1 NOFOAIGA TUPU 25 - Tuvalu Revised Bible

Ko te kau Tata Lakau o te Faletapu

1Ne filifili ne Tavita mo takitaki o te kau sa Levi a kaukaiga sa Levi konei, ke takitaki i faiga o tapuakiga: ko kaukaiga o Asafo, Hemanu, mo Ietutunu. A te mea e tau o fai ne latou, o folafola atu te fekau a te Atua, kae fakatagi a kitala mo sumepalo. Tenei te fakasologa o igoa o tino kola ne filifili ke takitaki ne latou te sauniga, mo vaega kesekese e fai ne potukau takitasi:

2A tama tagata a Asafo, e tokofa: ko Sakula, Iosefa, Netania mo Asalela. A latou e i lalo o te pulega a Asafo, ko ia e takutaku atu ne ia a te fekau a te Atua manafai e fakatonu mai te tupu ke fai.

3A tama tagata a Ietutunu, e tokoono: ko Ketalia, Seli, Iesaia, Simei, Hasapaia, mo Matitia. E folafola ne latou te muna a te Atua kae ta ki kitala, kae usu a vikiga mo fakafetai ki te Aliki.

4A tama tagata a Hemanu e tinogafulu mo te tokofa: ko Pukia, Matania, Usieli, Sepuelu, Ielimota, Hanania, Hanani, Eliata, Kitaleti, Lomamiti Eseli, Iosepekasa, Maloti, Hotili, mo Masiota.

5Ne aumai ne te Atua ki a Hemanu, te pelofeta a te tupu, a tama tagata kona e tinogafulu mo te tokofa, mo tama fafine e tokotolu, e pela eiloa mo tena tautoga, ko te mea ke fai ne ia a Hemanu ke maluga kae malosi.

6A tama tagata katoa a ia e tata i kitala mo sumepalo, i te fakatonutonuga a te lotou tamana, o tautali i tapuakiga i te Faletapu. A Asafo, Ietutunu, mo Hemanu, e fakalogo eiloa ki fakatonuga mai i te tupu.

7A te tinolua mo te tokofa tagata kona, ne tagata ko masani; ka ko olotou taina sa Levi ne tagata foki ko oti ne fakaakoako fakalei. A te aofaki katoa o tagata kona, e tusa mo te 288 tagata.

8A te fakavasegaga o tiute o latou, e fai ki te vili, faitalia me ne tino matua io me ne talavou, ne tino masani io me ne tino fatoa kamata.

9-31A te 288 tagata konei e vaevae i olotou kaiga, ki potukau e luasefulu fa; e taki-tinoagafulu mo te tokolua i te potukau e tasi fakatasi ei mo te takitaki o te potukau. Tenei te fakasologa o latou i olotou tiute: 1) Iosefa i te matakaiga o Asafo; 2) Ketalia; 3) Sakula; 4) Seli; 5) Netania; 6) Pukia; 7) Asalelu; 8) Iesaia; 9) Matania; 10) Simei; 11) Usielu; 12) Hasapaia; 13) Sepuelu; 14) Matitia; 15) Ielimota; 16) Hanania; 17 Iosepekasa; 18) Hanani; 19) Maloti; 20) Eliata; 21) Hotili; 22) Kitaleti; 23) Masiota; 24) Lomamiti Eseli.