ESEKIELU 33 - Tuvalu Revised Bible

Esekielu ko Fili ne te Atua ke Fai mo Tino Leoleo(Eseki 3.16-21)

1A te Aliki ne faipati mai ki a au,

2ana muna, “Te tagata ola,” “fai ki tino o tou fenua a te mea e tupu manafai e aumai ne au a te taua ki se fenua. A tino o te fenua tena ka fili ne latou se tokotasi o latou ke fai mo tino leoleo.

3Kafai ko lavea ne ia i te fili ko sae atu, ko fakatagi ei ne ia a te pu o fakailoa te fili ki tino katoa.

4Kafai e isi se tino e lagona ne ia te pu kae se fia saga ki ei, kae oko mai te fili, tamate ei ne latou a ia, ko tena se eiloa tena ne mate ei a ia.

5Ko tena se eiloa ne mate ei a ia, me e seki fakalogo ki te pu o te fili. Moi ne fakalogo a ia e penei e mafai a ia o sao.

6Kafai te tino leoleo e lavea ne ia te fili ko o'mai kae se fakatagi ne ia a te pu, ka o'mai te fili o tamate a tino agasala kona, kae ka lou ne au me ko te tino leoleo tena ne pogai ei te mate o tino kona.

7“Nei la, e te tagata ola, ko fai nei ne au a koe mo tino leoleo o te malo o Isalaelu. E tau eiloa o fakaoko atu ne koe ki a latou a muna polopoloki kola e fai atu ne au ki a koe.

8Kafai e fakailoa atu ne au i te tagata amio masei tela ko pili o mate, kae e se polopoloki ne koe ke fuli ona uiga ko te mea ke sao a ia, tena la, ka mate eiloa a ia mo ana agasala, kae ka lou ne au me ko koe ne pogai ei te mate o te tagata tena.

9Kafai ne polopoloki ne koe se tagata amio masei kae e se fakagata ona uiga fai agasala, ka mate eiloa a ia mo ana agasala, kae ka sao tou ola.”

Ko Tiute o Tino Taki Tokotasi

10A te Aliki ne faipati mai ki a au, ana muna, “Te tagata ola,” “toe fai atu a muna a tino Isalaelu kona ne fai: ‘A matou ko mafa ne omotou agasala mo mea se a matou ne fai. A matou ko gasolo eiloa o se aoga. E ola pefea tatou? ’

11Fai ki a latou i a au, te Aliki Sili, ko te Atua Ola, tela la, au e fai tonu atu i a au e se fiafia ke lavea ne au se tino agasala ke mate. E sili atu toku fiafia ke lavea ne au me ko se toe agasala kae ke ola. Isalaelu, fakagata au amioga masei kona e fai. Ai a e fia mate ei koe?

12“Te tagata ola, fai nei ki tino Isalaelu me kafai e agasala se tagata amio lei, a mea lei ne fai ne ia ka se mafai o sao a ia i ei. Kafai se tagata amio masei ko fakagata ana uiga masei, ka se fakasala eiloa a ia; kae kafai se tagata amiotonu ko kamata o fai agasala, ka se sao eiloa tena ola.

13Kafai ne tauto au ki se tino amiotonu i a ia e ola, kae ko kamata o mafaufau pela me ko lava ana uiga lei kola ne fai sale, kae ko kamata o agasala, ka se masaua eiloa ne au ana mea lei ne fai. Ka mate eiloa a ia ona ko ana agasala.

14Kafai ne fakailoa ne au ki se tino amio masei i a ia ko pili o mate, kae ne fakagata ana uiga fai agasala kae fai ne ia a te mea tonu kae lei —

15pela manafai ko fakafoki ne ia a te tupe fakaleoleo tela ne tuku mai ki a ia ne te tino ne kaitalafu i a ia, io me fakafoki a mea ne kaisoa ne ia — kafai ko fakagata ana amioga masei kae tausi ki tulafono e maua ei te ola, ka se mate a ia, kae ola eiloa.

16Ka fakamagalo ne au ana agasala ne fai, kae ka ola eiloa a ia me ne fai ne ia te mea tonu kae lei.

