ISAIA 46 - Tuvalu Revised Bible

1“Tenei te gataga o atua o Papelonia!

A Pele mo Nepo ne masani o tapuaki sale ki ei a tino,

Kae nei ko fakauta ki tua o asini,

Ko fai mo amoga mafa i tua o asini kola

Ko oko eiloa i te fi'ta.

2A tupua e se mafai ne latou o fakasao a latou eiloa;

E puke ne te fili ko ave ei ki se koga mao,

Tena te gataga o atua o Papelonia!

3“Fakalogo mai ki a au, koutou te gafa o Iakopo,

Koutou tino o toku fenua kona koi toe.

A koutou ne tausi faka'lei eiloa ne au talu mai te taimi ne fa'nau ei koutou.

4Au ko te otou Atua, tela la, ka tausi faka'lei ne au koutou

Ke oko ki te taimi ko ma'tua ei koutou kae sina otou ulu.

Ne faite ne au koutou, tela la,

Ka tausi eiloa ne au koutou;

Ka fesoasoani atu au ki a koutou kae fakasao koutou.

5Muna a te Aliki, “Ko oi te tino e mafai o fakapau mai ne koutou ki a au?”

“E isi se tino e pau mo au?

6Ne tala aka ne tino olotou pausi tupe kae ligi ifo a aulo;

Ne fua foki ne latou a siliva ki fua mea mafa.

Ne togi mai ne latou se tagata poto i faiga o mea ki aulo,

Ke faite ne ia se atua;

Tena la, ko ifo atu ei latou kae tapuaki atu ki te atua tena!

7E sau aka ne latou ki olotou tuauma ko ave ei ne latou;

E tuku ne latou ki tena tulaga,

Ko te mea ke tu i kona,

Ko se mafai o gasue mai i te koga tena e tu ei.

Kafai se tino e talo ki ei, e se mafai ne ia

O tali mai io me fakasao te tino tena mai i puapuaga.

8“Masaua te mea tenei, koutou tino agasala;

Mafaufau fakalei ki te mea tenei ko oti ne fai ne au.

9Masaua te mea ne tupu i aso taumua;

Fai mai me ko au fua tokotasi ko te Atua

Kae seai aka foki se isi e pau mo au.

10Ne valo ne au te mea ka tupu mai i te kamataga;

Ne folafola ne au i aso mua eiloa a te mea tenei ko oti ne tupu.

Au ne faipati me i aku fuafuaga e se mafai o se taunu,

Me e fai foki ne au a mea katoa kola ne mafaufau au o fai.

11Ko kalaga ne au se tino ke vau mai i te saegala;

Ka eva ifo a ia pela me se manu ko te oka

O fakataunu a te mea tela ne fuafua ne au.

Au ko oti ne faipati, tela la, e taunu eiloa.

12“Fakalogo mai ki a au, koutou tino loto ma'keke,

Kola e mafaufau pela i te manumalo e maua gata.

13Ko aumai nei ne au te aso o te manumalo ke pili mai,

E se mao lele eiloa.

A toku manumalo e se fakatuai eiloa.

Ka fakasao ne au Ielusalema

Kae aumai te tulaga fakaaloalogina

Ki a Isalaelu i kona i Ielusalema.”