TANIELU 6 - Tuvalu Revised Bible

Tanielu i te Lua Leona

1Ne mafaufau Taliu ke fili ne ia se toko selau luasefulu kovana ke pulepule ne latou a kogā koga takitasi o tena malo.

2Ne fili foki ne ia a Tanielu mo te sua tokolua tagata ke fakasoasoa ne latou a kovana, kae ke onoono foki latou ki te 'lei o te tupu.

3Ne vave lavea atu te lei atu o galuega a Tanielu ki nisi kovana pela foki ki te tokolua kola e galue tasi mo ia. Tena la, ne mafaufau aka ei te tupu ke tuku atu ki a Tanielu te pulega o te malo katoa, me i a ia se tagata e tafasili i te poto.

4Ne taumafai a kovana mo tino pulepule o sala se feitu e se lei ei te pulepulega a Tanielu i te malo, kae e seai se mea 'se ne maua ne latou, me i a Tanielu se tagata fai mea mafai, kae e fai mea tonu kae amiotonu.

5Ne fai aka olotou muna penei, “E seai eiloa se mea e mafai o maua ne tatou e fakamasei ei Tanielu, na ko se mea fua e uiga ki tena talitonuga.”

6Tena ne olo atu latou ki te tupu, muna a latou penei, “Tou Malu te Tupu ko Taliu, ke ola loa koe!

7A matou katoa konei e pulepule i tou malo — ko tino pule, ko kovana, ko sui kovana, mo nisi ofisa katoa — ko oti ne tonu i a matou ke fai aka ne koe se fakatonuga kae ke fakasalalau atu ki tino katoa, me i aso e tolusefulu e tapu eiloa se tino e fakamolemole ki se atua io me se isi tino i se mea e manako a ia ki ei, na ki a koe tokotasi eiloa. So se tino e teke ki te fakatonuga tena e pei ki te lua leona.

8Tela la, ke na fai mai nei ne tou malu a te fakatonuga tena, kae ke saina tou igoa i ei ko te mea ke mautakitaki, ke fai mo tulafono tumau ki tino Metai mo tino Pelesia.”

9Tena, ne saina ei ne te Tupu ko Taliu a te fakatonuga tena.

10I te logoga a Tanielu i te fakatonuga ko oti ne saina, tena foki ei a ia ki tena fale. I te potu e tasi i te fogafale lua o tena fale, e isi ne fakamalama i ei e fakasaga ki te fa'kai o Ielusalema. I kona, e pela eiloa mo te masani, ne totuli ifo ei a ia i mua o te fakamalama kae talo atu ki te Atua e fakatolu taimi i te aso.

11I te laveaga a Tanielu ne ona fili, i a ia ko talo ki te Atua,

12ne olo atu ei latou ki te tupu o folafola te mea a Tanielu ne fai. Muna a latou, “Tou Malu, masaua me ne saina ne koe te fakatonuga e fai pela me i aso e tolusefulu, e tapu se tino e toe fakamolemole ki se atua io me se isi tino i se mea e manako a ia ki ei na ki a koe fua eiloa. Te tino e se fakalogo e pei ki te lua leona.”

Ne tali mai te tupu, “E tonu, a te mea tena se fakatonuga malu, se tulafono mō tino Metai mo tino Pelesia tela e se mafai o fuli.”

13Tena, kae fai mai latou ki te tupu penei, “A Tanielu, te tagata Iuta tela ne aumai i te tafeaga, e se fakaava ki Tou Malu o fakalogo ki tau fakatonuga. E talo soko faeloa a ia, e fakatolu taimi i aso katoa.”

14I te lagonaga ne te tupu te mea tena, ko oko eiloa i ana se fiafia, kae ne taumafai eiloa a ia o sala se auala e sao ei Tanielu. Ne taumafai eiloa a ia ke oko eiloa ki te taimi ne to ei te la.

15Ne toe foki mai a fili o Tanielu ki te tupu, kae fai atu penei, “Tou Malu, e iloa lei eiloa ne koe a te tulafono a te kau Metai mo te kau Pelesia, me i so se fakatonuga ne fai ne te tupu e se mafai o fuli.”

16Tena ne fai ei te fakatonuga a te tupu ke puke mai Tanielu, tena pei ei ki loto i te lua leona. Muna a te tupu ki a Tanielu, “A te Atua e tavini fakamaoni koe ki ei ke fakasao ne ia koe.”

17Ne pono te pu o te lua leona ki te fatu, kae ne fakamau atu ne te tupu tena fakailoga mo te fakailoga o ana tino maluga ki te fatu, ke mo a se tino e taumafai o fakasao Tanielu.

18Tena, foki atu ei te tupu ki tena palesi, kae seki moe eiloa i te po katoa tena, seki kai, kae se fiafia foki.

19I te tafataeao, ne tu aka te tupu, fano fakavave eiloa ki te lua.

20I te okoatuga a ia ki kona, ne kalaga atu a ia penei, “Tanielu, te tavini a te Atua ola! E a, ne fakasao eiloa koe ne te Atua tena e tavini koe ki ei mai leona?”

21Ne tali mai Tanielu, “Tou Malu, ke ola loa koe!

22Ne uga mai ne te Atua tena agelu ke pono a gutu o leona ke se mafai ne latou o ta a au. Ne fai ne ia te mea tenei me iloa ne ia i a au se 'se kae seki ai foki saku mea 'se kai fai ki a koe.”

23Ko oko eiloa i te fiafia o te tupu, tena ne fai ei tena fakatonuga ke futi aka Tanielu mai lalo o te lua leona. Ne futi aka ne latou Tanielu ki luga, lavea ei ne latou me e seai eiloa sena pakiaga, me i a ia e talitonu eiloa ki te Atua.

24Tena, kae fai ei mo te fakatonuga a te tupu ke puke mai katoa a tagata kola ne fakamasei ne latou Tanielu, ke pei ki te lua leona fakatasi mo olotou avaga mo tamaliki. E seki pa'tele ki lalo i te lua ka ko puna mai a leona o fatifati valevale olotou ivi.

25Tena ne tusi ei te fakatonuga a te Tupu ko Taliu ki tino o malo katoa i te lalolagi penei:

“Talofa koutou!

26Au ko fakatonu atu ki tino katoa i toku malo ke tau o mataku kae fakaava ki te Atua o Tanielu.

“A ia se Atua e ola,

Kae ka pule a ia ki te se gata mai.

A tena malo ka se mafai o maofa,

Mo tena malosi e se mafai o gata.

27E fakasao kae fakaola ne ia a tino,

E fai ne ia a vavega mo mea fakaofoofogia i te lagi mo te lalolagi.

Ne fakasao ne ia Tanielu mai gutu o leona.”

28A Tanielu ne ola manuia i te nofoaiga a Taliu mo te nofoaiga a Kulesa te Pelesia.