LEVITIKO 10 - Tuvalu Revised Bible

Ko te Agasala a Natapu mo Apiu

1E tokolua tama tagata a Alona, ko Natapu mo Apiu, ne puke a la ulo takitasi, kae 'fao ki malala 'ka, fakaopoopo atu foki ne laua ne mu mea fakamanogi, kae ofo atu ki te Aliki. A te afi tenei e se 'mana, me e seai se fakatonuga a te Aliki ke fai se mea pena.

2Tena, aumai ei ne te Aliki a te afi, ko te afi tena ne sunu ei laua ke mate i mua o te Aliki.

3Tena ne fai atu ei a Mose ki a Alona penei, “Tena te mea ne faipati sale ki ei a te Aliki, i te taimi tela ne fai ei ana pati penei, ‘A latou katoa kola e tavini ki a au e tau o ava mai ki a au; ka fakaasi ne au a toku mana ki oku tino.’ ” Ka ko Alona ne nofo 'mu eiloa.

4Ne kalaga atu a Mose ki a Misaeli mo Elisafana, tamaliki tagata a Usieli, tela ko te taina o te tamana o Alona, kae fai atu ki a laua penei, “O'mai o avatu keatea a foitino o lua fai taina konei mai loto i te Faleie o te Aliki o ave ki tua o te fa'kai.”

5Tena, ne o'mai ei laua o puke ki gatu o te tokolua kona ne mate, sau ei ne laua ki tua o te fa'kai, e pela eiloa mo te fakatonuga a Mose.

6Tena ne fai atu ei a Mose ki a Alona mo ana tama tagata ko Eleasalo mo Itamala penei, “Ke mo a e saesae otou gatu, io me e se fai faka'lei otou ulu, o fakaasi i a koutou e tagi fanoanoa. Kafai e fai ne koutou a mea kona ko koutou ka mate, kae ka kaitaua foki a te Aliki ki te fenua katoa. A tino Isalaelu e mafai o tagi fanoanoa ki te tokolua konei ne mate i te afi ne aumai ne te Aliki.

7Ke mo a eiloa e olo keatea koutou mai te mataloa o te Faleie, i a koutou ma mate, me i a koutou ko oti ne fakatapu ki te sinu milimili a te Aliki.” Tena, ne tau'tali eiloa a latou i mea ne fai atu ne Mose.

Ko Fakatonuga mo Faitaulaga

8Muna a te Aliki ki a Alona,

9“A koe mo au tama tagata ke mo a e ulu ki loto i toku Faleie manafai ne inu koutou i uaina io me ne pia; me kafai e ulu koutou, ko koutou ka mate. A te mea tenei se tulafono ke tausi faka'lei ki ei a tagata i tou gafa.

10E 'tau o fakakese ne koe a mea a te Atua mo mea e fakaaoga ne tino, e pela foki a mea 'ma i faiga o tapuakiga mo mea e se 'ma.

11E 'tau o akoako atu ne koe a tino Isalaelu katoa ki tulafono kola ne tuku atu ne au e auala i a Mose.”

12 Levi 6.14-18 Ne faipati atu a Mose ki a Alona mo ana tama tagata ko Eleasalo mo Itamala penei, “Puke a te taulaga saito tena ne toe mai, mai meakai kola ne ofo atu ki te Aliki, o faite ne falaoa e se fai ki te isi, kae ave o kai i tafa o te fata-fai-taulaga, me i te taulaga meakai tena e tafasili i te 'malu.

13Ave o kai i te koga tapu; a te mea tena ko te vaega o koe mo au tama mai meakai kola ne ofo atu ki te Aliki. Tena te fakatonuga a te Aliki ne fai mai ki a au.

14Levi 7.30-34E mafai ne koe mo tou kaiga o 'kai te fatafata mo te vae tua o te manu tela ne tuku atu ke fai mo meaalofa fakapitoa ki te Aliki kae fakaaoga ma faitaulaga. E mafai o kai ne koutou i so se koga 'ma i faiga o tapuakiga. A taulaga konei ko oti ne tuku atu ma koutou mo otou fanau, me e tena te vaega o koutou mai taulaga fakafetai a te fenua o Isalaelu.

15Ka aumai ne latou a te vae tua mo te fatafata i te taimi e tuku atu ei a te gako ke fai mo taulaga meakai ki te Aliki. A te vaega tena e a koe mo tau fanau ki te se gata mai, e pela eiloa mo te fakatonuga a te Aliki.”

16Ne salasala Mose ki te kouti mo fai te taulaga mo agasala, kae poi aka nei a ia me ko oti ne 'sunu. Tena, ne kaitaua a Mose ki a Eleasalo mo Itamala kae fai atu penei,

17Levi 6.24-26“Ai a e seki kai ei ne koutou a te taulaga mo te fakamagaloga o agasala i se koga tapu? A te taulaga tena e 'malu, kae ne tuku atu ne te Aliki ki a koutou ko te mea ke ma'galo a agasala a te fenua.

18E seki aumai ne koutou a tena toto ki loto i te Faleie Tapu; ne 'tau eiloa o kai ne koutou a te taulaga i te koga tena, e pela mo taku faka tonuga.”

19Ne tali atu Alona penei, “Moi ne kai ne au a te taulaga mo agasala i te aso nei, mata e fiafia ki ei a te Aliki? Ko oti ne ofo atu ne au a taulaga a latou mo te fakamagaloga o agasala, e pena foki mo olotou taulaga sunu, kae tenei eiloa au e maua ne fakalavelave.”

20Tena ne malie ei a Mose, i te lagonaga ne ia a mea konei.