1 SAMUELU 23 - Tuvalu Revised Bible

Ko Fakasao ne Tavita te Fa'kai o Keila

1Ne logo Tavita i tino Filisitia ko fai taua atu ki te fa'kai o Keila, kae ko kaisoa ne latou a saito ne fatoa kati eiloa.

2Tena, ne fesili atu ei a ia ki te Aliki penei, “E a, e tau au o fano o taua atu ki te kau Filisitia?”

Ne tali mai te Aliki, “Ao, fano o taua atu ki a latou ke fakasao ne koe te fa'kai o Keila.”

3Ka ko te kau a Tavita ne fai atu ki a ia penei, “A tatou nei e nofo ma'taku i konei i Iuta, kae ka pefea o olo atu tatou ki Keila o taua atu ki te kautau lasi a Filisitia?”

4Tena ne toe kalaga atu Tavita ki te Aliki, kae ne fai mai te Aliki ki a ia penei, “Fano o taua atu ki te kau Filisitia i Keila me e tuku atu eiloa ne au ki a koe te manumalo i te kau Filisitia.”

5Tena ne olo atu ei a Tavita mo tena kau ki Keila o taua ki te kau Filisitia; ne tamate ne latou a tino Filisitia e tokouke, kae puke foki mo olotou pulumakau. E pena te fakasaoga ne Tavita te fa'kai o Keila.

6I te solaga o Apiata te tama tagata a Aimeleka, o fano ki a Tavita i Keila, ne puke atu eiloa ne ia te efota.

7Ne logo a Saulo i a Tavita ko oti ne fano ki Keila, tela ne fai aka ei a ia penei, “Ko tuku mai nei ne te Atua a Tavita ki oku lima. Ko po faka'lei eiloa Tavita, me ko ia foki eiloa ne fia fano ki loto i te fa'kai tenei e isi ne ana pui.”

8Tena ne kalaga atu a Saulo ki tena kau ke olo o taua ki te fa'kai o Keila, ke fakatakavale a Tavita mo tena kau.

9I te logoga a Tavita i a Saulo e fakatoka o taua ki a ia, ne fai atu ei a ia ki te faitaulaga ko Apiata penei, “Puke mai te efota ki konei.”

10Tena ne fai atu ei a Tavita penei, “Te Aliki te Atua o Isalaelu, au ne logo i a Saulo e fakatoka o vau o taua ki te fa'kai o Keila, ona eiloa ko au, tau tavini, e nofo i konei.

11E a, mata e tuku atu au ne tagata o Keila ki a Saulo? E a, e tonu eiloa i a Saulo e vau eiloa pela mo te tala ne logo ei au? Te Aliki, te Atua o Isalaelu, au e fakamolemole atu ki a koe ke tali mai ki a au!”

Ne tali mai te Aliki, “A Saulo e vau eiloa.”

12Ne toe fesili atu Tavita, “Kae mata e tuku atu au mo taku kau ne tino o te fa'kai o Keila ki a Saulo?”

Ne tali mai te Aliki, “Ao, a koe e tuku atu eiloa ne latou ki a Saulo.”

13Tena ne tiaki ei ne Tavita mo tena kau a te fa'kai o Keila i te taimi eiloa tena o ma'laga atu ki se isi koga. A te kau a Tavita, kaati e nofo pela ki se onoselau tagata. I te logoga o Saulo i a Tavita ko sola keatea mai Keila, tena ne seki fakataunu ei tena fuafuaga ne fai.

Ko Tavita i te Fenua Mauga

14Ne muni eiloa a Tavita i te fenua maugā, i te vao i tafa o Sifo. A Saulo e taumafai faeloa o sala Tavita, kae e se talia eiloa ne te Atua o tuku atu a Tavita ki a Saulo.

15Ne iloa ne Tavita i a Saulo tela e fanatu o tamate a ia.

A Tavita e nofo i Holesa, i te vao i tafa o Sifo.

16Ne fanatu Ionatana ki a ia i kona, kae fai atu ki ei ke sa mataku i a ia e puipui eiloa ne te Atua.

17Muna a Ionatana, “Sa mataku. E se mafai ne Saulo o fakapakia koe. E iloa lei eiloa ne ia me ko koe ka fai mo tupu o Isalaelu, ka ko au e tulaga lua atu ki a koe.”

181Samu 18.3 Ne fai te tautoga tapu a te toko lua kona, e tusa mo te fakataugasoa i te va o laua. Ne nofo eiloa a Tavita i Holesa ka ko Ionatana ne foki atu ki tena fa'kai.

19 Sala 54 E isi ne tino mai Sifo ne olo atu ki a Saulo i Kipea, kae fai atu ki a ia penei, “A Tavita tela e muni i te koga fenua o matou i Holesa, i te Mauga o Hakila, i te feitu ki saute o te vao o Iuta.

20Tou Malu, e iloa ne matou i a koe e manako malosi ke maua ne koe a Tavita; tela la, vau ki te motou laukele, kae ka taumafai matou ke maua eiloa ne koe a ia.”

21Ne tali atu Saulo, “A te Aliki ke fakamanuia atu ki a koutou, i a koutou e a'lofa mai ki a au!

22Toe olo o toe onoono faka'lei; onoono faka'lei ki te koga e nofo i ei, kae sala foki ki te tino ne matea tonu ne ia i te koga tena. Au e logologo pela i a ia se tagata poto i te faitogafiti.

23Onoono faka'lei ki te koga e muni ei a ia, kae masaua ke aumai se lipoti tonu ki a au. Tena, ko mafai ei au o fanatu i a koutou, kae kafai e nofo eiloa i te koga fenua tena, e sala eiloa ne au ke maua.”

24Tena, foki atu ei a latou kona ki Sifo, e mua atu i a Saulo. A Tavita mo tena kau e nofo i te vao o Maono, i te vanu e seai ne tino i ei, i te feitu ki saute o te vao o Iuta.

25Ne ma'laga atu a Saulo mo tena kau o sala Tavita, ka ko Tavita ne logo i te malaga tena, tena ne fanatu ei a ia ki te mauga fatufatua kae foliki i te vao o Maono, nofo eiloa i kona. I te logoga o Saulo i a Tavita ko fano ki te koga tena, ne tautali atu foki a ia i a Tavita.

26A Saulo mo tena kau e nofo i te sua feitu o te mauga, ka ko Tavita mo tena kau i te sua feitu. A Tavita mo tena kau e fakava'vave o tele ke mao latou mai a Saulo mo tena kau, kola ko pili atu ki a latou, kae ko tai maua faka eiloa latou.

27I kona foki eiloa, ko te avefekau eiloa ko tu atu kae fai atu ki a Saulo penei, “Foki nei fakavave! A te kau Filisitia ko o'mai o taua ki te tou fenua!”

28Tena ne tiaki ei ne Saulo a Tavita, kae foki atu o taua ki tino Filisitia. Tena te mea e fakaigoa ei te koga tena ko te Mauga o Mavae.

29Ne tiaki ne Tavita te koga tena o fano ki te kogā fenua o Eneketi, muni eiloa i kona.