1 TUPU 16 - Tuvalu Revised Bible

1A te Aliki ne faipati ki te pelofeta ko Ieu, te tama tagata a Hanani, kae fai atu ne ia ki ei a te fekau tenei e uiga ki a Paasa:

2“A koe se tagata se taulia, kae ne tofi ne au a koe ke takitaki i toku fenua ko Isalaelu. Kae nei a koe ko agasala e pela mo Ielopoamo, kae ko oti foki ne taki ne koe toku fenua ki te agasala. Au ko kaitaua i olotou agasala,

3tela la, ka 'ta ne au a koe mo tou kaiga, e pela eiloa mo te mea ne fai ne au ki a Ielopoamo.

4So se tino i tou kaiga e mate i loto i te fa'kai ka kai ne kuli, ka ko latou kola e mate i tua o te fa'kai ka kai ne manu eva e igoa ki valatua.”

5A nisi tala aka o Paasa mo ana mea ne fai e iloga ei tena loto toa, e fakamau katoa i te tusi ko Te Tala Tukufakasolo o Tupu o Isalaelu.

6Ne mate atu Paasa, kae ne tanu i Tilesa. A ia ne sui ne tena tama tagata ko Ela.

7A te fekau tena mai i te Aliki e uiga ki a Paasa mo tena kaiga ne folafola mai ne te pelofeta ko Ieu ona ko agasala a Paasa ne fai ki te Aliki. Ne fai ne ia a te Aliki ke kaitaua, e se gata i ana amioga ma'sei ne fai, pela mo Ielopoamo, te tupu i ona mua, kae ona foki me ne tamate ne ia a te kaiga katoa o Ielopoamo.

Ko Ela te Tupu o Isalaelu

8I te luasefulu ono o tausaga i te nofoaiga a Asa, te Tupu o Iuta, ne fai ei a Ela, te tama a Paasa mo tupu o Isalaelu. Ne fai a ia mo tupu i Tilesa i tausaga e lua.

9A Semeli, se ofisa a ia e tokotasi, tela e pule i te afā o kaliota a te tupu, ne lamalama ki a ia. I te aso e tasi, i te fa'kai o Tilesa, ne kona ei a Ela i te fale o Alasa, tela ko te pule o te palesi.

10Ne ulu atu Semeli ki loto i te fale, tamate ne ia a Ela, sui ei ne ia a Ela o fai mo tupu. A te mea tena ne tupu i te luasefulu fitu o tausaga i te nofoaiga a Asa, te Tupu o Iuta.

11I te taimi eiloa ne fai ei Semeli mo tupu, tamate eiloa ne ia a tino katoa i te kaiga o Paasa. A tagata katoa kola e kaiga mo Paasa, mo ana taugasoa ne tamate katoa.

12Tela la, ne tamate eiloa ne Semeli a te kaiga katoa o Paasa, e fakataunu ei a muna a te Aliki kola ne folafola mai ne te pelofeta ko Ieu e uiga ki a Paasa.

13A Paasa mo tena tama ko Ela ne fai ne laua te Aliki te Atua o Isalaelu ke kaitaua i te tapuaki atu o laua ki tupua, mo te takiga ne laua o te fenua o Isalaelu ki te agasala.

14A nisi tala e uiga ki a Ela e fakamau i te tusi, o Te Tala Tukufakasolo o Tupu Isalaelu.

Ko Semeli te Tupu o Isalaelu

15I te luasefulu fitu o tausaga o te nofoaiga a Asa, te tupu o Iuta, ne fai ei a Semeli mo tupu i Isalaelu. Ne nofo a ia i Tilesa, kae e tusa fua mo te fitu o aso ne fai ei a ia mo tupu. A kautau a Isalaelu i te taimi tena e taumafai o puke a te fa'kai o Kipetoni i Filisitia,

16kae i te 'logoga i a Semeli ko oti ne tamate ne ia a te tupu ko ia ke fai mo tupu, i kona foki eiloa fai eiloa ne latou a te lotou takitaki ko Omeli ke fai mo tupu o Isalaelu.

17Ne olo atu a Omeli mo tena kautau mai Kipetoni o puke te fa'kai o Tilesa.

