TEUTELONOME 9 - Tuvalu Revised Bible

Ko te se Fakalogo o Tino Isalaelu

1“Fakalogo mai koutou tino Isalaelu! I te aso nei a koutou ka olo atu ki te sua feitu o te Vaitafe o Iolitana o nofo i te fenua tela ne nofo ei a malo e malosi atu i a koutou. A olotou fa'kai e lasi, mo pui e se fakatau eiloa i te maluga.

2A tino foki o fa'kai ne tino e loa kae mafi. A tino kona ne toa, kae ko oti foki koutou ne logo me e seai eiloa se potukau e mafai o fakatakavale ne latou a toa kona.

3Kae nei, ka lavea ne koutou a te Aliki te otou Atua ka fano i otou mua e pela me se afi fakamataku. Ka fakatakavale ne ia latou i te taimi e olo atu ei koutou, kae ka afuli foki ne koutou kae 'ta valevale ne koutou, e pela eiloa mo tena tautoga.

4“Kafai ko oti ne afuli keatea ne te Aliki a tino kona e nofo i te fenua tena ka olo koutou ki ei, masaua o sa fai pela me ne afuli ne ia a tino kona me i a ia e alofa ki a koutou. A tino kona ne afuli keatea ne te Aliki me ne tino amio masei.

5E se fai pela ona ko koutou ne tino amiotonu kae fai meatonu tena ne ala ei o afuli keatea ne ia a tino kona ke olo atu koutou o nofo i te lotou fenua. Ka afuli ne ia a tino kona me ne tino amio masei, kae ke fakataunu foki tena tautoga ne fai ki otou tupuga ko Apelaamo, Isaako mo Iakopo.

6E tau o iloa tonu nei ne koutou i te fenua laukele ola tenei ka avatu ne te Aliki mo koutou, e se fai pela e avatu ne ia e pogai i uiga 'lei o koutou. Ikai, a koutou ne tino loto makeke, e seki 'tau lele eiloa o maua ne koutou a te fenua tena, i a koutou ne tino masei.

7“E masaua ne koutou te faiga ne koutou a te Aliki te otou Atua ke kaitaua i aso ne nofo ei koutou i te vao? Talu mai te aso ne tiaki ei ne koutou a te fenua o Aikupito ke oko mai ki te aso ne oko mai ei koutou ki konei, a koutou ne teke faeloa ki te Aliki.

8Ke oko foki eiloa ki te taimi ne nofo ei koutou i te Mauga o Sinai, ne fai foki ne koutou te Aliki ke kaitaua, tena ne 'ta fakapalele ei ne ia a nisi o koutou.

9Eso 24.18 Au ne fanake ki luga i te Mauga o puke mai a papa fatu kola e tusi ei a te feagaiga a te Aliki ne fai mo koutou. Au ne nofo i kona e fasefulu ao fasefulu po, kae seki kai seki inu eiloa.

10Tena, kae tuku mai ne te Aliki ki a au a papa fatu e lua kola ne tusi ne ia i ei a muna kola ne faipati atu ne ia mai i te afi i te taimi ne maopoopo ei koutou i lalo o te mauga.

11E tonu eiloa, i te katoaga o ao mo po kola e fasefulu, tena kae tuku mai ei ne te Aliki ki a au a papa fatu kola e lua kola e tusi ei a te feagaiga.

12“Tena, kae fai mai te Aliki ki a au penei, ‘Foki fakavave nei ki lalo, me i tino o tou fenua kola ne taki mai ne koe mai Aikupito ko fai a vaega amioga masei valevale. Ko fulitua mai latou ki mea ne fakatonu atu ne au ke fai ne latou, kae ko oti foki ne faite ne latou se tupua e fai tapuakiga ki ei latou.’

13“A te Aliki ne fai mai foki ki a au penei, ‘E iloa ne au te makeke o loto o tino konei.

14Sa taumafai o taofi mai te mea tenei ka fai ne au ki a latou. Au ko mafaufau ke 'ta fakapalele ko te mea ke se toe ai se tino e manatua ne ia latou. Tena, kae ka fai ne au a koe mo tupuga o se malo e lasi kae malosi atu i a latou.’

15“Ne fanaifo au mai luga o te mauga, mo papa fatu kona e lua e pukepuke i oku lima, kola e tusi ei a te feagaiga. A ulaga afi e o'mai mai i te mauga.

16Ne lavea ne au i a koutou ko se tausi ki fakatonuga kola ne avatu ne te Aliki te otou Atua ki a koutou, kae ko agasala foki koutou me ne faite ne koutou se tupua fiti e foliga ki se pulumakau.

17Tena, ne pei ei ne au a papa fatu i otou mua, tena ne maofa likiliki ei.

18Ne toe takato fakafaō ei au i mua o te Aliki i ao mo po e fasefulu, seki kai seki inu foki. Ne fai ne au te mea tena i a koutou ne agasala ki te Aliki kae fai ne koutou ke kaitaua.

19Epe 12.21 Au ne mataku i te Aliki ko oko eiloa i te kaitaua kae ko mafaufau ke tamate katoa koutou, kae fakafetai me ne toe alofa mai te Aliki ki a au o fakalogo mai ki taku fakatagi mo koutou.

20A te Aliki ko oko foki eiloa i tena kaitaua ki a Alona kae ne fai o tamate ne ia; tena ne talo foki au mo Alona i te taimi foki tena.

21Ne puke ne au a te pulumakau fiti tena ne faite ne koutou, kae pei ki loto i te afi. Ne ofa likiliki ne au, kae tuki ke liu pauta, pei ei ne au ki loto i te vaitafe foliki tela e tafe ifo mai luga i te mauga.

22 Nume 11.3; Eso 17.7; “Ne fai foki ne koutou a te Aliki te otou Atua ke kaitaua i te taimi ne nofo ei koutou i Tapela, Mase mo Kipelota Hatava.

23Nume 13.17; Teu 1.21; Nume 13.31; Teu 1.26; Epe 3.16 I te taimi foki ne uga atu ei ne ia koutou mai Katesa Paenea mo te fakatonuga ke olo koutou o puke a te fenua tela e fai o avatu mo koutou, ka ko koutou ne teke ki a ia; e seki talitonu koutou ki a ia, seki fakalogo foki koutou ki tena fakatonuga.

24Talu mai te taimi ne iloa ei ne au a koutou, a koutou e teke faeloa ki te Aliki.

25“Tena la, ne takato fakafaō au i mua o te Aliki i ao mo po kona e fasefulu, me e iloa ne au me ko iku i a ia ke 'ta fakapalele ne ia koutou.

26Tena ne talo ei au penei, ‘Te Aliki Tafasili i te Maluga, fakamolemole sa tamategina a ou tino kola ne fakasao ne koe mai Aikupito i tou mana malosi.

27Masaua au tavini ko Apelaamo, Isaako mo Iakopo, kae sa saga ki te loto makeke mo te amio masei mo te fai agasala a tino o tou fenua.

28Kafai e 'ta ne koe a tino o tou fenua, kae ka fai aka pela a tino o Aikupito me e se mafai ne koe o ave tou fenua ki te fenua ne tauto koe ka ave ki ei latou. Ka fai aka latou pela me ne ave fua ne koe tou fenua o tamate i te vao me i a koe e takalialia i a latou.

29A tino konei ko tino ne filifili ne koe ke fai mo tino o tou fenua, kae ne aumai ne koe latou keatea mai Aikupito i tou mana malosi.’