1Mai tua ifo, ne sala ne Apisaloma se kaliota mo ona sopo, mo ne solofanua, mo ne tagata e tino lima ke tausi a ia.
2E ala 'malu sale a ia o fano o tu i tafa o te auala, i te mataloa o te fa'kai. A tino kola e o'mai ki te tupu ke faka'tonu aka a mea e se ma'lie ki ei, e taofi sale ne Apisaloma o sili ki ei me ko latou ne o'mai mai fea. Kafai ko oti ne taku atu a matakaiga ne o'mai latou mai i ei,
3ko Apisaloma eiloa ko fai atu penei, “Kiloke, a koe e sao, kae e seai la nei se sui mai i te tupu ke fakalogologo ki tau tagi.”
4Kae ne toe fai atu a ia penei, “Aku muna eiloa i a au se famasino! Ko latou kola e isi ne olotou tagi ke o'mai ki a au, kae ka fakamasino ne au ki te mea tonu.”
5Kafai e fanatu te tino tena ki a Apisaloma o punou i ona mua, kae puke atu Apisaloma ki ei o sogi atu ki ei.
6Ko tino katoa kola ne o'mai ki te tupu ke maua se ikuga 'lei ki olotou tagi, ne fai katoa pena ne Apisaloma, tela la, ne taku 'lei eiloa a ia ne tino kona.
7Mai i tua o te faa, tausaga, kae fai atu a Apisaloma ki a Tavita penei, “Tou Malu, tuku mai au ke fano ki Hepelona, ke fakataunu taku tautoga ne fai ki te Aliki.
8I taku nofoga i Kesula i Sulia, au ne tauto ki te Aliki me kafai e fakafoki ne ia a au ki Ielusalema kae ka tapuaki atu au ki a ia i Hepelona.”
9Muna a te tupu, “Fano mo te manuia.” Tena ne fano ei a Apisaloma ki Hepelona.
10Kae ne uga ana avefekau ki matakaiga katoa o Isalaelu mo te fekau tenei, “Kafai ko lagona ne koutou te tagi o pu, ko koutou eiloa ko ka'laga penei, ‘A Apisaloma ko fai nei mo tupu i Hepelona!’ ”
11E luaselau tagata ne olo i a Apisaloma mai Ielusalema; e se iloa ne latou te togafiti a Apisaloma, kae ne olo eiloa mo te loto fia tau'tali i a Apisaloma.
12I te taimi ne fai ei a taulaga a Apisaloma, kae ne uga foki tena fekau ki te fa'kai o Kilo, ki a Aitofele, se tagata fakatonutonu a te Tupu ko Tavita, ke fanatu. Ne gasolo eiloa o mataonomea te togafiti o 'teke te tupu, mo te kau e tau'tali i a Apisaloma e gasolo foki eiloa o tokouke.
Tavita ko Sola Keatea mai Ielusalema13Ne oko atu te avefekau mo te fekau ki a Tavita penei, “A tino Isalaelu ko 'kau ki a Apisaloma.”
14Tena ne fai atu ei a ia ki ana ofisa katoa kola e nofo mo ia i Ielusalema penei, “A tatou e 'tau o 'tele keatea fakavave mai i konei, ke se maua tatou ne Apisaloma! Fakavave! Ko pili nei kae oko mai o fakatakavale tatou kae 'ta a tino katoa i te fa'kai!”
15Ne tali mai latou, “Tou Malu, e tonu. Matou e toka faeloa o tau'tali atu i te mea e manako koe ke fai ne tatou.”
16Tena ne fano ei te tupu, fakatasi mo tena kaiga katoa, mo ana ofisa, kae ne tuku ne ia ana avaga fakasalasala e tinoagafulu ke nofo o tausi te palesi.
17I te tiakinaga ne te tupu mo tena kau malaga katoa a te fa'kai, ne 'tu latou i te fale fakaoti eiloa.
18Ne 'tu katoa ana ofisa i ana tafa, kae faka'sili aka mo ana sotia tausi i ona mua. A te onoselau sotia kola ne tau'tali mai i a ia mai i Kata, ne faka'sili aka foki i ana mua,
19kae fai atu mo te tupu ki a Itai, te takitaki o latou penei, “Ai ā e vau ei koe i a matou? Fano o tautali i te tupu fou. A koe se tino fakaatea, e nofo 'mao mai tou fenua tonu.
