ESEKIELU 19 - Tuvalu Revised Bible

Ko te Pese Fanoanoa

1A te Atua ne fai mai ki a au ke usu ne au a te pese fanoanoa tenei ona ko pelenise e tokolua o Isalaelu:

2A tou matua se leona fafine!

Ne puti aka ne ia ana tama i te koga

E nofo i ei a leona tagata fakamataku.

3Ne puti aka ne ia tena tama, kae akoako ke iloa o sala ana meakai;

Ne kaitino eiloa a ia.

4Ne logo a malo i tala o ia,

Tena ne malei ei ne latou a ia i te lua.

Ne fakalave ne latou a ia ki kafilo kae toso ki Aikupito.

5Ne fakatalitali eiloa a ia ke oko ki te taimi ko seai eiloa i ei sena fakamoemoega.

Tena ne toe puti aka ne ia tena sua tama,

Tupu aka ei o fai mo leona fakamataku.

6I te taimi ko matua lei ei a ia,

Ne teka tasi sale eiloa mo nisi leona.

Ne apo foki a ia i te sala meakai kae ne kaitino foki eiloa a ia.

7Ne ofa ne ia a olo malosi, kae fakamasei a fa'kai.

A tino o te fenua e mataku i taimi katoa e gulu ei a ia.

8A malo ko maopoopo fakatasi o taua ki a ia;

A tino ne o'mai mai i koga valevale.

Ne fola olotou tili,

Po ei ne latou a ia i olotou malei.

9Ne fao ne latou a ia i te pa uaea

Kae ave a ia ki te tupu o Papelonia.

Ne leoleo ne latou a ia,

Ko te mea ke se toe lagona tena gulu i luga i mauga o Isalaelu.

10A tou matua e pela me se vine tela ne toki i tafa o se vaitafe foliki.

Ona e uke a vai i kona,

Tela la, a te vine ko fonu eiloa i lau mo fuagavine.

11A ona kaula e malosi,

Kae ne tupu ake eiloa o fai mo tokotoko a tupu.

Ne gasolo ake eiloa o maluga a te vine tena,

Tela ko oko atu eiloa ki kaumana;

E lavea katoa ne tino te ola o ona lau

Kae ko oko eiloa i te maluga.

12Kae ne unu te vine tena mai i lalo i ona aka ne lima o se tino kaitaua

Kae pei ki lalo i te laukele.

Ne mage ona fuagavine ne fai ne te matagi mai i te saegala.

A ona kaula ko fati ki lalo;

Ko mage kae 'paku valevale.

13Nei, ko toki i te toafa,

I te laukele malo kae seai ne vai i ei.

14Ne ka te foitino o te vine;

Ne ka i te afi a ona kaula mo fuagavine.

A kaula ko se toe malosi eiloa,

Se toe fai mo tokotoko a tupu.

A te mea nei se pese fanoanoa; ne masani o usu soko faeloa.