IELEMIA 13 - Tuvalu Revised Bible

Ko Tivae Lino

1A te Aliki ne fai mai ki a au ke fano au o togi mai ne tivae lino mo pei ei au; kae ne fai mai ke mo a e fakasiu ne au ki te vai.

2Tena, ne fano au o togi mai ne oku tivae lino, pei ei au ki ei.

3Ne toe faipati mai te Aliki ki a au, ana muna,

4“Fano ki te Vaitafe ko te Eufilate o funa a tivae kona i te pu i te kaupapa.”

5Tena, ne fano eiloa au o funa a tivae kona i tafa o te Eufilate.

6I se taimi fakamuli ifo, ne fai mai te Aliki ki a au ke foki au ki te Eufilate o puke mai a tivae kona.

7Tena ne fano ei au, kae i taku okoatuga ki te koga tena, ne funa ei ne au a tivae kona, ne lavea ne au me ko masei.

8Ne toe faipati mai te Aliki ki a au, ana muna,

9“E fakamasei pena ne au a te loto fiasili o Iuta mo Ielusalema.

10A tino amio masei konei e ita ma fakalogo mai ki a au. Ko oko eiloa i te loto makeke kae amio masei; ne tapuaki kae tavini atu ki atua fakaatea. Tela la, ka pela latou mo tivae konei ko masei.

11E pela eiloa mo tivae e fetaui lei ki te tau'gasulu, e pena foki toku fakamoemoega, ko tino Isalaelu mo Iuta ke piki mau ki a au. Ne fai ne au te mea tena, ko te mea ke fai latou mo oku tino, kae ke vikia kae fakaaloalogina toku igoa i olotou faiga; ka ko latou e seki fia fakalogo mai ki a au.”

Ko te Tiā Uaina

12A te Aliki te Atua ne faipati mai ki a au penei, “Ielemia, fai ki tino Isalaelu i tiā uaina katoa e tau o fakafonu ki uaina. Ka tali mai latou me e iloa ne latou i tiā uaina katoa e tau o fakafonu ki uaina.

13Tena la, ko fai atu ei koe ki a latou i a au, te Aliki, ka fainu ne au a tino o te fenua tenei ki uaina ke konā: ko tupu kola ko tupuga o Tavita, ko faitaulaga, ko pelofeta, mo tino katoa o Ielusalema.

14Ka oti, ko foa ei ne au latou, tino matua fakatasi mo tamaliki, e pela me ne tiā e fakafepaki ki nisi tiā. E seai se mea e mafai o taofi ne ia au ke se tamate ne au latou.”

Ko Muna Polopoloki a Ielemia e uiga ki te Loto Fiasili

15Tino Isalaelu, a te Aliki ko oti ne faipati!

Ke loto malalo koutou kae fakalogo ki a ia.

16Fakaaloalo atu ki te Aliki te otou Atua,

Koi tuai o aumai ne ia te pouliga,

Ko siga valevale ei koutou i luga i mauga;

Koi tuai o fuli ne ia te mainaga tela e fakamoemoe koutou ki ei ki te pouliga.

17Kafai e se fakalogo koutou,

Ko au ka tagi muni ona ko te otou loto fiasili;

Ka tagi mautuutu eiloa au,

Kae ka tafe oku loimata

Me i tino o te Aliki ko oti ne ave fakapagota.

18Muna a te Aliki ki a au, “Fai ki te tupu mo tena matua ke o'mai ki lalo mai i o la nofogaaliki, me i o la kalauna gali ko to keatea mai i o la ulu.

19A fa'kai o Iuta ki saute ko nikoi ne te fili. A tino Iuta katoa ko oti ne ave fakapagota.”

20Ielusalema, kiloke! A otou fili kona ko o'mai mai i matū! Ko fea a tino kola ne tuku atu ke tausi ne koe, ko ou tino kola e fakamatamata koe ki ei?

21Se a tau pati ka fai manafai ko fakatakavale kae pule koe ne tino kola ne mafaufau koe pela me ko ou taugasoa? Ka oko atu ki a koe a te mae pela me se fafine ka fanau.

22Kafai e fesili ake koe me ai a ne tupu ei a mea konei ki a koe — ai a ne sae keatea ei ou gatu mai i a koe, kae ne puke malō foki koe — ne tupu a mea kona me ko oko eiloa i te lasi o tau agasala.

23E mafai ne se tagata uli o fuli te lanu o tena pakili, io me se lepoti o solo keatea a pule i tena pakili? Kafai e mafai, ko mafai foki ei ne koutou kona e fai amioga masei faeloa o saga o fai a amioga lei.

24A te Aliki ka fakasalalau ne ia koutou e pela me ne kausaito kola e agina i te matagi mai i te toafa.

25Ko oti ne fai mai me e tena te ikuga o koutou. Tena te mea ne mafaufau a ia o fai ki a koutou, me ne fakapuli ne koutou a ia kae fakatuaga ki atua loi.

26Ko te Aliki eiloa ka tapale keatea ne ia otou gatu kae tuku koutou ke masiasi.

27Ko oti ne lavea ne ia koutou e fai ne koutou a mea kola e se fiafia a ia ki ei. Ko oti ne lavea ne ia koutou e tele i tua o atua fapaupau i luga i mauga foliki pela foki i fatoaga, e pela me se tagata e tele i tua o te avaga a tena tuakoi, io me se solofanua tagata e tele i tua o te solofanua fafine. Tino Ielusalema, koutou ko malaia! Tefea te taimi ka mafai ei o maua ne koutou se olaga lei?