18I te mateaga ne Semeli i te fa'kai ko maua ne Omeli, ne fanatu ei a ia ki loto i te potu malosi i loto i te palesi, fakaka ne ia te palesi, mate atu foki eiloa a ia i te afi.

19Ne tupu te mea tena mai luga i ana agasala ki te Aliki. Ne kaitaua te Aliki ki a ia e tusa mo ana agasala ne fai mo te 'takiga ne ia o te fenua o Isalaelu ki te agasala, e pela eiloa mo te tupu i ona mua ko Ielopoamo.

20A nisi tala e uiga ki a Semeli, pela mo te tala i te tamatega ne ia a te tupu e fakamau katoa i te tusi o Te Tala Tukufakasolo o Tupu o Isalaelu.

Ko Omeli, te Tupu o Isalaelu

21A tino Isalaelu i te vaitaimi tenei e vaelua olotou manatu: a nisi tino e ma'nako ke fai a Tipeni, te tama a Kinata, mo tupu, ka ko nisi tino e ma'nako ki a Omeli.

22Ne manumalo a tino kola e ma'nako ki a Omeli; ne mate Tipeni tela fai ei Omeli mo tupu.

23Tena la, i te tolusefulu tasi o tausaga o te nofoaiga a Asa, te tupu o Iuta, ne fai ei Omeli mo tupu o Isalaelu. E tusa mo te sefululua tausaga ne fai ei a ia mo tupu o Isalaelu. E ono tausaga ne nofo ei a ia i Tilesa,

24togi ei ne ia te koga malugaluga i Samalia ki te ono afe siliva mai te tagata e igoa ki a Semela. Ne faite ne Omeli te olo o te koga maluga tena, faite foki ne ia te fa'kai i ei, kae fakaigoa ne ia ko te fa'kai o Samalia, e vau mai i te igoa o Semela, te tagata tela e o ia a te koga maluga tena.

25E silia atu te agasala ne fai ne Omeli ki te Aliki i tupu kola ne mua atu i a ia.

26E pela eiloa mo Ielopoamo, ne fai foki ne ia te Aliki, te Atua o Isalaelu ke kaitaua, i agasala a ia ne fai, mo te takiga foki ne ia o te fenua ki te agasala mo te ifo ki tupua.

27A nisi tala katoa e uiga ki a Omeli, e fakamau katoa i te tusi ko Te Tala Tukufakasolo o Tupu o Isalaelu.

28Ne mate atu Omeli, kae ne sui ne tena tama tagata ko Aapo. A ia ne tanu eiloa i Samalia.

Ko Aapo te Tupu o Isalaelu

29I te tolusefulu valu o tausaga o te nofoaiga a Asa, te tupu o Iuta, ne fai ei a te tama a Omeli ko Aapo mo tupu o Isalaelu. Ne tupu a ia i Samalia i tausaga e luasefulu lua.

30Ko silia atu te agasala ne fai ne ia nei ki te Aliki i lo tupu i ona mua.

31A ana agasala ne fai e pau eiloa mo agasala a Ielopoamo; kae e tai silia atu foki ei tena mea ne fai me ne avaga ki a Iesepela, te tama fafine a te Tupu o Saitonu ko Etepala, kae tapuaki foki ki a Paala.

32Ne faite ne ia se faletapu mo Paala i Samalia, faite foki ne ia se fata-fai-taulaga mo Paala, kae tuku ki loto i te faletapu.

33Ne fakatu aka foki ne ia se fakatusa o te atua ko Asaila. E silia atu te ma'sei o mea ne fai ne ia i lo tupu katoa o Isalaelu kola ne mua atu i a ia, tena ne pogai ei o kaitaua te Aliki te Atua o Isalaelu ki a ia.

34Iosu 6.26 I aso o tena nofoaiga, ne toe ati ake ei ne Ieli te tagata Peteli, a te fa'kai o Ieliko. A te tama matua eiloa a Ieli ko Apilamo, ne mate i te taimi ne faite ei te fakavae o te fa'kai o Ieliko, ka ko tena toekimuli ko Sekupa ne mate i te taimi ko faite ei a mataloa o te fa'kai; tena ko taunu ei a muna a te Aliki kola ne folafola mai ne Iosua te tama tagata a Nuno.