17“Ka ko otou tino e fai mai i te mea ne fai ne au e se tonu! Ikai, ko faiga a latou e se tonu.

18Kafai se tagata amiotonu ko se fai ne ia a te mea lei, kae ko kamata o fai amioga se lei, ka mate eiloa a ia i ana uiga masei kona.

19Kafai se tagata amio masei ko tiaki ona uiga fai agasala kae fai ne ia a te mea tonu kae lei, ko fakasao eiloa ne ia a tena ola.

20Ka ko koutou tino Isalaelu, a koutou e fai mai i te mea e fai ne au e se tonu. Ka fakamasino ne au koutou i otou mea e fai.”

Ko te Tala o te Takavalega o Ielusalema

21 2Tupu 25.3-10; Iele 39.2-8; 52.4-14 I te po lima o te sefulu o masina, i te sefululua o tausaga o matou i te tafeaga, kae ne oko mai te tagata ne sola mai i Ielusalema, o fai mai i te fa'kai ko takavale.

22I te afiafi o te aso mai i mua o te aso ne oko mai i ei, ne lagona i ei ne au a te mana o te fakatasi mai o te Aliki. I te okomaiga o te tagata tena i te taeaoakega, kae ne toe fakafoki mai ei ne te Aliki ki a au a te malosi o faipati.

Ko te Agasala a te Fenua

23A te Aliki ne faipati mai ki a au,

24ana muna, “Te tagata ola,” “a tino kola e nofo i fa'kai maofa o Isalaelu ko fai ake penei: ‘A Apelaamo se tagata fua e tokotasi, kae ne avatu a te fenua katoa ki a ia. Nei, ko tokouke matou, tela la, ko fai mo matou a te fenua. ’

25“Fai atu ki ei aku muna konei, ko au ko te Aliki Sili: A koutou e kai ki kano manu kola koi isi ne toto i ei. A koutou e tapuaki ki tupua. A koutou e tatino. Se a te pogai ne fai ake ei koutou i te fenua e o koutou?

26A koutou e fakana ki otou pelu. A otou faiga ko oko eiloa i te mataga. A tino katoa ko mulilua. Se a te pogai e fai ake ei koutou i te fenua e o koutou?

27“Fai ki a latou i a au, te Aliki Sili, ko fakailoa atu ne au ki a latou me e pela eiloa mo te iloa tonu i a au ko te Atua ola, e iloa tonu foki i tino kola e nofo i fa'kai kola ne maofa ka mate. A tino kola e nofo i tua o fa'kai ka kai ne manu fekai. A tino kola e muni i mauga mo ana, ka mate i famai.

28Ka fakamasei ne au a te fenua, kae fakagata foki a te malosi tela ne masani o fakamatamata sale latou ki ei. A mauga o Isalaelu ka liu toga vao tela ka se mafai ei ne tino o malaga i loto i ei.

29Kafai ko fakasala ne au a tino ona ko olotou agasala, kae fakaseaoga a te fenua, tena la, ka iloa ei ne latou i a au ko te Aliki.”

Ko te Ikuga o te Fekau a te Pelofeta

30Muna a te Aliki, “Te tagata ola, a tino o tou fenua ko faipati sale e uiga ki a koe manafai e fetaui latou i tafa o te pui o te fa'kai, io me i mataloa o olotou fale. E fai sale olotou muna penei, ‘Tatou ka olo nei o fakalogo aka me se a te fekau ko oti ne oko mai i te Aliki.’

31Tela la, a toku fenua e mumu sale atu fua o fakalogo ki au muna e fai, kae e se fai ne latou a mea e fai atu ne koe ke fai ne latou. E fai ne latou au muna pela me ne pese se aoga, kae tumau eiloa olotou uiga manako mea.

32A koe ki a latou, e pela fua me se tino usuusu, tela e usu ne ia a pese fakafanau io me tata te kitala. E fakalogologo fakalei eiloa ki au muna, kae e se saga lele eiloa o tausi se fakatonuga.

33Kae kafai ko taunu au muna katoa kona — e taunu eiloa — tena la, ka iloa ei ne latou me e isi se pelofeta ko oti ne oko atu ki a latou.”