1 PETELU 1 - Tuvalu Revised Bible

1Ko au ko Petelu ko te apositolo a Iesu Keliso —

Ki tino filifilia a te Atua kola e nofo kae salalau valevale i koga fenua o Pono, Kalatia, Kapatokia, Asia mo Pitunia.

2Ne filifilia koutou ona ko te fuafuaga a te Atua te Tamana, ke fai koutou mo Kelisiano e alatu i tona Agaga, kae o fakalogo foki ki a Iesu Keliso, ke faka'magina foki i tona toto.

Ke fakaopoopo atu faeloa ki a koutou a te alofa tauanoa mo te filemu.

Ko te Fakamoemoega Ola

3Ke fakafetai tatou ki te Atua te Tamana o te tou Aliki ko Iesu Keliso! Ona ko te lasi o tona alofa 'nau, ne tuku mai ei te ola fou i te fakatuakega o Iesu Keliso mai te mate. Tenei te mea ko faka'fonugina ei foki tatou i te fakamoemoega ola,

4tela la, a matou e 'kilo mo te fakamoemoe ke maua te fakamanuiaga tela e tausi ne te Atua mo ona tino i aso mai mua. E tausi ne ia i te lagi mō koutou, i te koga tela e se oko ki ei te pala, te masei mo te magemage.

5A mea la konei e mo koutou, kae e tausi fakalei ne te mana o te Atua e alatu i te otou fakatuanaki, ka koi fakatalitali koutou ki te fakaolataga tela ko toka o fakaasi mai i aso fakaoti.

6Tela la, ke fiafia koutou ki te mea nei, kae tonu se mea 'tau ke fanoa'noa koutou i ne mo taimi, ona ko te uke o vaega tofotofoga valevale, e puapuagatia ei koutou.

7A te aoga o tofotofoga konei e fakamaoni ei te tonu o te otou fakatuanaki. E oko ki te aulo, e mafai o fakamasei manafai e 'sunugina ki te afi, e pena foki te otou fakatuanaki tela e sili i te taua atu i te aulo, e 'tau foki o tofotofogina, ko te mea ke tumau, ke maua ei ne koutou te tavaega, te 'malu mo te vikiga i te Aso e fakaasi mai ei a Iesu Keliso.

8Ke alofa koutou ki a ia, kae tonu la me seki 'kilo otou mata ki ei; ke talitonu foki koutou ki a ia, kae e tonu la me seki matea eiloa ne koutou a ia; tela la, ke 'lifu koutou mo te fiafia lasi, ko te fiafiaga tela ko se mafai o fakamatalagina,

9me ko maua ne koutou a te ikuga o te otou fakatuanaki, tela ko te fakaolataga o otou agaga.

10Tenei te fakaolataga ne ala ei a pelofeta o salasala kae sukesuke fakalei ki ei; ne 'valo foki latou e uiga ki te meaalofa tenei, tela ka tuku atu ne te Atua ki a koutou.

11Ne sukesuke ne latou me tefea tona taimi tonu, kae pefea foki tena oko mai. A te Agaga o Keliso tela e i loto i a latou, ne fakasino mai ne ia te taimi tonu, i te fakailoa mai ne ia a puapuaga kola e 'tau mo Keliso o kufaki ki ei, mo te 'malu tela e maua mai i ei.

12Ne fakaasi tonu ne te Atua ki pelofeta konei i te lotou galuega e se mo te lotou 'lei, kae mo te otou 'lei, e pela eiloa mo te lotou fai'pati e uiga ki mea tonu konei ko lagona ne koutou. A ave fekau o te Tala 'Lei, kola ne faipati e alatu i te mana o te Agaga Tapu tela ne aumai mai te lagi, ne taku atu ei ne latou ki a koutou a mea tonu konei. Ko mea tonu foki eiloa konei e fia iloa ne agelu.

Ko te Kalaga mō te Olaga Tapu

13Tela la, ke fakatoka otou mafaufau mo so se fakalavelave. Matapula'pula, kae tuku katoatoa atu otou fakamoemoega ki te fakamanuiaga tela e tuku atu ki a koutou manafai e fakaasi mai a Iesu Keliso.

14Ke faka'logo koutou ki te Atua, kae sa tuku atu otou olaga ke toe fai ei a manakoga kola ne iai i a koutou, i aso koi valea ei koutou.

15Ke tapu otou olaga i mea katoa e fai ne koutou, e pela eiloa mo te Atua tela ne ana kalagagina koutou, e tapu.

16Levi 11.44,45; 19.2Me e penei a muna a te Tusi Tapu, “E 'tau mo koutou o tapu, i te mea i au e tapu.”

17E taku ne koutou a ia ko te Tamana, manafai e 'talo koutou ki te Atua, tela e fakamasino faka'pau katoa ne ia a tino, e tusa mo te mea ne fai ne te tino; tela la, e 'tau mo koutou o ava ki a ia i otou olaga katoa i te lalolagi nei.

18Me ko iloa ne koutou a te mea ne 'togi atu ke saoloto ei koutou mai amioga se aoga o otou olaga ne maua ne koutou mai i otou tupuga. E se se mea e matafi tena aoga, kae pela mo te siliva io me ko te aulo e matafi;

19a koutou ne fakasaoloto ki te toto taua o Keliso, tela e pau eiloa mo se tama mamoe e seai ne ona masei io me ne ila.

20A ia ne filifili eiloa ne te Atua ka koi tuai o faite te lalolagi, kae ne fakaasi mai i aso fakaoti konei mō te otou 'lei.

21E talitonu koutou ki te Atua e alatu i a ia, tela ko ia ne fakatu ne ia mai te mate kae avatu foki ki ei te 'malu; tela la, a te otou fakatuanaki mo te otou fakamoemoega, ko mautakitaki i te Atua.

22Kae nei ko oti ne faka'masina koutou i te fakalogo ki te mea tonu, ke alofa fakamaoni foki koutou ki otou taina kelisiano; tela la, ke fakatau alofa fakamaoni koutou mo otou loto katoa.

23Ko oti ne toe fanau fou koutou e alatu i te muna ola a te Atua, tela e tumau ki te se gata mai, e pela mo fanau e fanau mai i matua kola e se oko ki ei te pala, kae se mai matua e oko ki ei te pala.

24Isa 40.6-8E pela mo muna a te Tusi:

“A tino katoa e pau mo mouku,

A te lotou 'malu foki e pela mo se pula;

E magemage te mouku, e tatela foki ona pula,

25Ka ko te muna a te Aliki, e tumau ki te se gata mai.”

A te muna tenei ko te Tala 'Lei tela ko oti ne folafola atu ki a koutou.