SALAMO 16 - Tuvalu Revised Bible

Ko te Talo o te Talitonu Fakamaoni

1Te Atua, puipui mai au,

Me ko koe e sao ei au.

2Au e fai atu ki te Aliki, “Ko koe eiloa toku Aliki;

E maua mai i a koe a mea 'lei katoa.”

3Ko oko eiloa i te gali o tino amiotonu o te Aliki!

E fiafia lasi foki au ki a latou.

4A tino kola e tau'tali ki atua fakaatea,

Ka maua latou ne fakalavelave e uke.

Kae ka se kau foki au i olotou faiga taulaga;

Ka se tapuaki foki au ki olotou atua.

5Te Aliki, ko koe eiloa toku tofi,

E tuku mai ne koe a mea katoa e manako au ki ei;

A toku ola foki e i ou lima.

6Ko oko eiloa te fakaofoofogia o au meaalofa ne tuku mai ki a au;

Ko oko eiloa i te lei!

7E tavae au ki te Aliki, me takitaki ne ia au,

Kae fakatonu mai foki ne ia au i te po.

8E iloa faeloa ne au i te Aliki e pili mai ki a au;

E seai se mea e mafai o fakagasue toku talitonuga.

9Tela te mea e 'fonu ei au i te fiafia mo te fakafetai

Me maua faeloa ne au te olaga tokagamalie,

10 Galu 13.35 Me puipui ne koe au mai te malosi o te mate;

Ka ko te tino tela e alofa koe ki ei,

Ka se tuku ne koe i te lalolagi o tino mate.

11 Galu 2.25-28 Ka fakaasi mai ne koe te auala tela e tau ki te ola;

A tou fakatasi mai e fakafiafia ki toku loto

Kae aumai foki ne ia te fiafia ki a au ke oko ki te se gata mai.