1 NOFOAIGA TUPU 24 - Tuvalu Revised Bible

Ko Galuega a Faitaulaga

1A tino i te gafa o Alona e 'kau i potukau konei. A Alona e tokofa ana tama tagata: ko Natapu, Apiu, Eleasalo mo Itamala

2Levi 10.1,2 A Natapu mo Apiu ne mate ka koi ola te la tamana, kae seai ne la fanau. A taina o laua ko Eleasalo mo Itamala ne fai mo faitaulaga.

3Ne fakasoa ne te Tupu ko Tavita a te gafa o Alona ki potukau, e tusa eiloa mo tiute o latou e fai. Ne fesoasoani atu ki a ia a Satoka, se tino i te gafa o Eleasalo, mo Aimeleka, se tino i te gafa o Itamala

4A tino i te gafa o Eleasalo ne fakasoa ki potukau e sefuluono, ka ko tino i te gafa o Itamala ne fakasoa ki potukau e valu. Ne fai te mea tena pena, me e tokouke atu a tagata i te gafa o Eleasalo ne matai o kaiga takitasi:

5e isi ne ofisa o te faletapu mo takitaki faka‐te‐agaga i tino o te gafa o Eleasalo, pela foki Itamala, tela la, a te fakavasegaga o latou ki olotou tofi e fai ki te vili.

6A tino i te gafa o Eleasalo mo tino i te gafa o Itamala e fakasolosolo o fai te vili. Tena la, ko fakamau ei olotou igoa ne Semaia, te tama tagata a Netanelu, se failautusi sa Levi. A tino ne fai mo molimau, ko te tupu, ana ofisa, te faitaulaga ko Satoka, Aimeleka te tama tagata a Apiata, mo matai o kaiga o faitaulaga mo kaiga sa Levi.

7-18Tenei te fakatokaga i te fakasoaga o te luasefulu fa o kaiga ki olotou galuega: 1. Ieoialipa 2. Ietaia 3. Halima 4. Seolima 5. Malakita 6. Mitiamina 7. Hakosi 8. Avia 9. Iesua 10. Sekania 11. Eliasipa 12. Iakima 13. Hupa 14. Iesepeapa 15. Pilika 16. Imela 17. Hesila 18. Hapisese 19. Petaia 20 Iesikeli 21. Iakini 22. Kamulo 23. Telaia 24. Masia.

19A tagata kona ne fakamau olotou igoa e tusa eiloa mo galuega a latou i te Faletapu, mo tiute o latou kola ne fakavasega ne te lotou tupuga ko Alona, e pela eiloa mo te fakatonuga a te Aliki te Atua o Isalaelu.

Ko te Kau Sa Levi

20Konei a igoa o nisi matai o kaiga kola ne tupu mai i a Levi:

Ko Ietaia, te tama tagata a Sepuelu, Sepuelu ko te tama a Amalamo;

21Ko Isia, se tino i te gafa o Lehapaia;

22Ko Iahata te tama tagata a Isala, Isala ko te tama tagata a Selomita;

23Ko Ielia, Amalia, Iasielu, mo Iekameamo, ko tama tagata a Hepelona, mai i te tino matua o fanaifo ki lalo;

24Ko Samila, te tama tagata a Mika, Mika ko te tama tagata a Usieli;

25Ko Sakalia, te tama tagata a Isia, Isia ko te tama tagata a Usieli, kae ko te taina o Mika;

26Ko Mali, Musi, mo Iasia, ne tino i te gafa o Melali.

27A Iasia e tokotolu ana tama tagata: ko Sohama, Sakula, mo Ipeli.

28-29A Mali e tokolua ana tama ta'gata, ko Eleasalo mo Kiso. A Eleasalo e seai ne ana tama ta'gata, ka ko Kiso e tokotasi tena tama tagata, ko Ielameele.

30A Musi e tokotolu ana tama ta'gata: ko Mali, Eta, mo Ielemota.

Konei a kaiga o te kau sa Levi.

31A matai o kaukaiga takitasi mo taina foliki o latou, e fai ne latou te vili e iloa ei olotou tiute, e pela mo te mea ne fai ne olotou kaiga ko faitaulaga, kola ne tupu mai i a Alona. A te Tupu ko Tavita, mo Satoka mo Aimeleka, mo matai o kaiga o faitaulaga mo te kau sa Levi, ko molimau.