AMOSA 8 - Tuvalu Revised Bible

Ko te Fakaasiga e Uiga ki te Kete Fuagā Lakau

1Ne oko mai foki ki a au a te sua fakaasiga mai te Aliki Sili. Ne lavea atu ne au i te fakasiga tena a te kete fuagā lakau.

2Ne fesili mai te Aliki, “Amosa, se a te mea e lavea ne koe?”

Ne tali atu au penei, “Se kete fuagā lakau.”

Ne toe fai mai te Aliki ki a au, “Ko oko mai nei te gataga ki toku fenua ko Isalaelu. Ka se toe 'fuli eiloa toku mafaufau e tusa mo taku fakasalaga ki a latou.

3I te aso tena, a pese i te palesi o te tupu ka fuli ki tagi o te fanoanoa. Ka tafola tino mate i koga katoa. Ka peipei latou ki tua o te fa'kai e aunoa mo se leo e lagona.” Ko te Malaia o Isalaelu

4Faka'logo mai ki muna konei, a koutou kola e fakasaua ne koutou tino puapuagatia, kae taumafai foki o fakama'sei a tino mativa o te fenua.

5E masani o fai ake a koutou pela ki a koutou eiloa, “Ko se maua eiloa ne matou o fakatali ke na oti atu aso tapu ko te mea ke mafai o na togi atu a saito a tatou. E oti afea te Sapati, ke na kamata o 'togi atu a saito a tatou? Ka mafai ei foki ne tatou o faka'mafa te togi o saito, kae fakaaoga a fua e se tonu, kae fakaloiloi foki ne tatou a tino e o'mai o 'togi ki fua 'se a tatou.

6E mafai ne tatou o togi atu a saito ma'sei ki se togi mafa. Ka maua foki ne tatou se tino mativa e se mafai ne ia o togi tena kaitalafu, ke oko foki eiloa ki te 'togi o te pea taka. Ka togi mai ei ne tatou a te tino tena ke fai mo pologa.”

7Ko oti ne tauto te Aliki, te Atua o Isalaelu penei: “E se mafai lele eiloa o puli i a au olotou amio ma'sei.

8Tela la, ka galulu te laukele, ka ko tino katoa foki i te fenua ka manavase valevale. A te fenua katoa ka galulu; ka gasuesue foki, ki luga ki lalo e pela mo te vaitafe ko te Naila.

9Ko pili mai te taimi ka fai ei ne au te la ke to i te tutonu, ka pouli foki te lalolagi i te ao. A au te Aliki Sili ko faipati atu.

10Ka sui ne au otou 'kaiga fiafia ki tanuga o tino mate, ka sui foki ne au otou pese fiafia ki te tagi o te fanoanoa. Ka fai ne au koutou ke 'kati 'kila otou ulu, kae sulu ki lautaga. Ka fai foki koutou e pela mo matua e tagi fanoa'noa ona ko te mate o te la tamaliki tagata e tokotasi. A te aso tena, se aso puapuaga ke oko eiloa ki te otiga.

11“Ko pili mai te taimi ka aumai ei ne au te oge ki te fenua. A tino ka fia'kai kae se ko te fia'kai ki falaoa; ka fiainu foki kae se ko te fiainu ki vai. Ka fia'kai kae fiainu latou ki te muna a te Aliki. Ko au ko te Aliki Sili ko faipati atu.

12A tino ka takase'se mai matu ki saute, mai te saegala foki ki te togala. Ka salasala latou ki koga katoa ki te muna a te Aliki, kae ka se maua eiloa ne latou.

13I te aso tena, a tamataene mo tamafine ma'losi ka mata'po i te fiainu.

14A latou kola e tauto ki tupua o Samalia, kae fai ake pela, ‘I te igoa o te atua o Tanu’ io me ‘I te igoa o te atua o Pelesepa’; a latou kona ka 'siga kae se mafai o toetu ake ki luga.”