NUMELA 28 - Tuvalu Revised Bible

Ko Taulaga e Fai Sale(Eso 29.38-46)

1Ne fakatonu ne te Aliki a Mose

2ke fakatonu atu ki tino Isalaelu ke ofo atu ne latou ki te Atua i taimi ko oti ne fakasino mai, a te aofaki tau o taulaga meakai kola e fiafia ki ei a ia.

3Konei a taulaga meakai kola e tau o tuku atu ki te Aliki: a te taulaga sunu i aso takitasi, e tau o lua mamoe tagata ko takitasi tausaga kae seai ne pona.

4E tasi ke ofo i te taeao kae tasi i te afiafi.

5Konei a mea o te taulaga saito e tau o ofo atu mo te mamoe e tasi: e tasi te kilokalame o falaoa e palu ki te lita e tasi o te sinu olive tafasili i te lei.

6Tenei te taulaga i aso takitasi tela e sunu katoa, tela ne ofo muamua eiloa i te Mauga o Sinai e fai mo taulaga meakai; ko tena manogi e fiafia ki ei te Aliki.

7A te taulaga uaina e fakatasi ki te taulaga muamua, e tasi te lita o te uaina ke ligi atu ki te fata-fai-taulaga.

8I te afiafi, ofo atu a te sua mamoe e pela eiloa mo te taulaga i te taeao, fakatasi mo te taulaga uaina. A te mea tena se taulaga meakai foki, ko tena manogi e fiafia ki ei te Aliki.

Ko Taulaga i te Sapati

9I te Sapati, ofo mai e lua mamoe tagata ko takitasi tausaga kae seai ne pona, e lua kilokalame o falaoa e palu tasi mo te sinu olive, e fai mo taulaga saito, fakatasi mo te taulaga uaina.

10A te taulaga sunu tenei e tau o ofo mai i Sapati katoa, e fakaopoopo ki te taulaga i aso takitasi mo tena taulaga uaina.

Ko te Taulaga i te Aso Muamua o te Masina

11Masaua o ofo atu se taulaga sunu ki te Aliki i te kamataga o masina takitasi: e lua tamā pulumakau tagata, e tasi te mamoe tagata, e fitu tamā mamoe tagata ko takitasi tausaga, kae seai ne pona.

12A te taulaga saito, e tau ne falaoa e palu mo te sinu olive: e tolu kilokalame falaoa i te pulumakau e tasi; e lua kilokalame falaoa e ofo tasi mo te mamoe tagata;

13kae e tasi te kilokalame falaoa i te tamā mamoe e tasi. A taulaga sunu konei ne taulaga meakai, ko te manogi e fiafia ki ei te Aliki.

14A te taulaga uaina e penei: e lua lita o te uaina ke ofo tasi mo pulumakau tagata takitasi, e tasi mo te āfa ke ofo tasi mo te mamoe tagata, kae tasi te lita ke ofo tasi atu mo tamā mamoe takitasi. Tena te fakatonuga mo taulaga sunu i aso muamua o masina takitasi i te tausaga katoa.

15Kae fakatasi atu ki te taulaga sunu i aso takitasi mo tena taulaga uaina, ofo mai se kouti tagata e fai mo taulaga mo te fakamagaloga o agasala.

Ko Taulaga i te Kaiga Fiafia o Falaoa se Faka'fete(Levi 23.5-14)

16 Eso 12.1-13; Teu 16.1,2 A te kaiga o te Paseka e fakaaloalo ei te Aliki e tau o fai i te po sefulu fa o te masina muamua.

17Eso 12.14-20; 23.15; 34.18; Teu 16.3-8 I te po sefulu lima, e kamata ei a te kaiga faka te lotu tela e fai i aso e fitu; i aso kona e tapu se tino e kai ki falaoa e palu ki te isi.

18I te aso muamua o te kaiga fiafia tena, e tau mo koutou o maopoopo o fai tapuakiga, kae e seai ne galuega e tau o fai.

19Masaua o ofo se taulaga sunu ke fai mo taulaga meakai ki te Aliki: e lua tamā pulumakau tagata, e tasi te mamoe tagata, kae e fitu tamā mamoe ko takitasi tausaga, kae seai katoa ne pona.

20Ofo mai foki te aofaki tau o taulaga saito o falaoa e palu mo te sinu olive: e tolu kilokalame falaoa ki te tamā pulumakau tagata e tasi, e lua kilokalame o falaoa ki te mamoe tagata,

21kae takitasi kilokalame o falaoa ki tamā mamoe takitasi.

22Ofo mai foki se kouti tagata e tasi ke fai mo taulaga mo agasala, i te taimi tena ko tau foki ei o fai se sauniga e faka'ma ei a tino.

23A taulaga kona e fakaopoopo atu ki taulaga sunu i taeao takitasi.

24A te taulaga tena e tau o ofo i aso takitasi o aso kona e fitu; ko te manogi e fiafia ki ei te Aliki. A te taulaga tena e fakaopoopo ki te taulaga sunu mo te taulaga uaina i aso takitasi.

25I te fitu o aso, ke maopoopo foki koutou o fai tapuakiga, kae seai ne galuega e tau o fai.

Ko Taulaga i te Kaiga Fiafia o te Katiga o Saito(Levi 23.15-22)

26 Eso 23.16; 34.22; Teu 16.9-12 I te aso muamua o te Kaiga o te Katiga o Saito, i te taimi e ofo mai ei ne koutou a taulaga o te saito muamua ki te Aliki, e tau koutou o maopoopo mo tapuakiga kae seai ne galuega e tau o fai.

27Tenei te taulaga sunu e tau o ofo ne koutou, ko tena manogi e fiafia ki ei te Aliki: e lua tamā pulumakau tagata, e tasi te mamoe tagata, kae fitu tamā mamoe tagata ko takitasi tausaga, kae seai katoa ne pona o latou.

28Ofo mai te aofaki tau o falaoa e palu tasi mo te sinu olive; e tolu kilokalame o te falaoa i tama pulumakau tagata takitasi; e lua kilokalame o falaoa i te mamoe tagata,

29kae takitasi kilokalame o falaoa i tamā mamoe takitasi.

30Ofo mai foki se kouti tagata e tasi e fai mo taulaga mo agasala, tena ko fai foki ei se sauniga e faka'ma ei a tino o te fenua.

31Ofo mai a mea kona mo te taulaga uaina e fakatasi atu ki taulaga sunu mo taulaga saito kola e fai sale i aso takitasi.