NUMELA 14 - Tuvalu Revised Bible

Ko Mui'mui a Tino Isalaelu

1I te po katoa, a tino e tagi faeloa i te puapuaga.

2Ne fakatagi atu latou ki a Mose mo Alona mo te se ma'lie, muna a latou penei, “E lei atu moi ne mate atu eiloa tatou i Aikupito, io me i te vao i konei!

3Ai a e aumai ei tatou ne te Aliki ki te fenua tena? Ka mate fua tatou i te taua, ka ko otou avaga mo tama'liki ka puke fakapagota. Kaati e lei atu ma toe foki tatou ki Aikupito.”

4Tena ne faipati aka ei latou penei, “Tatou ka fili se takitaki ke taki ne ia tatou ki Aikupito!”

5Tena ne fakasiga ifo a Mose mo Alona ki te laukele i mua o te fenua katoa.

6Ka ko Iosua, te tama tagata a Nuno, mo Kalepo te tama tagata a Iefune, kola ko tino lamalama e tokolua mai te tinogafulu mo te tokolua, ne saesae o la gatu i te fanoanoa

7kae fai atu ki tino Isalaelu penei, “A te fenua ne olo matou o iloilo, se fenua tafasili i te lei.

8Kafai e fiafia mai a te Aliki ki a tatou, e ave eiloa ne ia a tatou ki te fenua maumea kae laukele ola tena, kae e tuku mai eiloa ne ia mo tatou.

9Epe 3.16 Sa teke ki te Aliki, kae sa ma'taku foki ki tino kona e nofo i te fenua tena. E fakatakavale gofie fua ne tatou. A te Aliki e kau mai ki a tatou. Ko oti ne fakatakavale ne ia a atua o latou, tela la, sa ma'taku.”

10A te fenua kātoa o Isalaelu ko taumafai o peipei laua kona ki fatu ke mate, kae e poi eiloa a tino i te mainaga o te Aliki e sae ake i luga o te Faleie.

Ko Talo a Mose mo Tino Isalaelu

11Muna a te Aliki ki a Mose, “E gata mafea te loto teke o tino ki a au? Tefea te taimi ka talitonu mai ei latou ki a au; ko fia nei a mea fakaofoofogia ne fai ne au mo latou?

12Ka aumai ne au se famai tela ka ta fakapalele ei latou. Ka ko koe ka fai ne au mo tupuga o se malo e lasi kae malosi atu i a latou!”

13 Eso 32.11-14 Kae ne fai atu a Mose ki te Aliki penei, “Ne aumai ne koe a tino konei mai Aikupito ki tou mana. Kafai e lagona ne tino Aikupito te mea tenei ka fai ne koe ki ou tino,

14ka fakailoa ne latou ki tino konei e nofo i te fenua tenei. A tino i konei ko leva ne iloa ne latou i a koe, e te Aliki, e fakatasi mai ki a matou. E matea faka'lei ne latou a koe manafai e tu tou kaumana i luga o matou. E iloa foki ne latou me i a koe e fano i omotou mua e foliga ki te pou kaumana i te ao ka ko te po e foliga ki te pou afi.

15Kafai e tamate nei ne koe ou tino, a malo kola ko oti ne logo i tou mana ka faipati aka pela

16me ne tamate ne koe ou tino i te vao me ko se maua ne koe o fakaoko latou ki te fenua ne tauto ei koe ke tuku mo latou.

17Tela la, e te Aliki, au e talo atu ke fakaasi mai tou mana o fai te mea ne tauto mai ei koe i tau fai maiga penei,

18Eso 20.5,6; 34.6,7; Teu 5.9,10; 7.9,10 ‘Au, te Aliki, e se kaitaua vave, kae e fakaasi ne au te fakamaoni mo te alofa, kae e fakamagalo foki ne au a agasala mo amioga teke a tino. Kae e fakasala eiloa ne au a fanau mo mokopuna i te tolu mo te fa o tupulaga e tusa mo te agasala a olotou matua.’

19Tela la, e te Aliki, e tusa mo te lasi o tou alofa tumau, ko talo atu ei au nei, ke fakamagalo mai a agasala a tino konei, e pela eiloa mo te fakamagaloga sale ne koe latou talu mai te taimi ne tiaki ei ne latou te fenua o Aikupito.”

20Ne tali mai a te Aliki penei, “Ka fakamagalo ne au a latou, e pena mo tau fakamolemole.

21Epe 3.18 Ka ko au e tauto atu me e pela eiloa mo te tonu o te muna tenei, i te lalolagi e fonu i toku mainaga,

22e pena foki te tonu o taku muna tenei me e seai eiloa se tino i tino konei e ola ka ulu ki loto i te fenua tena. Ko oti ne matea ne latou a toku mainaga, mo mea fakaofoofogia kola ne fai ne au i Aikupito, pela foki i te vao, kae ne o'mai faeloa o tofotofo mai au kae se faka'logo mai ki a au.

