ESEKIELU 6 - Tuvalu Revised Bible

Ko Fakamalaia ne te Aliki a te Tapuaki ki Tupua

1A te Aliki ne faipati mai ki a au,

2ana muna, “Te tagata ola, kilo ki mauga o Isalaelu kae folafola atu ki ei taku fekau.

3Fai ki mauga o Isalaelu ke fakalogo mai ki muna a te Aliki, ke fakalogo mai ki aku muna, ko au ko te Aliki Sili, konei e fai atu ki mauga mo vanu: ka aumai ne au te pelu ke ta fakamasei ei a koga e tapuaki sale i ei a tino ki tupua.

4A fata-fai-taulaga ka ofa ki lalo, mo fata-fai-taulaga sunu mea manogi ka ofa. A tino katoa i kona ka mate i mua o olotou tupua.

5Ka fakasalalau ne au a foitino mate o tino Isalaelu; ka fakasalalau ne au olotou ivi i feitu o olotou fata-fai-taulaga.

6A fa'kai katoa o Isalaelu ka fakamasei, ko te mea ke ofa likiliki katoa a olotou fata-fai-taulaga mo olotu tupua, olotou fata-fai-taulaga sunu mea manogi ka ofa fakamasei, mo mea katoa a latou ne faite ka galo atu katoa.

7A tino ka mate i koga katoa, ka ko tino kola koi ola mai ka taku ne latou au ko te Aliki.

8“Ka fakasao ne au a nisi mai i te taga fakamasei tena, kae fakasalalau ne au ki malo,

9te koga ka nofo fakapagota ei latou. I kona, ka manatua ne latou a au, kae ka iloa ne latou me ne fakasala kae fakamasiasi ne au latou, ona ne tiakina ne latou a au o tautali atu i tupua. Ka ita latou ki a latou eiloa ona ko amioga masei mo mea se lei kola ne fai ne latou.

10Ka iloa ne latou i a au ko te Aliki, ka ko aku muna polopoloki foki ne muna tonu eiloa.”

11Muna a te Aliki Sili, “Kumi ou lima! Tuki ou vae ki lalo! Tagi i te fanoanoa ona ko amioga masei katoa, mo uiga masei kola ne fai ne tino Isalaelu. Ka mate latou i taua, i te oge, mo famai.

12A tino kola e nofo i koga mao ka masaki kae mate; a tino e nofo pili mai ka mate i taua; a tino e ola mai ka mate i te fiakai. Ka lagona ne latou te malosi o toku kaitaua.

13A foitino mate ka tafola i tafa o tupua, pela foki i tafatafa o fata-fai-taulaga, ka tafola i luga i mauga katoa, i lalo o lakau lauusiusi katoa, mo lalo o lakau ko oka lasi eiloa, pela foki i koga katoa kola e sunu ei olotou taulaga ki olotou tupua. Tena la, ka iloa ei ne tino katoa i a au ko te Aliki.

14Ao, ka fakaoko atu eiloa toku lima o ofa fakamasei a te lotou fenua. Ka fakamasei ne au a te fenua, mai i te toafa i saute ke oko ki te fa'kai o Lipila i matu, e seai eiloa se koga e fakasao ne au i koga e nofo ei te kau Isalaelu. Tena la, ka iloa ei ne tino katoa i a au ko te Aliki.”