ISAIA 58 - Tuvalu Revised Bible

Ko te Fakalikilikiga Tonu

1Muna a te Aliki, “Kalaga malosi ki te mea e mafai ne koutou! Fakaasi atu ki tino o toku fenua ko Isalaelu, a olotou agasala!

2E tapuaki mai latou ki a au i aso katoa, kae fai pela i a latou ko oko eiloa i te manako ke iloa ne latou oku ala kae fakalogo ki aku tulafono. E fai mai i a latou e manako ke avatu ne au ne tulafono tonu, kae e fiafia foki latou o tapuaki mai ki a au.”

3Ne fesili atu a tino penei, “Ai a e fakalikiliki tauanoa ei tatou manafai e seki fia saga mai te Aliki ki a tatou? Ai a ka se kai fua ei tatou, manafai te Aliki e se saga mai ki a tatou?”

Muna a te Aliki ki a latou, “Tenei te mea tonu; i te taimi e fakalikiliki ei koutou, e fai foki eiloa ne koutou a mea e manako koutou ki ei, kae fakasaua foki eiloa ne koutou otou tino galue.

4A otou fakalikilikiga e fai fua ne ia koutou ke saua valevale, tela la, e kinau valevale koutou ko te mea eiloa ko taua valevale. I te otou fakatau, tena te vaegā fakalikilikiga e fai ne ia au ke fakalogo atu ki otou 'talo?

5Kafai ko fakalikiliki koutou, a koutou e taumafai o faka'mae otou foitino; e punou ifo otou ulu ki lalo e pela me se lau o te mouku, kae e takato koutou i luga i gatu lautaga pela foki i luga i lefu. E a, e tena te mea e fakaigoa ko te fakalikilikiga? I te otou fakatau e fiafia au ki te mea tena?

6“A te vaega fakalikilikiga tela e manako au ki ei tenei: Ave keatea a uiga fakasaua mo te se tonu, kae tuku atu a latou kona ne fakasauagina ke olo mo te saoloto.

7Mata 25.34 Tufa atu otou meakai ki tino fia'kai kae tala atu otou fale ki tino mativa kola e seai ne olotou fale. Avatu ne gatu ki a latou kola e seai ne olotou gatu, kae sa ita o fesoasoani ki ou kaiga.

8“Tena la, ka fakaasi atu ei toku fiafia ki a koutou e pela mo te maina mai o te la i te taeao ki a koutou, kae ka faka'lei fakavave foki ne au otou pakiaga. Ka fakatasi atu faeloa au ki a koutou o fakasao koutou; a toku fakatasi atu ki a koutou ka puipui ei koutou i otou feitu katoa.

9Kafai e talo mai koutou ki a au, kae ka tali atu eiloa au ki otou talosaga. Kafai e kalaga mai koutou, au e saga atu eiloa ki a koutou.

“Kafai e fakagata ne koutou otou uiga fakasaua, mo otou loto fia teke, pela foki a muna masei e masani fai sale ne koutou;

10kafai e avatu ne koutou meakai ki tino fia'kai kae fakamalie ne koutou a loto o tino mativa, kae ka mafuli te pouliga tena e nikoi ne ia koutou ki te mainaga o te tutonu.

11Ka takitaki faeloa foki ne au koutou kae fakamalie foki koutou i mea lei e manako koutou ki ei. Ka tausi foki ne au koutou ke tumau i te malosi mo te lei. Ka pela koutou me se fatoaga tela e uke te vai i ei, pela me se vaitafe foliki tela e se mafai o masa pakupaku.

12A tino o te otou fenua ka toe faite aka ne latou a koga ne fakamaseigina, e toe faite aka eiloa i luga i te fakavae mua. Ka iloga koutou ko tino ne toe faite ne latou a pui, ko tino ne toe fakafou ne latou a fale ne maofa.”

Ko te Taui Lei mo te Tausiga o te Sapati

13Muna a te Aliki, “Kafai e faka'malu ne koutou a te Sapati kae se fai ne koutou ne galuega mo te lei o koutou i te aso tena; kafai e fakasilisili ne koutou i otou manatu a toku aso tapu tena, kae faka'malu ne koutou o se olo sale i te aso tena, o se fai ne galuega io me sautala ki mea se aoga,

14tena la, ka maua ei ne koutou a te fiafia tela e auala i te tavini mai o koutou ki a au. Ka fai foki ne au koutou ke fakaaloalogina i te lalolagi katoa, kae ka nofo fiafia foki koutou i te fenua tela ne tuku atu ne au ki te otou tupuga ko Iakopo. Ko au, te Aliki, tena ne faipati atu.”