki eiloa ki nisi vaega 'mana faka-te-lalolagi. A ia e tafasili i te maluga kae malosi, tela la, e tau mo koutou o mataku ki a ia. E galo i a ia te loto fakapito, kae e se talia foki ne ia a tino fai meaalofa fakakolekole.

18E onoono fakalei a ia ko tamaliki seai ne matua, mo fafine ko mate olotou avaga, ke fai fakalei ne tino; e alofa a ia ki tino fakaatea kola e nofo tasi mo 'tou tino, kae e tuku atu foki ne ia a meakai mo gatu mo latou.

19Tela la, ke alofa koutou ki tino fakaatea kona e nofo tasi koutou, me i a koutou ne nofo fakaalofa foki i Aikupito.

20Ke fakalogo koutou ki te Aliki te otou Atua, kae tapuaki atu ki a ia eiloa tokotasi. Ke fakamaoni koutou ki a ia kae fai otou feagaiga i tena igoa fua eiloa.

21Viki atu ki a ia, a ia ko te otou Atua, kae ko oti ne lavea ki otou mata a mea fakaofoofogia kola ne fai ne ia mo koutou.

22Kene 46.27; Kene 15.5; 22.17 I te taimi ne olo ei otou tupuga ki Aikupito, a te aofaki o latou e tino fitu fua. Kae nei, a koutou ko oti ne fai ne te Aliki ke pela mo fetu i te lagi i te uke.