2 NOFOAIGA TUPU 15 - Tuvalu Revised Bible

Ko Mea ne Fakafou ne Asa

1Ne oko mai a te Agaga o te Atua ki a Asalia, te tama tagata a Oteta,

2tela ne fanatu ei a ia o fakafetaui ki te Tupu ko Asa. Ne kalaga atu a ia penei, “Asa te Tupu, fakalogo mai, pena foki koutou tino o Iuta mo Peniamina! A te Aliki e fakatasi mai ki a koutou, manafai e tumau te otou faka'logo ki a ia. Kafai e salasala koutou ki a ia, kae ka vau a ia ki a koutou, kae kafai e fulitua koutou ki a ia, kae ka tiakina foki ne ia koutou.

3Ne leva eiloa te taimi ne nofo ei a tino Isalaelu seai se Atua tonu o latou, seai ne faitaulaga o akoako latou, seai foki se tulafono mo fakatonutonu latou.

4Kae kafai ko oko mai a puapuaga, ko fuli atu ei latou ki te Aliki, te Atua o Isalaelu Ne salasala latou ki a ia, kae ne maua eiloa ne latou.

5I aso kona, e faigata ne tino o ma'laga mo te filemu, me e uke a fakalavelave mo te se toka i fenua katoa.

6A nisi malo ko fakapuapuaga ne latou a nisi malo, pena foki a nisi fa'kai lasi ko fakapuapuaga ne latou a nisi fa'kai lasi, me ko aumai ne te Atua a fakalavelave mo puapuaga ki a latou.

7Tela la, e tau mo koutou o fakamalosi kae sa fakavaivai. A te galuega tela ka fai ne koutou e isi eiloa sena taui e maua.”

8Ne malosi te loto o Asa, i te lagonaga ne ia a muna fakapelofeta a Asaila, te tama tagata a Oteta. Ne ave keatea ne ia a tupua katoa i te fenua o Iuta mo Peniamina, pela foki a tupua i fa'kai kola ko oti ne puke ne ia i te fenua maugā o Efalaima. Ne fakafou foki ne ia a te fata-fai-taulaga a te Aliki tela e tu i mua o te kogafono o te Faletapu.

9E tokouke a tino mai Efalaima, Manase mo Simeona ne o'mai o kau i a Asa, kae ko nofo nei i tena malo, me ko iloa ne latou i te Aliki e kau ki a Asa. Ne fakamaopoopo ne Asa a latou, fakatasi mo tino o Iuta mo Peniamina.

10Ne maopoopo latou i Ielusalema i te tolu o masina o te sefululima o tausaga o te nofoaiga a Asa.

11I te aso tena, ne ofo atu ei ne latou a taulaga ki te Aliki, mai i koloa kola ne 'fao mai ne latou mai i olotou fili: e fituselau pulumakau, kae fitu afe mamoe.

12Ne fai te lotou feagaiga, tela ne loto ei latou o tapuaki ki te Aliki, te Atua o olotou tupuga, mo olotou loto mo agaga katoa.

13So se tino e se tapuaki ki te Aliki, me se talavou, io me se tino matua, me se tagata io me se fafine, e tamate.

14Ne fai te lotou tautoga i te igoa o te Aliki, mo olotou leo e fai eiloa i luga, me ka tausi ne latou te lotou feagaiga, tena ne ka'laga ei latou kae fakatagi a pu.

15Ko oko eiloa i te fiafia o tino Iuta, me ne fai ne latou te feagaiga tena mo olotou loto katoa. Ko oko eiloa i te lotou fiafia o tapuaki ki te Aliki, tena ne talia eiloa latou ne te Aliki, kae avatu ki a latou te filemu.

16Ne ave keatea ne te Tupu ko Asa a tena tupuna fafine ko Maaka, mai i tena tulaga ko te tupu fafine, me ne fai ne ia se tupua o te atua fafine ko Asaila. Ne tule ifo ne Asa a te tupua tena, katikati ne ia, kae sunu a potumea o ia i te vanu o Kitilona.

17E ui eiloa ne seki ofa ne Asa a koga tapuaki fapaupau katoa i luga i te fenua, kae ne tumau eiloa tena fakamaoni ki te Aliki i tena olaga katoa.

18Ne tuku ne ia i te Faletapu a mea taua katoa kola ne fakatapu ne tena tamana ko Avia ki te Atua, pela foki mo aulo mo siliva kola ne fakatapu ne ia.

19Ne seki toe ai eiloa se taua ke oko eiloa ki te tolusefulu lima o tausaga o tena nofoaiga.