1Ne fai mai koutou me kafai e fakatasi tatou, e faipati atu au ki a koutou i te loto malalo, kae kafai ko 'mao au keatea mo koutou, ko tusi atu au mo te se ava. E taofi 'se koutou, kae fia fakamolemole atu au ki a koutou, me ne fai ne au a mea konei i te agaga o te alofa mo te loto malalo o Keliso.
2Sa fai malogina au ke toa i otou mua ma oko atu au; me talitonu toku loto me mafai eiloa au o toa ki tino kola e muna mai me fakavae omotou galuega i manatu faka te lalolagi.
3E tonu me i a tatou e 'nofo i te lalolagi; ka ko tatou e se taua ona ko manatu faka te lalolagi.
4A meatau kola e fakaaoga ne tatou i te tou taua, e se ne meatau o te lalolagi, ka ko meatau malosi a te Atua e tamate ei ona fili. E fakamasei ne matou a kinauga se tonu.
5E ofa katoa ne matou aofaga fakamata'mata kola e fakafetaui ki te poto o te Atua, kae fakatakavale katoa mafaufauga se 'lei ke faka'logo ki a Keliso.
6Kae kafai ko oti ne fakatalitonu ne koutou te katoaga o te otou fakamaoni, ko toka foki matou o fakasala so se tino e se fakamaoni.
7A koutou e se matuā mafaufau 'loto ki uiga o mea. Kafai se tino ko iloa tonu ne ia i a ia ko fai mo tino o Keliso, e 'tau o iloa ne ia i a matou ne tino foki o Keliso.
8Me kafai e tai fakamatamata malosi au e uiga ki te pule ne aumai ne te Aliki mo ati ake ei koutou, e se mafai eiloa o taema au i ei, me se pule e fakamautakitaki ei koutou i te fakatuanaki.
9Au se taumafai o fakamatakutaku koutou ki aku tusi.
10Ka fai ake se tino o koutou penei, “E 'mafa kae ma'losi ana tusi, ka ko tona nofo mai i otou mua, e vaivai fua ana pati kae e se aoga foki!”
11Ko vaega tino pena e 'tau o iloa ne latou me seai se kesekesega i mea e tusi atu ne matou i omotou tusi, manafai e se 'nofo i kona matou, mo mea ka faipati atu ne matou manafai e 'nofo matou i kona.
12E tonu i a matou e se fia saga o fakavasega matou io me o fakatusatusa matou mo nisi faiakoga kola e manatu pela i a latou e ma'luga. Ko oko eiloa i te lotou va'lea! E tavae ifo eiloa latou ki a latou, kae e seai ake foki eiloa se tino e tavae ne ia latou!
13Kafai e fakamata'mata matou, ko te fakamata'mata fua o matou e uiga ki te galuega ne tuku mai ne te Atua ki a matou.
14A te galuega tenei ko te oloatuga o matou o avatu te tala 'lei e uiga ki a Iesu Keliso.
15Tela la, e fakamata'mata matou ki te galuega tela ne fai ne matou mo koutou, kae se ko galuega ne fai ne nisi tino. Kae fakamoemoe fua matou ke tupu ola te otou fakatuanaki, ko te mea ke mafai o fai ne koutou ne galuega 'lasi i a koutou, ka ke fai eiloa i loto i tuakoi kola ne tuku mai ne te Atua.
16Ko te mea ke mafai ne matou o talai atu te tala 'lei ki fenua i te feitu atu o koutou kola e seki oko ki ei te tala 'lei, ko te mea ke mo a e fakamata'mata matou ki galuega ne fai ne nisi Kelisiano.
17 Iele 9.24 Muna a te Tusi, “So se tino e fia fakamatamata, e 'tau mo ia o fakamatamata i galuega ne fai ne te Aliki.”
18Me se ko te tino tela e tavae ki a ia ake eiloa e talia, ka ko te tino fua tela e tavae ne te Atua.
Who We AreWhat We EelieveWhat We Do
2025 by iamachristian.org,Inc All rights reserved.