GALUEGA 16 - Tuvalu Revised Bible

Ko Fai Malaga Fakatasi a Timoteo mo Paulo mo Sila

1Ko fai malaga atu a Paulo ki Teipe mo Lusa. E isi se tagata talitonu e igoa ki a Timoteo e nofo i kona. A tona matua foki se fafine talitonu, kae se fafine Iutaia, ka ko tona tamana se Eleni.

2Ko oko eiloa i te tavaea o Timoteo ne taina talitonu i Lusa mo Ikonio.

3Ko manako a Paulo ke olo latou mo Timoteo, tela, pilitome ei ne ia. Ne fai ne ia ona ko Iutaia katoa kola e 'nofo i fenua kona, me e iloa 'lei eiloa ne latou i te tamana o Timoteo se Eleni.

4I te lotou ologa i loto i fa'kai, ne taku atu ne latou ki tino talitonu a tulafono kola ne fakatoka ne apositolo mo toeaina i Ielusalema, kae fai atu foki ke tausi ki ei.

5Tela la, ko 'tupu ake o ma'losi a Ekalesia i te fakatuanaki, ka ko tokouke foki tino ko fakaopoopo ki ei i aso takitasi.

Ko te Fakaasiga ne Matea ne Paulo i Teloa

6Ko fai malaga atu latou i loto i Felukia mo Kalatia; kae ne seki talia ne te Agaga Tapu ke folafola atu te muna i Asia.

7I te lotou okoga ki te tuakoi o Musia, taumafai ei latou o olo ki Pitunia, kae ne seki talia ne te Agaga o Iesu ke olo latou ki ei.

8Tela, fakatafatafa eiloa latou i tafa o Musia o olo ifo ki Teloa.

9Ne oko atu te fakaasiga ki a Paulo i te po tena, tela ne matea ei ne ia se tagata Maketonia e tu kae fakatagi mai penei ki a ia, “Vau ake ki Maketonia o fesoasoani mai ki a matou!”

10I te mauaga ne Paulo te fakaasiga tenei, fakatokatoka eiloa matou o olo ki Maketonia, me ko talitonu omotou loto i a matou ko kalagagina ne te Atua, ke olo o folafola atu a te Tala 'Lei ki tino i te fenua tena.

Ko te Fuliga o Litia i Filipi

11Ne tiaki ne matou a Teloa kae folau tonu atu eiloa te motou vaka ki Samotake, oko ei matou ki Neapoli i te sua aso,

12kae mai kona olo atu ei matou ki Filipi e tu i gauta atu o Neapoli tela ko te fa'kai taua o Maketonia; kae se kolone foki o Loma. Ne 'nofo matou i te fa'kai tena i mu aso.

13I te Sapati, ne olo matou ki tua o te fa'kai ki te kaugutu o te vaitafe, tela ne taofi matou pela me tu i ei te koga 'talo o tino Iutaia. Ne saga'saga matou i kona, kae fai'pati atu ki fafine kola ne potopoto i ei.

14A te sua fafine o latou konei ne lagona ne ia omotou leo ko Litia, kae se fafine Tuatila, kae se tino 'togi laugatu paūli. Se fafine e tapuaki ki te Atua, kae ne 'tala ne te Aliki tona mafaufau ko te mea ke fakalogologo ki te faipatiga a Paulo.

15Ne papatiso a ia nei mo tona kaiga katoa, tela fakamuli ifo ami ei ne ia matou: “O'mai o 'nofo i toku fale, manafai ko iloa tonu ne koutou i a au se tino talitonu fakamaoni ki te Aliki.” Ne finau malosi eiloa ke olo atu matou.

I te Fale Puipui i Filipi

16I te motou ologa ki te koga 'talo i te sua aso, ne fakafetaui mai ki a matou se tavini tamafine e pukea ne te agaga masei, tela e fai ne ia ke 'valo ki mea ka 'tupu. E uke ana tupe e maua ma ona pule i tena galuega tena.

17Ne tautali i a Paulo mo matou, kae pakalaga sale penei: “A tagata konei, ko tavini a te Atua Tafa Sili i te Maluga! E folafola atu ne latou ki a koutou a te ala e fakaolagina ei koutou!”

18Ne fai sale eiloa ana pati penei i aso e uke, ke oko eiloa ki te taimi ko kaitaua ei Paulo, saga atu ei ki a ia, kae fai atu ana muna ki te agaga masei, “Ko fakatonu atu ne au koe i te igoa o Iesu Keliso, ke fano koe keatea mai i a ia!” I kona foki eiloa, fano eiloa keatea te agaga masei mo ia.

