1I te otiga o mea kona ne fai, e isi ne takitaki o tino o Isalaelu ne o'mai o fai mai ki a au me i tino mo faitaulaga mo te kau sa Levi e seki nofo faka'mao keatea mai i tino o te fenua o Amoni, Moapi mo Aikupito, io me mai tino Kanana, tino Heti, tino Pelise, tino Iepuse, mo tino Amoli. Ko fai foki nei ne latou a amioga ma'sei kola e fai sale ne tino o fenua kona.
2A tagata Iutaia ko avaga ki fafine o fenua fakaatea, tela la, a tino tapu o te Atua ko masei valevale. Ko takitaki eiloa mo ofisa, konei e sili atu te fai ne latou o amioga pena.
3I te lagonaga ne au a te mea tenei, ne saesae oku gatu i te fanoanoa, ne unu foki oku laulu mo toku talafa, kae sagasaga ifo au ki lalo mo te fanoanoa lasi.
4Ne sagasaga au i kona kae tagi fanoanoa ke oko eiloa ki te taimi o te taulaga i te afiafi, ka ko tino foki ko kamata o maopoopo mai i oku tafa, ko tino konei kola ne mataku i muna a te Atua o Isalaelu e uiga ki te agasala a tino kola ne 'foki mai i te tafeaga.
5I te okoga ki te taimi o te taulaga i te afiafi, ne tu ake ei au mai te koga ne tagi ei au, mo oku gatu masae'sae, totuli ei au o talo kae 'fola atu oku lima ki te Aliki toku Atua.
6Aku muna penei, “Te Atua, ko se maua ne au o kilo atu oku mata ki a koe i a au ko oko eiloa i te ma. A omotou agasala ko pela me se faka'tuga kaiga ko maluga atu i omotou ulu; ko oko eiloa ki te lagi te faka'tuga o omotou agasala.
7A matou, tou fenua, ne agasala faeloa ki a koe, talu mai eiloa a aso o omotou tupuga. Mai luga o agasala a matou, mo omotou tupu mo faitaulaga, tena te mea ne pule ei matou ne tupu o fenua fakaatea, tena te mea ne 'ta valevale ei matou, kae fao omotou mea kae ave fakapagota matou ki nisi fenua. A matou ko oko eiloa i te masiasi, ke oko mai eiloa ki aso nei.
8Te Aliki te motou Atua, a koe ne alofa mai ki a matou kae tuku ne koe a nisi o matou ke sola keatea mai te fakapologa, o'mai o nofo mo te tokagamalie i te koga tapu tenei. E ui eiloa i a matou e ola i se olaga fakapologa kae ne tuku mai eiloa ne koe se olaga fou ki a matou.
9A matou ne fakapologa, kae e seki tuku mai ne koe matou ke fai faeloa mo pologa. Ne fai ne koe a tupu o Pelesia ke fiafia mai ki a matou kae talia ne latou ke ola matou, kae toe faite tou Faletapu tela ne masei, kae ke o'mai foki matou o ola i se olaga tokagamalie i Iutaia mo Ielusalema.
10“Kae nei, te Atua, ne a foki omotou pati ka fai atu, i a matou nei ko toe agasala foki?
11Ko toe teke foki matou ki fakatonuga kola ne aumai ne koe ki a matou e auala i pelofeta. Ne fai mai a pelofeta ki a matou, i te fenua tenei ka nofo matou i ei e se ma, me i tino ne nofo i ei ne faka'fonu ne latou mai te sua mata ki te sua mata i amioga masei.
12Eso 34.11-16; Teu 7.1-5 Ne fai mai a pelofeta kona ki a matou ke se avaga matou ki tino o fenua fakaatea, kae ke se fesoasoani foki matou o fakamaumea latou, manafai e manako matou o nofo fia'fia i luga i te fenua kae ke fai mo tofi o matou ki te se gata mai.
13E ui eiloa i fakasalaga kola ko oti ne oko ki a matou mai luga i omotou agasala, kae e iloa ne matou i a koe, te Atua, ne fakamama ne koe te motou sala i lo te fakasalaga tonu ne tau o oko mai ki a matou, kae talia foki ne koe ke ola te motou gafa.
14Tela la, kafai e se toe 'saga nei matou ki au fakatonuga kae toe a'vaga mo tino amio masei, kaati ka kaitaua malosi eiloa koe ko 'ta fakapalele ei ne koe a matou, ke seai se tino e toe ola.
15Te Aliki te Atua o Isalaelu, a koe e amiotonu, kae ne talia ne koe ke ola matou. Ko fakatoese atu matou ki a koe; a matou e se 'tau eiloa o fakapilipili atu ki ou mua.”
Who We AreWhat We EelieveWhat We Do
2025 by iamachristian.org,Inc All rights reserved.
