1Ne ufi ne te Aliki a te fa'kai o Siona ki te pouliga ona eiloa ko tena kaitaua.
A te gali faka‐te‐lagi o Siona ko palele ne fuli ne Ia ki te masei valevale.
I te aso ne kaitaua ei a Ia, ne tiakina foki eiloa ne Ia a tena Faletapu.
2Ne ofa fakamasei ne te Aliki a fa'kai katoa i Iuta.
Kae ofa foki a pui kola e puipui ei a te fenua.
Ne fakamasiasi ne Ia a te malo mo ona takitaki.
3Ne fakaseaoga ne Ia a te malosi o Isalaelu i tena kaitaua;
Ne ita ma fesoasoani mai ki a matou i te taimi ne o'mai ei omotou fili.
Ne oso mai tena kaitaua ki a matou e pela me se afi,
Tena ne fakamasei ei a mea katoa.
4Ne fakatonu mai ana matasana ki a matou,
E pela a Ia me se fili o matou;
Ne tamate katoa ne Ia a tamataene malie'lie o te motou fenua.
Ne lagona ne matou i konei i Ielusalema a te 'kona o tena kaitaua.
5Ne ofa fakamasei ne te Aliki a Isalaelu
E pela eiloa a Ia me se fili o matou.
Ne ofa ne Ia a olo mo palesi o Isalaelu.
Ne aumai ne Ia te fanoanoa e se gata mai ki tino o Iuta.
6Ne ofa likiliki ne Ia a te Faletapu,
Te koga e tapuaki sale ei matou ki a Ia;
Ko oti ne fakagata ne Ia a aso fakamanatu mo Sapati.
Ko tupu fakatasi mo faitaulaga ko oti ne lagona ne latou te malosi o tena kaitaua.
7A te Aliki ko se manako ki tena fata-fai-taulaga,
Kae ko fano keatea foki mai tena Faletapu;
Ne talia ne Ia a te fili ke ofa ne latou a ona 'pui ki lalo.
Ne kalaga latou mo te manumalo i te koga ne masani sale matou o fai tapuakiga i ei.
8Ko te ikuga eiloa a te Aliki ke ofa a 'pui o Siona;
Ne fua fakalei eiloa ne ia a te koga tena,
Ko te mea ke maofa katoa a mea katoa kona.
A taoa mo pui ko maofa katoa.
9A mataloa o te fa'kai ko tanumia ne mea ne maofa,
Mo fiti o latou ko maofa likiliki.
A te tupu mo tino maluga ko nofo nei i te fenua ne ave fakapagota ki ei latou.
Ko seai se tino e akoako ne Ia a te Tulafono,
Mo pelofeta foki ko se maua ne latou ne fakaasiga mai i te Aliki.
10A toeaina o Ielusalema ko sagasaga fua i luga i te laukele kae se ua,
Mo olotou ulu e fonu i lefu, kae 'pei fua ki lautaga.
A tamafine ko punou fua olotou ulu ki lalo i te laukele.
11A oku mata ko mae i te tagiga;
A toku agaga ko fanoanoa.
Au ko vaivai eiloa i te fanoanoa i te tāga mo te fakamaseiga ne oko ki oku tino mo toku fenua.
A tamaliki mo pepe ko mata'po valevale i auala o te fa'kai.
12Ko tagi fua ki olotou matua me ko fiakai kae fiainu;
Ko siga latou i te auala e pela eiloa me ko pakia,
Kae mate lemu ifo eiloa i lima o olotou matua.
13Ielusalema, Ielusalema toku fa'kai fakapelepele,
Se a foki taku pati ka mafai o fai atu?
Ka fakamafanafana pefea ne au a koe?
E seki ai eiloa se isi tino kai puapuaga fita penei mo koe.
A te puapuaga tena ne oko ki a koe e seai ne ana tuakoi e pela eiloa mo te moana;
E seai eiloa se fakamoemoega 'lei mo koe.
14A ou pelofeta e faipati faeloa ki te loi;
A koutou e fakaloiloi faeloa ne latou i olotou lauga,
Me e se mafai o fakaasi atu a otou agasala.
Ne fai ne ia koutou ke mafaufau koutou pela i a koutou e 'lei faeloa.
15A tino kola e fakasili aka i te fa'kai e kilo mo te fakatauemu ki a koe.
E lulu olotou ulu kae kata i a Ielusalema ko maofa valevale, kae fai mai olotou muna penei,
“Mea nei ko te fa'kai tela e fai pela me se fa'kai gali?”
“Mea nei ko te fa'kai tela e fakamatamata ki ei te lalolagi?”
16A ou fili e kata fakalili atu ki a koe,
Kae 'pula toka atu mo te kaitaua ki a koe.
E fakamasei olotou laugutu kae fai aka penei,
“Ko oti ne ofa ne tatou!
Tenei te aso ne fakatalitali ki ei tatou!”
17Tenei ko fakataunu eiloa ne te Aliki a te mea ne mafaufau a Ia o fai:
Ko ta fakamasei ne Ia tatou mo te se alofa,
E pela eiloa mo tena folafolaga ki a tatou i aso mua.
Ne tuku ne Ia te manumalo ki omotou fili,
Ne fakafiafia ne Ia latou i te fakatakavalega o matou.
18Ielusalema, a pui o koe ke tagi atu ki te Aliki!
A ou loimata ke tafe pela me ne vaitafe i ao mo po;
Ave tou foitino ke vaivai i te tagi fanoanoa!
19Masaua o ala soko faeloa i te po katoa o tagi sale ki te Aliki;
Ligi atu a fanoanoaga katoa o tou loto ki te Aliki,
Kae fakamolemole atu ki a Ia ke alofa mai ki au tamaliki kola ko mate fiakai i feitu auala katoa!
20Te Aliki, kilo mai ki tino konei ko fakapuapuaga ne koe!
A fafine ko kai ki foitino o tamaliki fakapelepele a latou!
A faitaulaga mo pelofeta ko tamate i loto i te Faletapu!
21A tamaliki mo tino matua ko tafola valevale i loto i auala,
A tamataene mo fafine ko mate valevale i pelu a te fili.
Ne 'ta valevale ne koe latou i te taimi o tou kaitaua.
22Ne kami mai ne koe oku fili ke mai o ta valevale matou,
Kae seai eiloa se tino e mafai o sao i te aso ne kaitaua ei koe.
Ne tamate ne latou aku tamaliki kola ne puti aka ne au kae pele i toku loto.
Who We AreWhat We EelieveWhat We Do
2025 by iamachristian.org,Inc All rights reserved.
