1“Tuku atu te fakafetai ki te Aliki me 'lei a ia;
A tena alofa e se gata mai!”
2A koutou katoa kola ne fakasao ne ia,
Ke kau fakatasi mo au o tavae atu ki te Aliki.
Ko oti ne fakasao ne ia koutou mai i otou fili,
3Kae ne fakafoki mai foki ne ia koutou mai fenua fakaatea,
Mai te saegala mo te togala, mai matu foki mo saute.
4A nisi o koutou ne takase'se i te koga lavaki e seki 'laka eiloa i ei se vae,
Kae ne seki mafai o maua se lotou auala ki se fa'kai o nofo i ei.
5A latou ne fiakai kae fiainu
Ka ko seai lele eiloa se isi fakamoemoega.
6Ne ka'laga latou ki te Aliki i olotou puapuaga,
Kae ne fakasao ne ia latou mai fakalavelave kona.
7Ne takitaki ne ia latou i te auala tonu
Ki te fa'kai ka nofo ei latou.
8E 'tau o siki atu ne latou te fakafetai ki te Aliki e tusa mo tena alofa tumau,
E tusa foki mo mea gali ne fai ne ia mo latou.
9A tino kola ne fiainu ne fainu ne ia
Mo tino kola ne fiakai ne fakama'kona ne ia latou ki mea 'lei.
10A nisi ne ola i loto i te pouliga fakamataku o puapuaga,
Ko pagota e ola fi'ta i pikifao ki seni,
11Me ko oti ne 'teke ne latou a fakatonuga a te Atua Malosi,
Ko oti foki ne se talia ne latou ana akoakoga.
12Ne fi'ta latou i galuega 'mafa;
Ne 'siga ki lalo, kae seai se tino e fesoasoani ki a latou.
13Ne kalaga latou ki te Aliki i olotou puapuaga,
Kae ne fakasao ne ia latou mai fakalavelave kona.
14Ne aumai ne ia latou keatea mai puapuaga o te pouliga fakamataku
Kae ne 'tala foki ne ia a olotou pikifao seni.
15E 'tau o siki atu ne latou te fakafetai ki te Aliki e tusa mo tena alofa tumau,
E pela foki mo mea fakaofoofogia ne fai ne ia mō latou.
16Ne lepe ne ia ki lalo mataloa palasi,
Kae fatifati ne ia a fiti o mataloa.
17Ne ma'saki nisi o latou i olotou agasala,
Ne puapuagatia foki i olotou amio masei;
18Ko seai se fia'kai i a latou,
Me ko pili mai te mate.
19Ne ka'laga latou ki te Aliki i olotou puapuaga,
Kae ne fakasao ne ia latou mai fakalavelave kona.
20Ne fakalei ne ia olotou masaki ki ana muna,
Kae ne fakasao ne ia latou mai te tanuga.
21E 'tau o siki atu ne latou te fakafetai ki te Aliki e tusa mo tena alofa tumau,
E tusa foki mo mea fakaofoofogia ne fai ne ia mō latou.
22E 'tau mo latou o tuku atu taulaga fakafetai ki a ia,
Fakatasi mo pese o te fiafia, e taku atu ei ana mea katoa ne fai.
23A nisi e fo'lau i vakamutu i luga i te vasa,
E galue ke maua mea e tausi ei olotou olaga i luga i tai.
24Ne lavea ne latou a mea ne fai ne te Aliki,
Ko ana galuega fakaofoofogia i luga i te moana.
25Ne tuku atu ne ia te fakatonuga,
Ko te mea eiloa ko kamata o agi te afā lasi,
Kamata ei foki o sou te moana.
26A vakamutu ko se mafai eiloa o toka, me ko to sou te moana.
A tino ko ma'taku i vaega fakalavelave pena;
27A latou ne tai 'siga, kae takatipa'tipa e pela me ne tino ko'na;
Ka ko se iloa foki ne latou o fai fakalei a galuega.
28Ne kalaga latou ki te Aliki i olotou puapuaga,
Ne fakasao ne ia latou mai fakalavelave kona.
29Ne fai ne ia te afā lasi ke malū,
A galu foki ko gasolo ifo eiloa o toka.
30Ne fiafia latou me ko malū,
Aumai ei latou ne ia ki te taulaga malu 'lei ne manako ki ei latou.
31E tau o siki atu ne latou te fakafetai ki te Aliki e tusa mo tena alofa tumau,
E tusa foki mo mea fakaofoofogia ne fai ne ia mō latou.
32E tau mo latou o folafola atu tena 'malu i te fakapotopotoga o tino,
Kae tavae atu ki a ia i mua o te fono a toeaina.
33Ko oti ne faka'masa pakupaku ne te Aliki a vaitafe,
Kae taofi foki ne ia te tafe o vaipuna.
34Ko oti ne fuli ne ia laukele ola ke fai mo laukele taitai i te vao,
Ona ko te amio ma'sei o tino kola e nofo i ei.
35Ko oti ne fuli ne ia a toafa ke fai mo koga e maua ei a vai,
Mo kogā laukele malo ke fai mo vaipuna.
36Ko oti ne tuku atu ne ia a tino fiakai ke 'nofo i kona,
Kae faite ne latou se fa'kai mo nofo latou i ei.
37Ne 'toki ne latou a kogā laukele kona ki fuagavine,
Tela ne maua mai i ei fuagalakau e uke.
38Ne fakamanuia ne ia tena fenua, tena ne maua ei ne latou tamaliki e tokouke;
Ne seki mataku eiloa te lotou manuia i olotou lafu pulumakau.
39Kafai ko fakatakavalegina kae fakamalalogina a tino o te Atua
i puapuaga mo fakasauaga,
40Ko fakaasi ei ne ia tena takalialia ki tino fakasaua kona,
Kae ne fai ne ia latou ke takase'se i toafa seki 'laka ki ei se vae.
41Kae ne fakasao ne ia a tino sogea mai olotou puapuaga kona,
Kae fakatokouke ake olotou kaiga pela me ne lafu manu.
42Ko lavea ne tino amiotonu te mea tena, fiafia ei latou.
Ka ko tino amio ma'sei katoa ko se faipati.
43A latou kola e 'poto, ke mafaufau ki mea konei;
Ke fakaasi atu ne latou te alofa tumau o te Aliki.
Who We AreWhat We EelieveWhat We Do
2025 by iamachristian.org,Inc All rights reserved.
