GALUEGA 22 - Tuvalu Revised Bible

1“Oku taina mo oku tamana, faka'logo mai ke fai atu aku fakasako, e sao au i ei!”

2I te lagonaga ne latou a ia e faipati faka‐Epelu, ko na filemu ake ei latou, tela fakasako atu ei Paulo:

3 Galu 5.34-39 “Au se Iutaia, ne fanau i Taso i Kilikia. Ne tupu ake au i konei i Ielusalema, kae ne akoga au i te akoga a Kamalielu. Ne akoako faka'lei foki au i Tulafono a o'tou tupuga. Ne fakatapu foki au mo te Atua pena mō koutou i konei i te aso nei.

4Galu 8.3; 26.9-11Au ne fakasaua ki tino ne tau'tali i te Ala Tonu. Ne saisai ne au a tagata mo fafine, kae laku ki te fale puipui.

5E fakamaoni mai i te mea tena ne te Faitaulaga Pule mo te Fono katoa, me tonu eiloa au. Ne maua ne au a tusi mai i a latou ke ave ki taina o tatou i Tamaseko, tela, fano ei au o saisai mai a tino konei, kae aumai ki Ielusalema o fakasala.”

Ko Fakamatala atu ne Paulo Tena Fuliga(Galu 9.1-19; 26.12-18)

6“I taku piliatuga ki Tamaseko, ko pili ki te tutonu, kae fakapulele mai a te mainaga mai te lagi o nikoi au.

7Ne siga au ki lalo, kae lagona ne au a te leo e kalaga ki a au, ‘Saulo, Saulo! Ai a e fakasaua mai ei koe ki a au?’

8Ne tali atu au, ‘Ko oi koe e te Aliki?’ Ne tali mai te leo, ‘Au ko Iesu te Nasaleta, tela e fakasaua ne koe!’

9A tagata kola ne olo matou, ne lavea ne latou a te mainaga, kae ne seki lagona ne latou a te leo o te tino tela ne faipati mai ki a au.

10Fesili atu ei au, ‘Te Aliki, se a te mea e 'tau o fai ne au? ’Ne fai mai te Aliki ki a au, ‘Tu ki luga o fano ki Tamaseko, ko te koga tela ka fakaasi atu a mea katoa e loto a te Atua ki ei, ke fai ne koe.’

11Ne 'kivi oku mata i te 'pula o te mainaga tela ne poko ki a au, tela puke mai ei oku taugasoa ki toku lima, o takitaki au ki Tamaseko.

12“E isi se tagata e igoa ki a Anania, se tagata lotu, kae tausi ki Tulafono a tatou, kae ne fakaaloalogina malosi ne Iutaia kola e 'nofo i Tamaseko.

13Ne vau ki a au, tu i oku tafa, kae muna mai, ‘Taina ko Saulo, 'pula ou mata! ’I te taimi eiloa tena, toe 'pula 'lei ei oku mata, kae kilo atu ei au ki a ia.

14Ne fai mai Anania ki a au: ‘Ko oti ne filifili koe ne te Atua o'tou tupuga, ke iloa ne koe tena kanoloto, ke lavea foki ne koe tena Tavini amiotonu, ke lagona foki ne koe tena tinā leo e faipati.

15Me ko koe ka fai mo molimau ki a ia, o taku atu ki tino katoa a te mea ne lavea kae lagona ne koe.

16Kae nei, se a te mea e fakatali ei koe? Tu ki luga, ke na papatiso koe, ke na magalo au agasala i te fakatagi atu ki tena igoa.”’

Ko te Kalagagina o Paulo o Talai te Tala 'Lei i Fenua Fakaatea

17“Ne toe foki au ki Ielusalema. Ka koi 'talo au i te Fale Tapu, ne oko mai ki a au se fakaasiga,

18tela ne lavea ei ne au a te Aliki e faipati mai ki a au, ‘Ke vave nei eiloa koe o fano keatea mai Ielusalema, i te mea e se talia ne tino i konei tau molimau ki a au.’

19Ne tali atu au penei, ‘Te Aliki, e iloa faka'lei eiloa ne latou, me ne puke fakapagota kae kini ne au i loto i sunako a tino kola e talitonu ki a koe.

20Galu 7.58I te tamatega o tau tino molimau ko Setefano, ne nofo foki au i ei, ne loto foki au ki tena tamatega. Ko au foki ne tausi ne au a gatu o tino ne ta ne latou a ia.

21Ne fai mai te Aliki ki a au, ‘Fano, me ko uga atu ne au koe ki fenua fakaatea.”’

22Ka ko tino ne fakalogo'logo eiloa ki a Paulo, ke oko ki te palelega o ana muna kona; ka'laga ake ei a te vaitino ki te gataga olotou leo, “Ave keatea a ia tena mai te lalolagi, me e se 'tau o ola!”

23Ne kai'lao kae peipei valevale olotou gatu, kae apiapi foki a one ki luga.

24A te ofisa Loma, ne fakatonu ki ona tagata ke avatu Paulo ki loto i te olo ke kini, ke iloa ake me se a te mea e ka'laga ei penei a tino Iutaia ki a ia.

25Ka ko te taimi tela ne saisai ei a ia ke kini, fai atu ei a ia ki te ofisa e tu i kona, “Se tulafono ke kini ne koe se tagata Loma, kae seki fakamasino ona ko se agasala?”

26I te lagonaga ne te ofisa a te mea nei, fano ei ki te pule o fesili ki ei, “Se a tau mea tena ko fai? I te tagata tenei se tagata o te malo Loma!”

27Fanatu ei te pule tena o fesili ki a Paulo, “Taku mai nei ki a au, me ko koe se tino o te malo Loma?” Ne tali atu Paulo, “Ao.”

28Muna a te pule, “Ne 'togi ne au se tupe lasi kī ke fai au mo tino o te malo Loma.” Ne tali atu Paulo, “Ka ko au se tina tino Loma eiloa i te fanaumaiga.”

29I taimi eiloa tena, a tino kola ne fai ke olo o sukesuke Paulo, ne 'foki mai keatea. Ka ko te pule ne mataku, i te iloa-akega ne ia i a Paulo se tagata o te malo Loma, ka ko oti ne saisai ne ia ki filifili.

Ko Paulo i Mua o te Fono

30Ne fia iloa tonu ne te pule me se a te pogai ne puke fakapagota ei a Paulo ne tino Iutaia; tela, taeao ake i ei kae 'tala a filifili o Paulo. Ne fakatonu atu ne ia a faitaulaga pule mo te Fono katoa ke maopoopo, avatu ei ne ia a Paulo o fakatu i mua o te Fono.