IOPU 33 - Tuvalu Revised Bible

1Iopu, fakalogo mai nei ki aku muna katoa konei ka fai atu.

2Au ko toka o taku atu a mea ne mafaufau au o faipati atu.

3Aku pati katoa ka fai atu, e tonu katoa kae faipati foki ne au te mea tonu.

4Ko te agaga o te Atua ne faite ne ia a au,

Kae aumai foki ne ia te ola ki a au.

5Fai mai sau tali manafai e mafai ne koe.

Fakatoka ou manatu.

6A taua e pau i mua o te Atua, a taua ne faite katoa mai i te pefu.

7Tela la, e se tau mo koe o mataku mai ki a au;

E se ta ne au a koe.

8Konei au muna ne lagona ne au:

9“Au se 'se; e seai se mea 'se ne fai ne au.

Au e amiotonu kae seai ne aku agasala.

10Ka ko te Atua ne salasala ne ia ne auala e fakapuapuaga ei ne ia a au e pela au me se fili o ia.

11 Iopu 13.27 E sai ne ia oku vae ki seni; e alamati a ia ki aku mea katoa e fai.”

12Ka ko au e fai atu ki a koe, e Iopu, a koe e 'se.

A te Atua e maluga atu i so se tagata.

13Ai a e faka'se ei ne koe te Atua me e se tali mai ki fakatagi a tagata?

14E ui eiloa i te Atua e faipati 'soko mai faeloa,

Kae e seai eiloa se tino e saga ki ana muna e fai.

15 Iopu 4.13 I te po, i te taimi e moe ei a tagata, tena te taimi e faipati mai ei te Atua i moemiti mo fakaasiga.

16E fai ne ia latou ke faka'logo ki ana muna,

Kae e mataku latou ki ana polopoloakiga.

17A te Atua e faipati ki a latou ko te mea ke fakagata olotou fai agasala kae ke faka'sao foki ne ia latou mai i uiga fakamatamata.

18E se tiakina ne ia latou ke 'ta fakapalele;

E faka'sao ne ia latou mai i te mate.

19E aumai ne te Atua a masaki mo te 'mae o te foitino ke akoako ei te tagata.

20A te tagata masaki e seai se fiakai i a ia,

Ke oko foki eiloa ki te toe meakai gali eiloa e se gali ki a ia.

21A tena foitino ko fanaifo eiloa o pakā;

Ona ivi katoa ko āta mai eiloa ki tua;

Ko lavea atu ona ivi katoa.

22Ko pili a ia o fanatu ki te lalolagi o tino mate.

23E se taumate e iku o vau se agelu o fesoasoani ki a ia,

Se agelu e tokotasi mai i te afe o agelu a te Atua,

Ko ia ka fakamasaua mai ki tagata a tiute e tau o fai ne latou.

24Ka alofa te agelu ki a ia, kae ka kalaga atu penei,

“Fakasao atu a ia! E seki tau a ia o fanaifo ki te lalolagi o tino mate.

Tenei te togi e fakasao ei a ia.”

25Ka toetupu lei tena foitino kae malosi;

26Kafai e talo a ia, kae ka tali mai te Atua ki tena talo.

Ka tapuaki atu a ia ki te Atua mo te fiafia;

Ka toe fakasakosako ne te Atua a tena olaga mo mea ne tupu ki a ia.

27Ka fai sena folafolaga ki tino penei,

“Au ne agasala.

E seki fai ne au te mea tonu, ka ko te Atua ne fakasao ne ia au.

28Ne taofi ne ia au ke se fano au ki te lalolagi o tino mate, tenei la, au koi ola eiloa.”

29E masani sale eiloa o fai ne te Atua a te mea tena;

30E fakasao ne ia te ola o se tino,

Kae avatu ne ia ki ei te fiafiaga o te ola.

31Iopu, fakalogo mai nei ki aku pati e fai atu;

Filemu, kae fakalogo mai ke faipati atu au.

32Kafai e isi sau pati e fia fai, fai mai ke lagona ne au;

Ka fiafia eiloa au o taku atu i a koe e tonu.

33Kae kafai e seai, sa uā la kae fakalogo mai ke akoako atu ne au a koe ke poto.