1 TUPU 14 - Tuvalu Revised Bible

Ko te Mate o te Tama Tagata a Ielopoamo

1I te taimi tena, a te tama tagata a Ielopoamo ko Avia e masaki.

2Muna a Ielopoamo ki tena avaga, “Fai ou foliga ke se iloa koe ne tino, kae fano ki Sailo ki te pelofeta ko Aita, tela ko ia ne fai mai i a au e fai mo tupu o Isalaelu.

3Puke atu ma ia e sefulu puta falaoa, mo ne keke, mo se tia hani. Fesili atu ki a ia me se a te mea ka tupu ki te tamaliki a taua, me e fakaasi atu eiloa ne ia ki a koe.”

4Tena, ne fanatu eiloa te avaga a Ielopoamo ki te fale o Aita i Sailo. A Aita ko kivi ona mata talu eiloa te matua.

5A te Aliki ko oti ne fai ki a Aita i te avaga a Ielopoamo tena e vau ki a ia o fesili mai e uiga ki te tamaliki a laua, tela e masaki. Kae ne fakasino mai ne te Aliki a muna e tau o fai ne Aita ki te avaga tena a Ielopoamo.

I te okoatuga o te avaga a Ielopoamo, ne fai pela i a ia se tino fakaatea.

6Kae i te lagonaga ne Aita a ia tena ko ulu atu i te mataloa, ne 'tapa atu ei a ia penei, “Vau ki loto. E iloa ne au i a koe ko te avaga a Ielopoamo. Ai a e fai ei koe pela me se tino fakaatea? E isi se tala fanoanoa e fia fai atu ne au ki a koe.

7Fano o fai ki a Ielopoamo te fekau tenei a te Aliki te Atua o Isalaelu ki a ia: ‘Ne filifili ne au a koe mai i tino e tokouke ke fai koe mo takitaki o toku fenua ko Isalaelu.

8Ne ave keatea ne au te malo mai i lima o te gafa o Tavita o tuku atu ki a koe. Ka ko koe e se pau mo taku tavini ko Tavita tela e fakamaoni mai ki a au kae tausi ki aku fakatonuga, kae fai fua ne ia a mea kola e tonu mo toku loto.

9Ko silia atu a agasala konei ko fai ne koe i lo latou kola ne fai mo tupu i ou mua. Ko oti koe ne 'teke mai ki a au kae fai foki ne koe a au ke kaitaua i te faitega ne koe o tupua mo fakatusa fiti o tapuaki ki ei.

101Tupu 15.29 Tela la, ka ofa ne au te fakasologa o tupu i tou gafa, kae 'ta katoa a tagata i tou gafa, mai tamaliki ke oko eiloa ki tagata matua. Ka toese keatea ne au tou kaiga; ka agina atu latou keatea e pela me ne kaiga.

11A tino i tou kaiga kola e mate i loto i te fa'kai ka kai ne kuli, ka ko latou kola e mate i tua o te fa'kai ka kai ne manu eva e igoa ki valatua. Ko au ko te Aliki tenei ne faipati atu.’ ”

12Tena, ne fanatu eiloa a Aita o faipati ki te avaga a Ielopoamo penei, “Foki nei ki tou fale. I te taimi eiloa e ulu atu ei koe ki loto i te fa'kai, ko tau tama tagata eiloa ko mate.

13A tino Isalaelu katoa ka tagi fanoanoa i tena mate, ka oti ko tanu ei ne latou. Ko ia fua tena tokotasi mai te kaiga o Ielopoamo ka tanu faka'lei, me ko ia fua tena e fiafia ki ei te Aliki, te Atua o Isalaelu.

14A te Aliki ka fai ne ia se tino ke tupu i luga i Isalaelu, e fakagata ei te fakasologa o tupu i te gafa o Ielopoamo.

