ISAIA Fakatomuaga - Tuvalu Revised Bible
FakatomuagaA te tusi a Isaia ne fakaigoa ki te igoa o te pelofeta takutakua tela ne nofo i Ielusalema i te valu o senitenali T. M. K. A te tusi tenei e vae ki vaega e tolu.1. Mataupu 1-39 ne tusi i te vaitaimi ne fakamatakutaku ei a te malo o Iuta ne te malo o Asulia. Ne lavea ne Isaia i te fakalavelave tela ka tupu ki Iuta e se ko Asulia fua, kae ona foki eiloa ko te se talitonu, mo te se fakalogo o te malo ki te Atua. Ne kalaga a Isaia ki tino mo takitaki ke ola i se olaga amiotonu mo te fai mea tonu, kae fakailoa atu foki ne ia me kafai e se fakalogo latou ko latou ka malaia kae ka ta fakapalele. Ne folafola foki ne Isaia me e isi se taimi ka filemu ei te lalolagi, kae ka vau foki se tino i te gafa o Tavita tela ka fai mo tupu.2. Mataupu 40-55 ne tusi i te taimi ne ave ei a tino Iuta e tokouke i te tafeaga ki Papelonia, ko oko eiloa i te puapuaga kae ko seai ne fakamoemoega. Ne folafola ne te pelofeta me ko pili o fakasao ne te Atua a tena fenua, kae toe fakafoki ki Ielusalema ke toe kamata te olaga fou o latou. A te matua taua i mataupu konei, e fakaasi mai i ei i te Atua ko te Aliki o tala tuku fakasolo; a tena fuafuaga mo tena fenua e aofia ei te fakamanuiaga o malo katoa e auala i a Isalaelu. A fuaiupu kola e faipati ki “te Tavini a te Aliki” ne fuaiupu e tafasili i te lau iloa i te Feagaiga Mua.3. Mataupu 56-66 e fakasino tonu ki tino kola ko oti ne foki mai ki Ielusalema, kae e tau o toe fakamasaua ki a latou i te Atua e fakataunu eiloa ne ia ana tautoga ki malo. E faka'mafa malosi te folafolaga ke fai te amiotonu, te fai mea tonu, te faka'maluga o te Sapati, taulaga, mo talosaga. E isi ne fuaiupu tafasili i te taua, ko te 61.1-2, ne muna ne fakaaoga ne Iesu i te kamataga o tena galuega o fakaasi ei tena kalagagina mo te galuega.Ko Fakasologa o MataupuKo polopolokiga mo folafolaga 1.1—12.6Ko te fakasalaga o malo 13.1—23.18Ko te fakamasinoga o te lalolagi ne te Atua 24.1—27.13Ko polopolokiga mo folafolaga 28.1—35.10Ko Hesekia te tupu o Iuta mo te kau Asulia 36.1—39.8Ko fekau o te fakamoemoega lei 40.1—55.13Ko polopolokiga mo folafolaga 56.1—66.24
