2 TIMOTEO 2 - Tuvalu Revised Bible

Ko te Sotia Fakamaoni a Keliso Iesu

1Ka ko koe e taku tama, ke malosi tou loto i te alofa tauanoa tela e i a Keliso Iesu.

2Ke puke mau ne koe a muna kola ne lagona ne koe, kola ne folafola atu ne au i mua o tino molimau e tokouke, kae tuku atu ke tausi ne tino kola e talitonu koutou ki ei, ko tino kola e mafai ne latou o akoako atu nisi tino.

3Ke talia ne koe ou puapuaga, ke pela mo se sotia fakamaoni a Keliso Iesu.

4A te sotia fakamaoni, e manako o fakafiafia ne ia tona pule; tela la, e se fia saga a ia ki te olaga faka te fenua.

5A te tino tele tela e tele i te fakatau'telega, e se mafai o maua ne ia se fakailoga seiloga ke tausi ki tulafono o te fakatau'telega.

6A te tino toki lakau tela ne galue malosi, e 'tau o maua ne ia te fua muamua o ana lakau.

7Mafaufau 'lei ki aku muna e fai atu, me i te Aliki ka tuku atu ne ia te iloa ki a koe i mea katoa.

8Ke masaua ne koe a Iesu Keliso, ne fakatu ake mai te mate, ne tupu mai i a Tavita, e pela eiloa mo te folafolaatuga i te Tala 'Lei.

9Ko te Tala 'Lei tela e puapuagatia ei au, kae pikifao foki au ki filifili e pela mo se tino masei. Ka ko te muna a te Atua, e se mafai eiloa o pikifao.

10Tela la, ko kufaki ne au a mea katoa mō tino filifilia a te Atua, ko te mea ke maua foki ne latou a te fakaolataga tela e i a Keliso Iesu, pela foki mo te 'malu e se gata mai.

11Se muna tonu eiloa tenei:

“Kafai ko oti ne 'mate tatou mo ia, ka toe ola foki tatou mo ia;

12 Mata 10.33; Luka 12.9 Kafai e kufaki tatou, ka pule tatou fakatasi mo ia;

Kafai e fakafiti ne tatou a ia, ka fakafiti foki ne ia a tatou;

13Kafai ko se fakamaoni tatou, kae fakamaoni faeloa a ia,

Me se mafai ne ia o fai se mea 'se i a ia eiloa.”

Ko te Tino Galue ko Fakamaonia ki te Galuega

14Fakamasaua atu ki a latou a te mea nei, kae fakatonu atu i te igoa o te Aliki ke fakagata te lotou kinau i pati, kola e se maua i ei se 'lei, me fakamasei fua ne latou a tino fakalogo'logo.

15Taumafai malosi o tuku atu koe ki te Aliki e pela mo se tino ko fakamaonia me ko 'tau, se tino galue tela e se 'tau mo ia o taema ki se mea, kae se tino e akoako tonu eiloa ne ia a te munatonu a te Atua.

16Ke faka'mao koe mo muna faka te lalolagi mo faipatiga se aoga, me takitaki ne latou a tino ke 'mao mai te Atua.

17Ko olotou pati foki e pela mo se mea 'pala e kai ne ia te 'kano. E tokolua olotou faiakoga e igoa ki a Umenio mo Fileto,

18kola ne tiaki ne laua a te mea tonu, ka ko kosu ne laua te fakatuanaki o nisi Kelisiano i a la muna pela, i te toetu se mea ko leva ne tupu.

19Nume 16.5 Ka ko te fakavae mautakitaki tela ne fakatakato ne te Atua, e se mafai eiloa o fakagasuegina kae iai la a muna konei e tusi i ei: “E iloa ne te Aliki a latou kola e a ia,” kae, “Ke 'kalo keatea mai te masei, a latou katoa kola e igoa ki te igoa o te Aliki.”

20I loto i se fale lasi, e isi a mea fai meakai e faite ki aulo mo siliva, kae isi foki ne mea e faite ki lakau mo kele; a te vaega muamua ne mea taua, ka ko te vaega fakamuli ne mea se taulia.

21Kafai se tino e faka'ma ne ia a ia mai mea masei kola ne taku atu ne au, ka fai a ia mo mea fai meakai taua ko fakatapu mō te Atua, e aoga ki tona pule kae toka foki mo galuega 'lei katoa.

22Ke fakagata manakoga fakatamatane, kae kausaki atu fakatasi mo latou kola e 'talo sale ki te igoa o te Aliki i te loto 'ma, i te amiotonu, i te fakatuanaki, i te alofa mo te filemu.

23Ke fakamao koutou mai kinauga va'lea kae se aoga; e iloa ne koutou me iku katoa eiloa a mea kona ki te taua.

24A te Tavini a te Aliki e se 'tau mo ia o kinau, kae ke alofa ki so se tino, ko ia ko te faiakoga 'lei mo te kufaki,

25tela e fakatonu ne ia ona fili i te loto malalo. Kati ka tuku atu ne te Atua te avanoa ke salamo latou, ko iloa ei ne latou te mea tonu;

26ko te mea ke 'sao latou mai te malei a te tiapolo, ko latou kola ko maua ne ia ke fai tena loto.