20A koe nei ne nofo i konei i se taimi toetoe fua, ka i ā ka ave ei ne au a koe ke oloolo sāle taua? Au nei, e se iloa foki nei ne au te koga e 'tau o fano au ki ei. 'Foki nei mo ou tino, ke alofa kae fakamaoni atu te Aliki ki a koe.”
21Kae ne tali atu a Itai, “Tou Malu, au e tauto atu ki a koe i te igoa o te Aliki i au e tautali atu eiloa i a koe i so se koga e fano koe ki ei, ke oko foki eiloa ki te mate.”
22Ne tali atu Tavita, “Ko 'lei! Olo i mua!” Tena ne solo atu eiloa te kau a Itai mo olotou avaga mo tama'liki.
23Ne 'tagi paka'laga a tino i te ologa o Tavita mo tino kola e tautali i a ia. Ne sopo atu te tupu ki te suā feitu o te vai o Kitilona, kae tau'tali atu eiloa tena kau malaga, tena olo atu eiloa latou ki te vao.
24A Satoka, te faitaulaga, ne nofo foki i kona, fakatasi mo te kau sa Levi kolā e amo ne latou te Pusa o te Feagaiga. Ne tuku ifo ne latou te Pusa o te Feagaiga ki lalo, seki toe sau aka eiloa ne latou ke oko eiloa ki te taimi ko palele ei ne olo a tino ki tua mo te fa'kai. A te faitaulaga ko Apiata ne nofo foki i kona.
25Tena, ne fai atu ei mo te tupu ki a Satoka penei, “Puke te Pusa o te Feagaiga o fakafoki ki te fa'kai. Kafai te Aliki e fiafia mai ki a au, se taumate kaati se aso ko toetuku mai ei ne ia a au ke foki mai au o onoono ki te Pusa o te Feagaiga, pela foki te koga tenei e tuku ei.
26Kae kafai la ko se fiafia a ia ki a au, kaati la ko tuku atu eiloa me se a tena faiga e manako o fai ki a au.”
27Ne faipati atu eiloa a ia ki a Satoka penei, “Kiloke, puke tau tama tagata ko Aimaasu mo te tama tagata a Apiata ko Ionatana kae foki atu ki te fa'kai mo te filemu.
28Ka ko au ka faka'tali atu i te auala ki te suā feitu o te vaitafe i te vao ke maua ne au se tala mai i a koe.”
29Tena, ne fakafoki atu ei ne Satoka mo Apiata a te Pusa o te Feagaiga ki Ielusalema 'nofo foki eiloa mo laua i kona.
30Ne fanake Tavita ki luga i te Mauga o Olive o tagi fanoanoa; e seai ne ana taka, kae ne ufi foki tena ulu, se fakailoga o tena fanoanoa. A tino katoa ne tau'tali atu i a ia, ne ufi foki olotou ulu kae 'tagi foki.
31I te logoga a Tavita i a Aitofele ko kau ki te kau 'teke a Apisaloma, tena ne talo ei a ia penei, “Te Aliki, fakamolemole, a muna akoako a Aitofele ke fai mo muna se aogā!”
32I te okoatuga o Tavita ki te koga māluga, tela e isi ei se koga tapuaki, ne fetaui ei laua mo tena taugasoa pele ko Husai, te tagata Aki, mo ona gatu ko masae'sae mo tena ulu e 'fonu i one.
33Muna a Tavita ki a ia, “E seai sou fesoasoani ki a au manafai e vau koe i a au,
34kae kaati ka isi sou aogā ki a au, manafai e foki atu koe ki te fa'kai, kae fai ki a Apisaloma i a koe ka tavini ki a ia e pela eiloa mo tau tavini atuga ki tena tamana. Kae ka taumafai eiloa koe o 'teke faeloa ki manatu o Aitofele.
35A faitaulaga ko Satoka mo Apiata kona i te fa'kai; fakailoa ki ei a mea katoa e lagona ne koe i loto i te palesi o te tupu.
36A tama'liki tagata foki a laua ko Aimaasu mo Ionatana kona foki e nofo i a laua. Konā te tokolua e mafai o uga mai ne koe ki a au, o fakailoa mai a tala e maua ne koe.”
37Tena, ne foki atu ei ate taugasoa o Tavita ko Husai ki te fa'kai, ka ko Apisaloma ko fatoā oko atu foki.
Who We AreWhat We EelieveWhat We Do
2025 by iamachristian.org,Inc All rights reserved.
