NUMELA 10 - Tuvalu Revised Bible

Ko Pu Siliva

1Muna a te Aliki ki a Mose,

2“Faite ne pu e lua ki siliva ke fakaaoga mo fakamaopoopo sale a tino, pela foki manafai ko fakatoka o fano te lotou malaga.

3Kafai e fakatagi a pu kona e lua i se taimi leva, ko tena uiga e tau mo te fenua katoa o maopoopo i te mataloa o te Faleie o te Aliki.

4Kae kafai e tasi te pu e fakatagi, ko tena uiga ko takitaki fua o kaukaiga e tau o maopoopo atu ki a koe.

5Kafai e fakatagi fakamotumotu a pu, ko tena uiga ko matakaiga kola e nofo i te feitu ki te saegala ka fakatoka o tiaki te koga tena e nofo ei latou.

6Kafai ko toe fakatagi atu a pu fakamotumotu i te lua o taimi, ko matakaiga ki saute ka fakatoka o tiaki te koga e nofo ei latou. Tena la, ko pu e fakatagi fakamotumotu, ko tena uiga ko tau mo tino Isalaelu o fakatoka o tiaki te koga e nofo ei latou,

7ka ko pu kola e fakatagi fakaloa'loa, ko te fakamaopoopoga o te fenua katoa.

8A pu kona e tau o faka'tagi ne tama tagata a Alona, kola ko faitaulaga.

“Tenei te fakatonuga e tau o tausi ne koutou i taimi katoa fakamuli.

9Kafai ko faitaua mai se fili o koutou i te otou fenua, masaua o fakatagi te pu o te taua i pu kona. Ko au, te Aliki, ka taumafai o fakasao koutou mai otou fili.

10E tau foki o fakaaoga ne koutou a pu kona i aso e fakamanatu ei ne koutou a Kaiga Fiafia o Masina Fou, mo nisi kaiga fiafia aka foki. E fakatagi ne koutou a pu i taimi e ofo mai ei otou taulaga sunu mo taulaga fakafetai. Tena, ka fesoasoani atu ei au ki a koutou. Au ko te Aliki te otou Atua.”

Ko Tiaki ne Tino Isalaelu te Koga e Nofo ei Latou

11I te po luasefulu o te lua o masina, ka ko tusa ei mo te lua tausaga ne tiakina ei ne tino Isalaelu a te fenua o Aikupito, ne masagi aka ei a te kaumana mai luga o te Faleie o te Aliki,

12tena ne ma'laga atu ei a tino Isalaelu keatea mo te Vao o Sinai. Ne toe fanaifo te kaumana tena i te Vao o Palana.

13A te taimi e ma'laga ei latou, e fakatonu mai eiloa ne te Aliki e auala i a Mose.

14I taimi katoa e fano ei te malaga a latou, e olo eiloa latou i olotou tulaga. A latou kola i lalo o te fuka a te vaega tela e takitaki ne te matakaiga o Iuta, e kamata ne latou te solo, kae solo eiloa i potukau takitasi. Ko te takitaki o latou, ko Nasona te tama tagata a Aminatapu.

15Netanelu, te tama a Sualo e takitaki i te matakaiga o Isakala,

16ka ko Eliapo, te tama tagata a Helona e takitaki i te matakaiga o Sepulona.

17Tena, ko te Faleie o te Aliki ka tuku ifo ki lalo, ka ko kaukaiga o Kelesona mo Melali kola e amo ne latou, ka kamata o ma'laga.

18Tao atu i tua, ko latou kola i lalo o te fuka o te vaega tela e takitaki ne te matakaiga o Leupena, e solo eiloa i olotou potukau. Ko Elisula, te tama tagata a Setulo e takitaki i a latou.

19Ko Selumielu, te tama tagata a Sulisatai e takitaki i te matakaiga o Simeona,

20ka ko Eliasafo, te tama tagata a Teuelu e takitaki i te matakaiga o Kato.

21Tena, ka tao atu i tua ko te kaukaiga o Koate, i te matakaiga o Levi, mo kope tapu o te Faleie o te Aliki. I te taimi e oko atu ei latou ki te koga ka toe ma'nava ei latou, ka ko te Faleie ko tau o oti ne fakatu.

22Ka tao atu i tua o latou kona, ko te vaega tela e takitaki ne te matakaiga o Efalaima. E solo eiloa latou i olotou potukau takitasi, ka ko Elisaia, te tama tagata a Amiuta ko te takitaki o latou.

23Ko Kamalielu, te tama tagata a Petasula e takitaki i te matakaiga o Manase,

24ka ko Apitano, te tama a Kiteone e takitaki i te matakaiga o Peniamina.

25A latou kola i lalo o te fuka o te vaega tela e takitaki ne te matakaiga o Tanu, e fakaoti ne latou te solo. E solo eiloa latou i olotou potukau takitasi, ka ko Aiesa, te tama tagata a Amisatai ko te takitaki o latou.

26A Pagielu, te tama tagata a Okilani ko te takitaki o te matakaiga o Asela,

27ka ko Aila, te tama tagata a Enanu ko te takitaki o te matakaiga o Nafatali.

28Tena te fakasologa o te solo a te fenua o Isalaelu i te taimi e tiakina ei ne latou te koga ne ma'nava ei latou.

29Ne faipati atu a Mose ki tena ma ko Hopapu, te tama tagata a Ietelo te tagata Mitiana penei: “A matou nei ka fai o ma'laga atu ki te koga ne tauto mai ei te Aliki ke tuku mai mo matou. Ne tauto te Aliki me ka fakamaumea ne ia Isalaelu, tela la, vau ke olo tasi tatou, ke faitasi tatou i te motou manuia.”

30Muna a Hopapu, “Ikai, au ka foki ki toku fenua tonu.”

31Muna a Mose, “Fakamolemole, sa fano kae tiakina mai matou. A koe e malamalama i kogā koga lei e tau o ma'nava ei matou, kae e talia foki ne matou ke takitaki ne koe matou.

32Kafai e vau koe i a matou, ka manuia fakatasi tatou i te manuia tela ka aumai ne te Aliki ki a matou.”

Ko Fano te Malaga

33I te tiakinaga ne tino Isalaelu a te Mauga tapu o Sinai, ne faimalaga latou i aso e tolu. A te Pusa o te Feagaiga a te Aliki e fano faeloa i olotou mua o salasala se koga lei mo olotou fakama'nava.

34I te taimi e ma'laga atu ei latou mai i koga ne fakama'nava ei latou, ka ko te kaumana a te Aliki e fano eiloa i luga o latou i te ao.

35