FAKAASIGA 10 - Tuvalu Revised Bible

Ko te Agelu mo te Tamā Pelugā Tusi

1Ne matea ne au a te agelu malosi e fanaifo mai te lagi. E pei ki te kaumana mo te nuanua e fakatamilo i tona ulu; a ona foliga e pela eiloa mo te la, ka ko ona vae e pela eiloa mo pou afi.

2E isi se tamā pelugā tusi e 'fola i ona lima. E tu tona vae fakaatamai i luga i te tai, ka ko tona vae fakamaui e tu i luga i te fenua,

3kae kalaga mo te leo lasi, e pela eiloa mo te leo o te leona fekai. I te otiga ne kalaga a ia, pa'pa mai ei a fa'tili e fitu o tali ki ei.

4Kae i te taimi ne fai'pati ei a fa'tili kona e fitu, ko te taimi foki eiloa tena ne fakatoka ei au o tusitusi. Kae ne lagona ne au a te leo e faipati mai i te lagi penei: “'Funa ke mo a ma iloa a muna a fa'tili e fitu kae sa tusigina!”

5 Eso 20.11; Teu 32.40; Tani 12.7; Amo 3.7 A te agelu tela ne matea atu ne au e tu i luga i te tai mo te fenua, ne sisi ake tona lima fakaatamai ki te lagi,

6kae fai tena tautoga penei i te igoa o te Atua, tela e ola ki te se gata mai, kae ne fai foki ne ia te lagi mo mea katoa i ei, te lalolagi mo mea katoa i ei, a te tai mo mea katoa i ei. Muna a te agelu: “Ko seai eiloa ne aso!

7Kae kafai ko ili a te pu a te tokofitu o agelu, ko fakataunu ei ne te Atua tena fuafuaga 'funa, e pela eiloa mo tena folafolaga ne fai ki ana tavini ko pelofeta.”

8 Eseki 2.8—3.3 Ne toe lagona ne au a te leo tela ne faipati mai te lagi, ko toe fai mai penei: “Fano o puke te pelugā tusi e matala, tela e i lima o te agelu tela e tu i luga i te tai mo te fenua.”

9Ne fano au ki te agelu, fai atu ei au ke tuku mai a te tamā pelugā tusi. Kae ne tali mai ki a au penei, “Puke ki ei o kai; ka 'kava i loto i tou tinae, kae e magalo eiloa e pela mo se meli vao i tou gutu.”

10Puke atu ei au ki te tamā pelugā tusi i tona lima, kai eiloa ne au. E magalo eiloa e pela mo se meli vao i toku gutu. Kae i te otiga ne folo ne au, lagona ei ne au te 'kava i loto i toku tinae.

11Tela, toe taku mai ei foki ki a au a te mea nei, “E 'tau mo koe o toe 'valo atu a te muna a te Atua ki tino, fenua, 'gana mo tupu.”