SALAMO 14 - Tuvalu Revised Bible

Ko te Amio Ma'sei o Tino (Sala 53)

1 Loma 3.10-12 Ko fai ake pela tino valea i olotou loto,

“E seai se Atua.”

A latou ne tino masei katoa,

Ko mea ma'sei faeloa ne fai ne latou;

E seai se tino e amio lei.

2E onoono mai te Aliki i te lagi ki tino i lalo nei,

Ke matea ne ia me e isi ne tino poto,

Me e isi foki ne tino e tapuaki ki a ia.

3Ka ko latou katoa ne tino fai mea 'se;

E pau katoa latou i te masei.

E seai se tino o latou e amiotonu,

E seai lele eiloa.

4Muna a te Aliki,

“E a, e se iloa ne latou?

E a, e se iloa ne tino fai agasala konei olotou mea masei ne fai?

E ola latou i te 'fao a mea a oku tino,

Kae se fakatagi mai eiloa latou ki a au.”

5Ka ko oko eiloa i te lotou ma'taku i te mea tena,

Me i te Atua e kau ki a latou kola e tausi ki ana muna.

6A tino amio masei e fakamasei ne latou a fuafuaga a te tino loto malalo,

Ka ko te Aliki ko tena 'puiga.

7Au e talo faeloa ko te manumalo

Ke vau ki Isalaelu mai Siona.

Ka fiafia Isalaelu mafai ko toe fakamanuia latou ne te Aliki.