1I te fanoifoga a Iesu mai te mauga, ne tau'tali atu i a ia a te vaitino e tokouke.
2Ne vau te tagata lepela ki a ia kae totuli i ona mua kae fai atu, “Te Aliki, kafai e loto koe ki ei, faka'lei la toku masaki.”
3Ne 'kapa atu a te lima o Iesu o fakapatele ki a ia, kae fai atu, “Au e loto ki ei, ke 'lei koe!” I kona foki eiloa 'lei ei tena lepela.
4Levi 14.1-32 Ne fai atu a Iesu ki a ia, “Kiloke, sa taku atu ki se tino; kae fano koe o fakaasi atu ki te faitaulaga, kae tuku foki ne koe a te taulaga ne fakatonu ne Mose, e fakapatonu ki tino katoa i a koe ko se lepela.”
Ko te Faiga ne Iesu ke 'Lei te Masaki o te Tavini a te Takitaki o te Tokoselau(Luka 7.1-10)5I tena okoga ki Kapanaumi, ne vau a te takitaki o te tokoselau o fakamolemole mai ki a ia,
6“Te Aliki, a taku tavini e takato nei i te fale, me ko oko eiloa i te masaki kae se maua ne ia o gasuesue.”
7Ne fai atu a Iesu ki a ia, “Au ka fanatu o faka'lei a ia.”
8Ne tali mai te takitaki o te tokoselau, “Te Aliki, e se 'tau ke ulu mai koe ki toku fale; kae fai mai fua tau fakatonuga, ko 'lei ei taku tavini.
9Au foki se tagata e nofo mai lalo i pulega a takitaki ma'luga, kae isi ne sotia mai lalo i a au. E fai taku fakatonuga ki te tino tenei, ‘Fano!’ ko te mea eiloa ko fano; e fai taku fakatonuga ki te tino tela, ‘Vau!’ ko te mea eiloa ko vau; kae fai atu foki taku fakatonuga ki taku pologa, ‘Fai te mea tenei!’ ko te mea eiloa ko fai.”
10Ne ofo a Iesu i te lagonaga ne ia a te mea tenei; fai atu ei a ia ki tino kola ne tau'tali mai i a ia, “E tonu, au e fai atu ki a koutou, e seki maua eiloa ne au se fakatuanaki penei i Isalaelu!
11Luka 13.29 Au e fai atu ki a koutou, e tokouke e o'mai mai te sopogala mo te togala, kae ka 'kai fakatasi mo Apelaamo, Isaako mo Iakopo i te Malo o te lagi.
12Mata 22.13; 25.30; Luka 13.28 Ka ko fanau a te Malo e afuli ki tua i te pouliga; i te koga tela e iai te fakatautagiga mo te gaii o nifo i ei.”
13Ne fai atu a Iesu ki te takitaki o te tokoselau, “Fano ki tou fale, ka fai eiloa pela mo te mea ne talitonu koe ki ei.” I te taimi eiloa tena, 'lei ei tena tavini.
Ko Faka'lei ne Iesu a Tino Ma'saki e Tokouke(Male 1.29-34; Luka 4.38-41)14I te okoatuga a Iesu ki te fale o Petelu, ne lavea ne ia te matua o te avaga a Petelu e takato, e pokotia ne te fiva.
15Ne puke atu a ia ki tena lima, 'lei ei mo tena fiva, tu ake ei a te fafine o laulau atu meakai ki a ia.
16I te afiafi, ne aumai ne latou ki a ia a tino e tokouke ne pukea ne temoni; kae ne tuli keatea agaga ma'sei ki te muna, kae faka'lei katoa ne ia a tino kola ne ma'saki.
17Isa 53.4Ne fai ne ia a te mea tena ke fakataunu ei a muna a te pelofeta ko Isaia, “Ne amo ne ia o'tou puapuaga kae faka'lei ne ia o'tou masaki.”
Ko Tino e Fia Tau'tali ki a Iesu(Luka 9.57-62)18I te laveaga ne Iesu a te vaitino e tokouke ko mumu atu ki a ia, fai atu ei ki a latou ke olo ki te sua feitu o te namo.
19Ne vau a te faiakoga o te Tulafono ki a ia, ana muna, “Te Faiakoga, au e toka o tautali atu i a koe ki so se koga e fano koe ki ei.”
20Ne tali atu a Iesu ki a ia, “E isi ne lua o alope, mo manu eva e isi foki ne olotou ofaga, ka ko te Tama a te Tagata, e seai se koga mo ona fakatapū.”
21Ne fai mai ki a ia a te sua soko, “Te Aliki, tuku mua mai au ke fano o tanu toku tamana.”
22Ne tali atu a Iesu ki a ia, “Tautali mai i a au, kae tuku i ei a tino 'mate ke tanu olotou tino 'mate.”
Ko Fakamalū ne Iesu a te Afā(Male 4.35-41; Luka 8.22-25)23Ne sopo a Iesu ki te poti; olo fakatasi ei mo ona soko.
24E 'poi eiloa me ko agi te afā ko se atafaia eiloa, ka ko te poti ko tuki masei ne peau, ka ko Iesu e moe.
25Ne olo atu ona soko ki a ia o 'fagu, olotou muna, “Te Aliki, fakaola mai matou, i a matou ka 'mate.”
26Ana muna ki a latou, “Ai a e ma'taku ei koutou, tino fo'liki fakatuanaki?” Tela, tu ake a ia kae fakagata ne ia te matagi mo peau; kae to mo te malū.
27Ne ofo katoa ona soko, kae fai mai, “Se a te vaega tino penei? A te matagi mo peau ko faka'logo ki a ia!”
Ko Faka'lei ne Iesu a te Tokolua Tagata ne Pukea ne Temoni(Male 5.1-20; Luka 8.26-39)28I tena okoga ki te sua feitu o te namo i te fenua ko Katala, ne fakafetaui mai ki a ia tagata e tokolua ne pukea ne temoni, ne o'mai i tanuga; e fakama'taku laua, tena eiloa te pogai e se olo sale ei a tino i te auala tena.
29Kae kiloke, ne ka'laga mai laua, “Ne a au mea ka fai ki a maua e te Tama a te Atua? Ko vau nei koe o fakafi'ta maua ka koi tuai o oko ki te taimi tonu?”
30E isi se lafu puaka e kai'kai pili mai ki a latou.
31Ne fakamolemole atu a temoni ki a Iesu, “Kafai e atuli matou ne koe ki tua, uga atu matou ke ulu ki loto i te lafu puaka tena.”
32Fai atu ei a Iesu ki a latou, “Olo.” Tela, olo eiloa latou o ulu ki loto i puaka; kae kiloke, a lafu puaka katoa ne 'tele ifo ki kaugutu o te namo, 'mate katoa eiloa latou.
33Ne 'tele keatea a tausi puaka, kae olo ki te fa'kai o taku atu a mea katoa ne 'tupu ki te tokolua tagata ne pukea.
34Kae kiloke, a tino katoa o te fa'kai ne o'mai o fakafetaui ki a Iesu; kae i te lotou mateaga a Iesu, ne fakamolemole mai latou ki a ia ke fano keatea mai te lotou fenua.
Who We AreWhat We EelieveWhat We Do
2025 by iamachristian.org,Inc All rights reserved.