15A te Aliki ka fakasala ne ia Isalaelu, kae ka se toka Isalaelu, e pela me se mouku e gasuesue i te vaitafe foliki. Ka ave keatea ne te Aliki a tino Isalaelu mai te fenua gali tenei, tela ne tuku ne ia ki olotou tupuga, o fakasalalau atu latou ki fenua i tua atu o te vaitafe o Eufilate, me ne fai ne latou a ia ke kaitaua i te faitega ne latou o fakatusa o te atua fafine ko Asaila.

16A te Aliki ka fano keatea mai i Isalaelu me i a Ielopoamo ne agasala, kae ne taki foki ne ia a tino Isalaelu ke agasala.”

17Tena, ne foki atu ei te avaga a Ielopoamo ki Tilesa. I tena uluatuga eiloa ki loto i tena fale, ko tena tama eiloa ko mate.

18Ne 'tagi fanoa'noa katoa tino Isalaelu i tena mate, tanu atu ei ne latou, e pela eiloa mo muna a te Aliki ki tena tavini ko Aita te pelofeta.

Ko te Mate o Ielopoamo

19A nisi tala o nisi mea a te Tupu ko Ielopoamo ne fai, pela mo taua ne taua ei a ia, mo tena pulepulega, e fakamau katoa i te tusi ko Te Tala Tukufakasolo o Tupu o Isalaelu.

20A Ielopoamo ne fai mo tupu i tausaga e luasefulu lua. Ne mate atu a ia kae sui ne tena tama tagata ko Natapu.

Ko te Tupu o Iuta ko Leopoamo(2NTupu 11.5—12.15)

21A Leopoamo, te tama tagata a Solomona ne fai mo tupu o Iuta ka ko tusa ei mo te fasefulu tasi ona tausaga. E tusa mo te sefulufitu tausaga ne fai ei a ia mo tupu o Iuta, kae ne nofo eiloa a ia i Ielusalema te fa'kai ne filifili ne te Aliki mai fa'kai katoa o Isalaelu ke fai mo koga e tapuaki atu sale ei a tino ki a ia. A te matua o Leopoamo ko Naama, mai te fenua o Amoni.

22Ne agasala a tino Iuta ki te Aliki, ko silia atu eiloa te agasala ne fai ne latou i lo olotou tupuga, tena ko kaitaua malosi eiloa te Aliki ki a latou.

232NTupu 17.9,10 Ne faite ne latou koga tapuaki ki atua fakaatea, kae faka'tu aka foki ne latou a pou fatu mo fakatusa o Asaila i luga i koga malugaluga pela foki i lalo o malūga o lakau, o tapuaki ki ei.

24Teu 23.17 Kae tafasili atu foki la ei te masei, me e isi ne tagata mo fafine e fai pela me ne fafine tali tagata mo tagata tali fafine i koga tapuaki fapau'pau kona. Ne fai ne tino Iuta a amioga ma'sei katoa kola ne fai sale ne tino kola ne nofo i kona, kola ne afuli keatea ne te Aliki ke aumai a tino Isalaelu o faka'nofo i kona.

25 2NTupu 12.2-8 I te lima o tausaga o te nofoaiga a Leopoamo, kae vau a te Tupu o Aikupito ko Sesaka o faitaua mai ki Ielusalema

261Tupu 10.16,17; 2NTupu 9.15,16 Ne ave ne ia a mea taua katoa i te Faletapu pela foki i te palesi, e aofia ei a talita aulo kola ne faite ne Solomona.

27Ne faite ne Leopoamo a talita palasi mo sui a talita aulo kona, kae tuku atu ei ne ia ki ofisa kola e tausi a mataloa o te palesi.

28I taimi katoa e fano ei te tupu ki te Faletapu, a sotia tausi kona e amo mai foki ne latou a talita kona, ka oti ko toe faka'foki ei ne latou ki te potu tena e tausi ne latou.

29A te ukega o mea ne fai ne Leopoamo e fakamau i te tusi ko Te Tala Tukufakasolo o Tupu o Iuta.

30I te vaitaimi tena, a Leopoamo mo Ielopoamo e masani o taua sale.

31Ne mate atu Leopoamo kae ne tanu i te tanuga fakatupu i te Fa'kai o Tavita, kae ne sui a ia ne tena tama tagata ko Avia.