23Ka se ulu eiloa latou ki loto i te fenua ne tauto atu ne au ki olotou tupuga. E seai eiloa se tino i a latou kola ne teke mai ki a au e ulu ki loto i te fenua tena.

24Iosu 14.9-12 Ko taku tavini fua ko Kalepo e kese ona mafaufauga, kae e tumau eiloa tena fakamaoni mai ki a au, tela la, ka avatu ne au a ia ki loto i te fenua tena ne onoono a ia ki ei, ka ko tena gafa ka fai mo latou a te fenua tena,

25tela e nofo ei a tino Amaleka mo tino Kanana i vanu. Taeao, ko 'foki atu koutou ki te vao ite auala e fakasaga ki te Mataosoga o Akapa.”

Ko Fakasala a Tino Isalaelu

26Muna a te Aliki ki a Mose mo Alona,

27“E gata afea te mui'mui mai o tino konei ki a au? Ko fiu oku taliga i fakatagi a latou!

28Tenei te tali ka tuku atu ne koulua ki a latou: ‘Au e tauto atu, me ka fai eiloa ne au a te mea e tau o fai ne au ki a koutou. Ko au, te Aliki, tenei e faipati atu.

29Epe 3.17 A koutou ka 'mate, ka ko otou foitino mate ka salalau i te vao. Ona ko koutou ne tagi mo te se ma'lie ki a au, e seai eiloa se tino mai luga o te luasefulu tausaga e ulu ki loto i te fenua.

30Au ne tauto ke faka'nofo koutou i te fenua tena, kae e seai eiloa se tino o koutou e talia ne ia, na ko Kalepo eiloa mo Iosua.

31A koutou ne fai mai i otou tamaliki e puke fakapagota mafai ko takavale koutou, kae e fai atu au penei me ka ave ne au latou ki loto i te fenua tena ne se ma'nako koutou ki ei, kae ka fai mo fenua o latou.

32A koutou ka mate i konei, i te vao tenei.

33Galu 7.36 A otou fanau ka maumau solo i te vao i tausaga e fasefulu. Ka puapuaga eiloa latou e pogai mai i te se fakamaoni o koutou, ke oko eiloa ki te taimi e palele atu koutou ne mate.

34Ka puapuaga koutou i tausaga e fasefulu, ona ko otou agasala. E fasefulu aso ne iloilo ei a te fenua ne otou tino lamalama, tela la, a aso kona ka fuli ki tausaga ka puapuaga ei koutou. Ka iloa foki ne koutou te se 'lei manafai ko kaitaua au ki a koutou!

35Au e tonu me e fai eiloa ne au a te mea tenei ki tino masei kola ne kau fakatasi o teke mai ki a au. Tenei te vao ka mate katoa ei a tino o koutou. Ko au te Aliki, kona aku pati!’ ”

36A tagata kola ne uga ne Mose ke iloilo faka'lei a te fenua, ne o'mai mo te lipoti se tonu, tela ne mafua ei te se ma'lie o tino ki te Aliki.

37Tena la, ne aumai ne te Aliki a te famai, tena ne mate katoa ei a tino lamalama kona.

38Ko Iosua fua mo Kalepo ne sao mai i te tinogafulu mo te tokolua kona.

Ko te Taumafaiga Muamua o Puke a te Fenua(Teu 1.41-46)

39I te fa'kailoaatuga ne Mose ki tino Isalaelu a muna a te Aliki, tena ne tagi mautuutu ei latou.

40I te tafataeao o te sua aso ne olo ei latou o puke a te fenua maugā, olotou muna, “Ko toka nei matou o olo ki te koga ne fai mai ei te Aliki. Ko iloa ne matou i a matou ko oti ne agasala.”

41Kae ne fai atu a Mose penei, “Ai a ko se faka'logo ei koutou ki te Aliki i te taimi nei? A koutou se manumalo!

42Sa olo. A te Aliki e se fakatasi atu ki a koutou, ka ko koutou ka takavale i otou fili.

43Kafai e tau koutou mo tino Amaleka mo tino Kanana, a koutou e mate; a te Aliki ka se fakatasi atu ki a koutou, me i a koutou ne seki faka'logo ki a ia.”

44Tena, ne olo eiloa latou ki te fenua maugā, ka ko te Pusa o te Feagaiga a te Aliki, pela foki mo Mose, ne nofo eiloa i te koga ne nofo ei latou.

45Tena, ne fakatakavale eiloa latou ne tino Amaleka mo tino Kanana kola e nofo i kona, kae ne atuli atu latou ke oko eiloa ki Holema.