19I te iloaga ne pule o te tavini tamafine tena, me ko se toe iai se auala e maua i ei olotou tupe, puke atu ei a latou ki a Paulo mo Sila, kae soso ki mua o tino pule i te koga faifono.

20Ne aumai ne latou ki mua o ofisa Loma kae fai atu: “A tagata konei ne Iutaia, kae fakatupu fakalavelave i te motou fa'kai.

21E akoako ne laua a tu kola e 'teke ki te motou tulafono; ka ko matou ne tino Loma, tela la, e se mafai o tau'tali matou i olotou tu.”

22Ne kau fakatasi atu te vaitino i te tāga o Paulo mo Sila; ne saesae keatea ne ofisa o la gatu, kae fakatonu atu ke kini laua ki lakau.

23I te otiga ne kini fakamasei laua, pei ei ki te fale puipui, kae fakatonu atu foki ki te leoleo o te fale puipui ke loka mau laua.

24I te mauaga ne te leoleo o te fale puipui a te fakatonuga tena, ne pei ne ia laua ki loto i te potu tafa pouli, kae saisai o la vae i va o kōga lakau 'mafa.

25I te valuapo, ne 'talo kae 'pese a Paulo mo Sila ki te Atua, kae ne fakalogo'logo atu ki ei nisi pagota.

26Ne fakapulele mai i te taimi tena a te mafuie malosi eiloa, tela ne gasuesue ei a te fale puipui ke oko eiloa ki tona fakavae. I te taimi eiloa tena, ne ma'tala katoa a mataloa kae 'to foki keatea a seni ne saisai ei a pagota.

27I te alaakega a te leoleo o te fale puipui, ne matea atu ei ne ia a mataloa o te fale puipui ko ma'tala, manatu ake ei a ia me ko 'tele katoa pagota; tela, tata ake ei tana pelu, ka fai o tamate a ia ne ia eiloa.

28Kae ne pakalaga mai a Paulo mo te leo lasi, “Sa fai ne koe se mea e masei ei koe, i a matou konei katoa i konei!”

29Ne kalaga te leoleo o te fale puipui ke aumai se moli, tafuke atu ei a ia ki loto, kae fakasiga ifo i mua o Paulo mo Sila mo te polepole.

30Fakamuli ifo, ne takitaki mai ne ia laua ki tua kae fai atu ki ei, “Te oulua 'malu, se a te mea e 'tau o fai ne au ke ola ei au?”

31Ne tali mai Paulo mo Sila ki a ia, “Ke fakatuanaki koe ki te Aliki ko Iesu, e ola ei koe fakatasi mo tou kaiga.”

32Ne folafola atu ne laua a te muna a te Aliki ki a ia pela foki mo tino katoa o tona kaiga.

33I te taimi eiloa tena o te po, ne ave laua ne te leoleo o te fale puipui o fulufulu o la pa'kiaga; ne papatiso foki eiloa i te taimi tena a ia mo tona kaiga.

34Ne ave foki ne ia Paulo mo Sila ki tona fale, laulau atu ei meakai ki a laua ke 'kai. Ka ko ia mo tona kaiga, ko 'fonu i te fiafia, me ko talitonu latou ki te Atua.

35I te taeaoakega, ne oko mai te fakatonuga mai tino pule o Loma ki ofisa o leoleo penei: “Tuku atu a tagata kona ke olo.”

36Tela, taku atu ei ne te pule o te fale puipui ki a Paulo, “Ko oti ne oko mai te fakatonuga mai ofisa mō koulua mo Sila, ke 'tala koulua. Tela la, e 'tau mo koulua o na olo, kae olo filemu.”

37Ka ko Paulo ne fai atu ki pule o leoleo, “Ko oti ne kini ne latou a maua i mua o tino, kae seai se mea e 'tau o sala ei maua; ka ko maua nei foki ne tino Loma, kae ne pei ne latou a maua ki loto i te fale puipui. E ma'nako latou o uga 'funa atu maua penei? E se fai pena! Fai ki ofisa Loma kona ke o'mai o 'tala faka'lei maua mai te fale puipui.”

38Ne taku atu ne leoleo a muna konei ki ofisa Loma, ko oko eiloa i te ma'taku o latou i te lotou 'logoga i a laua konei ne tino Loma.

39Tela la, ne o'mai a latou o fakatoese ki a laua; fakamuli ifo, 'tala faka'lei atu ei ne latou laua ke olo keatea mai te fale puipui, kae fai atu ki a laua, ke olo keatea mo te fa'kai.

40Tela, ne olo ei keatea laua mai te fale puipui, kae olo tonu atu ki te fale o Litia. I kona ne fetaui ei laua mo te kau taina, kae ne fai'pati atu laua ki ei i muna fakamalosi, oti, olo ei laua.